हिटनो 11

पहेलो जलमो को मरनो

1यहोवा परमेस्वर ना मीसर देस मा मोसे अना हारून लक कह्यो मी एक अखिन आफद फराओ अखिन मिसर पर धाड़िन, वोको मघानी उ तुम्हिला यहान लक जावन देहेत। अना जरूर तुम्हिला यहान लक हेड़ेत। 2अबा इसरायली लोक हुनला असो कव्हो, का हरेक मरद अखिन बायको आपरो-आपरो सेजारी लक सोन्नो खुरो मांग लेय। 3यहोवा परमेस्वर ना मिसरी गिनला इसरायिल गिनको लाय दयालू बना दियो। एको सिवाय मोसे ला भी मिसर देसमा मिसरी लोक हिनमा फराओ को अधिकारी महान समजत होतो।

4मोसे ना फराओ लक कह्यो, यहोवा परमेस्वर को यो खबर से, अरधो राती मा मी मिसर देस को बीच लक जाहिन। 5अखिन मिसर देस को हरेक पहेलो जलमो टूरा, चाहे सिंघासन को राजा को या चकिया पिसन वाली को, या सबरी जनावर गिन को पेहेलोठा सब मर जाहेत। 6तबा पूरो देस मा लगत हाहाकार को माहोल रहेत, इतरो का ना तो वोको जसो कभ्भू भयो ना होहेत। 7पर इसरायिली गिनको मानूस गिन पर कोनी जनावर या कोनी कुतरा नही भुकेत, जोनलक समज मा आ जाहेत, का मी यहोवा परमेस्वर च सेऊ, जोन इसरायली अखिन मिसरी गिनको बीचमा अंतर राखयो सेऊ। 8तुमरो यो सबा सेवक मोरो जवर आयके परनाम करहेत अना कहेत, तुम्हि यहान लक चले जाव, अखिन आपरो सप्पा लोक गिनला लेजाव। तबा मी फराओ ला गुस्सा मा सोड़ के हीट जाहुँ।

9एको मघानी यहोवा ना मोसे ला कह्यो, फराओ ता अबा भी तुमरो नही आयकेत, काहेका मी मिसर देसमा चमत्कार को काम चोवानो चाव्हासू। 10मोसे अना हारून ना सप्पा चमत्कार फराओ ला दिसायो। यहोवा परमेस्वर ना फराओ को मन कर्रो बनाय राखयो, अखिन फराओ इसरायली गिनला मिसर देस लक हिटनो लक रोकतो रहयो।