हिटनो 10

टिड्डिगिन को हमला

1यहोवा परमेस्वर ना मोसे लक कह्यो, फराओ राजा को जवर जाय, मीना वोको अना वोको नौकर गिनको मनला कर्रो कर दियो सेऊ,का आपरो चमत्कार 2जोन लक तुम आपरो बेटा नाती-नतरा ला सबा सांग सको का जबा मीना चमत्कार को काम करयो, ता मीना मिसरीगिन ला कसो मूरख बनायो। “तुमी सबरी जान जाहो का मी च परमेस्वर यहोवा आँउ।”

3मोसे अना हारून ना फराओ को जवर जायके वोको लक कहिन, यहोवा जोन इबरानी गिनको परमेस्वर आय तुमरो लक असो कह्योसे, तुम्हि कब तकन मोरो समोर आपरो आप ला नरम नही करने मोरो परजा गिनला रोको नोको, जावन देव, जोनलक वय मोरी सेवा आराधना करहेत। 4अखिन अदि नही जावन देजोस ता काल मी तुमरो देसमा टिड्डी आनू जोन 5तुमरो देस मा असो भर जाहेत का धरती नही सुझेत, अना जोन गार गोटा लक बचयो से वोला सब नास कर देहेत अना सबरी झाड़ पेड़ सब खाय जाहेत। 6मंग तुम्हारो अना तुम्हारो नौकर गिन अना पूरो मिसरवासी को घर गिनमा टिड्डि भर जाहेत। असो तो तुम्हारो अजी अखीन उनको आजा-बाबा को जलम लेक अब तकन कदि नही चोवो होयेत। असो कव्हन को मघानी मोसे फराओ को कन लक चले गयो।

7फराओ को मन्तरी गिन ना वोको लक पुसयो, “अखिन कब तकन यो मानूस आमरो लाय आफद अना फन्दा को कारन बनहेत? इनला सेवा करन जावन देव का वय आपरो परमेस्वर यहोवा को अराधना कर सकेत का तोला मालूम नाहती का मिसर देस सप्पा सत्यानास भयी गयो से?”

8मोसे अना हारून ला फराओ को जवर आनयो गयो। राजा ना उनलक कह्यो “जाव अखिन यहोवा आपरो परमेस्वर को सेवा करो, कवन-कवन सेत, जोन तुमरो संग जाहेत?”

9मोसे ना जवाब दियो, “आमरो संग आमरो लेकराहुन अखिन आमरो सियानो आमरो टूरा-टूरी आमरो जनावर मेंढा-सेरी सब जाहेत, काहेका अमी सब यहोवा परमेस्वर को मान मा तिहार मनावबिन।” 10फरओ ना उनलक कह्यो अदि मी तुम्हिला अखिन तुमरो लेकरा गिनला जावन देहू ता पिरभू तुमरो संग होय! पर चोवो तुमरो तोन्ड मा बुराई झलका से। 11“नही, बिलकुल च नही! सिरप मरदमाना जाव अखिन परमेस्वर को सेवा करो। योच तुमरो मरजी से।” अखिन मोसे अना हारून ला राजा को जवर लक बाहेर हेड़ देयिन।

12तबा यहोवा ना मोसे लक कह्यो, “मिसर कन आपरो हात बढआव! का टिड्डी आयके मिसर मा छा जाय अखिन सबरी हिवरो झाड़ नास कर देय।” 13जब मोसे ना मिसर देस कन आपरो लठीया उठायो तबा परमेस्वर ना पूरो देस मा रात-दिवस दिन उगती कन को वारा चलायो। जब सक्कारी भयो तबा दिन उगती को वारा आपरो संग टिड्डी दल ले आयो। 14टिड्डी दल सप्पा मिसर देस मा छा गयो। टिड्डि को दल इतरो लगत होतो का पहले कभ्भू नही चोवयो गयो होतो। ना कभ्भू चोवो जाहेत। 15टिड्डि गीन ना धरती ला असो झाक लियो होतो का सप्पा देस मा इंधार भयी गयो होतो। उनना सप्पा हिवरो रोप झाड़ फर-फूल जोन गारगोटा लक बचयो होतो खा गयिन। 16तबा फराओ ना गदने मोसे अना हारून ला बुलायो अखिन उनलक कह्यो, मीना तुमरो परमेस्वर को बिरोध मा पाप करयो सेऊ। 17अबकी बार मोरो पाप छिमा करो, अखिन आपरो परमेस्वर लक बिनती करो। का उ यो मरनो लक मोला दूहुर करे। 18तबा मोसे फराओ को जवर लक बाहेर गयो अना वोना यहोवा परमेस्वर लक बिनती करयो। 19तबा यहोवा परमेस्वर ना वारा को दिसा ला दिन बुडती कन मुरका दियो अना टिड्डी गिन लाल सागर मा बुढ़ाय दियो अना पूरो देस मा एक भी नही बचयो। 20पर परमेस्वर ना फराओ को मन ला हट्टी बना दियो जोनलक उ इसरायली गिनला जावन नहि दियो।

इंधार

21तबा यहोवा परमेस्वर ना मोसे लक सांगयो आपरो हात बादल कन बढाव जोन लक पूरो मिसर देसमा इंधार छा जाय इतरो जादा का छीव नही सकत। 22तबा मोसे ना आपरो हात बादल कन बढायो अखिन सप्पा मिसर देसमा तीन दिवस लक घनाघोर इंधार छाय गयो।1 23मिसर को रव्हन वारो लोक हुन एकमेक ला नही चोव सकिन, वय तीन दिवस तकन आपरो जघा लक उठ नही सकीन, पर इसरायली को घरमा उजाड़ होतो।

24फराओ ना मोसे लक बुलाय के कह्यो, जाव आपरो यहोवा को सेवा करो तुमरो लेकरा बारा भी तुमरो संग जाय सकत बस आपरो मेढ़ा सेरी अना गाई बइल सोड़ देव।

25मोसे ना कह्यो अमीला बलि अखीन होम-बलि को लाय जनावर अना मेंढा सेरी लेके जावनो जरूरी से जोनलक अमी परमेस्वर ला बली चघाबिन। 26आमरो जनावर आमरो संग जरूर जाहेत। एक भी जनावर नही सोड़बिन, अमी आपरो परमेस्वर को सेवा को लाय उनला भी लेजाबिन। काहेका अमीला नही मालूम से का परमेस्वर को सेवा कसो करबीन।

27पर परमेस्वर ना फरओ राजा को दिल ला हट्टी बना दियो जोनलक ओना इसरायली गिनला नही जावन दियो। 28फराओ ना मोसे लक कह्यो, मोरो कठा लक चलो जाय, तुम्ही हुसियार रव्हने, मोरो तोन्ड मंग नोको चोवने, काहेका मोरो तोन्ड जोन दिवस चोवजोस वोच दिवस तू मर जाजोस।

29मोसे ना जवाब दियो, “ तू ना साजरो सांगयो से, अबा मी तोरो तोन्ड कभ्भू च नही चोऊ।”