हिटनो 9

जनावर गिन को मउत

1मंग परमेस्वर ना मोसे लक सांगीस, जायके फराओ राजा ला असो सांगजोस, “इबरानी गिनको परमेस्वर यहोवा ना असो कह्यो से; मोरो लोगगिन गिनला यहान लक जावन देव, जोनलक वय मोरी सेवा करहेत। 2अदि तुम्हि उनला नही जावन देहो अना उनला अबा भी रोके रहेत। 3चोव तोरो घोड़ो, गाढ़व, ऊंट, गाई-बइल अना मेंढा-सेरी गीन जनावर जोन बर्रा मा सेत, उन पर यहोवा को हात असो पड़हेत, का भयंकर मरही फैल जाहेत। 4पर यहोवा परमेस्वर इसरायली गीन को जनावर अना मिसरी गीन को जनावर गिन मा भेद-भाव करहेत अना इसरायली को एक भी जनावर नही मरहेत।” 5यहोवा परमेस्वर ना एक बेरा पक्को करयो, मी काल यो काम मिसर देस मा करहीन।

6दुसरो दिवस परमेस्वर असोच करयो मिसर को रव्हन वालो लोक गिनको सबा जनावर मर गयिन, पर इसरायली गिनको एक भी जनावर नही मरयो। 7राजा फराओ ना खबरी धाड़ के पता लगायो तबा वोला पता चलयो का इसरायल मा एक भी जनावर नही मरयो सेत मंग वोको मन कर्रो च रहयो, अना वोना इसरायली गिनला नही जावन दियो।

फोड़ा अना खत्ता को आफत

8यहोवा परमेस्वर ना मोसे अखीन हारून लक कव्हयो “आपरो-आपरो हात मा मुठ्ठा भर के राखड़ लेव अखिन वोला फराओ राजा को समोर बादल कन फेकने” 9यो राखड़ धुल्ला बनके मिसर को लोखहुन अना जनावर को तन मा फोड़ा अना खत्ता बन जाहेत। 10हुकुम को अनुसार मोसे अना हारून फराओ को समोर उभो भयीन अना राखड़ ला मुठ्ठा मा धर के उडाइन अना मानूस अना जनावर को तनमा फोड़ा अना खत्ता हीट गयिन।1 11इन फोड़ा को कारन लक मोसे को समोर सोदाहा पन्डा,बिदवान उभो नही रव्हे सकीन, काहेका यो फोड़ा सिरप मिसरी गिन को तन पर नही पर सोदाहा अना पन्डागीन को तन मा भयि गयो होतो। 12पर परमेस्वर ना राजा को मन ला लगत कर्रो कर दियो होतो। अना जसो यहोवा ना मोसे लक कह्यो होतो, वोना वोकी नहि आयकी।

गारगोटा को आफद

13यहोवा परमेस्वर ना मोसे लक सांगीस, सक्कारी जाग के फराओ राजा को समोर जाव, अना वोको लक सांगजोस “इबरानी गिन को परमेस्वर असो कव्हासे, मोरो लोक गिनला जावन दे, वय मोरो सेवा करहेत।” 14काहेका मी अबकी बेरा आपरो सब आफद मरही तोरो पर2 अना तोरो नौकर गिन अना मिसरी जनता गिन पर डाकीन, जोनलक तोला मालूम भयी जाहेत का धरती मा मोरो जसा कोनी नहाय। 15मी चहातो ता अबा तकन आपरो तकत लक तोरो परजा ला मरही लक सतियानास कर देतो अना तू धरती लक मीट जातो। 16पर मीना तोला एकोलाय जिंदो राखीसेऊ का तोला मी आपरो ताकत दिसाऊ जोनलक सप्पा धरती मा मोरो नाव को गूनगान कियो जाय।3 17पर तू अबा तकन मोरो लोगगिन को समोर बाधा बनके उभो सेत अखिन काहे उनला अबा तकन जावन नही देवासे? 18एकोलाय चोव, काल ऐना बेरा मी भारी गारगोटा को असो भयंकर पानी पाड़ूँ जसो मिसर देस को इसतापना को दिवस लक अबा तकन नही भयी। 19अबा तू नौकर गीनला धाड़ अना सबला सांग की बर्रा मा जोन जनावर अना मानूसगिन सेत वोला सुरक्सित करो नही ता वय सब मर जाहेत। 20तबा राजा फराओ को नौकर गिन यो आयक के परमेस्वर को बचन को कारन सबा लवकर-लवकर जनावर अना नवकरगिन ला सुरक्सित कर देयिन। 21पर जिनना यहोवा को बचन पर मन ला लगायो उनना आपरो नौकरगिन अना जनावर गिन ला बर्रा मा रव्हन देव।

22यहोवा परमेस्वर ना मोसे ला हुकुम दियो, आपरो हात बादल कन उठाव, जोनलक पूरो मिसर देसमा का मानूस का जनावर का झाड़ सप्पा पर गार गोटा पड़हेत। 23मोसे ना आपरो लठिया बादल को कन उठायो, तबा परमेस्वर को बदली गरजो अखिन गारगोटा बरसन लगयो बिजली कड़कन लगयो, असो दसा मिसर देसमा कभ्भूच नही भयो होतो। 24जो गारगोटा पड़त होतिन उनको साथ मा बिजली भी पड़त होति अना वो बेझा भारी होति असो मिसर देसमा गारगोटा कभ्भूच नही पड़या होतिन।4 25एकोलाय मिसर भर को खेत मा का मानूस, का जनावर, जितरो होतो सबरी गारगोटा लक मारयो गयीन, अखीन गारगोटा लक उपज नास भयी गयी, अना बर्रा को सबरी झाड़ तुट गयीन । 26सिरप गोसेन छेतर मा जहान इसरायली रव्हत होतिन वहान गारगोटा नही पड़िन।

27राजा फराओ ना दूत धाड़ के मोसे अना हारून ला बुलवायो अखिन उनको समोर आपरो पाप मान लियो, अना उनको लक सांगयो यहोवा परमेस्वर महान न्यायी से, मी अना मोरा लोगगिन पापी सेत। 28तुम्हि यहोवा परमेस्वर लक बिनती करो लगत भयी गयो गारगोटा अखिन गरजनो, अबा मी तुम्हिला याहान लक जावन देहू;

29मोसे ना वोला कह्यो जसो मी नगर बाहेर हिटके आपरो हात उठाइन, तबा बिजली अना गारगोटा रूक जाहेत, तबा तुम्हिला मालूम भयी जाहेत का धरती मा यहोवा परमेस्वर को हक से। 30तोभी मी जानासेऊ का ना नहि तू अना तोरो नौकरगिन यहोवा परमेस्वर को भेव मानेत।

31अलसी अना जव को फसल बरबाद भयि गयो काहेका वय फूल फर मा होतिन। 32पर गहूँ अना साजरो किस्म को गहूँ नास नही भयो होतो काहेका वोको उपज मा उसीर होतो।

33जबा मोसे ना फराओ को जवर लक नगर को बाहेर हिटके परमेस्वर यहोवा को कन हात फैलायो तबा बदल गरजो अना गारगोटा बरसनो रुक गयो अना पानी धरती मा नही पड़यो। 34जबा राजा फराओ अना वोको नौकर गिनना चोवयो का गारगोटा बंद भयि गयो से तबा उनना दुबारा पाप करयो अना आपरो दिल ला कर्रो कर लेयीन 35असो परकार लक फराओ को मन हठिलों होतो गयो, अना वोना इसरायलीगिन ला नहि जावन दियो, जसो का यहोवा परमेस्वर ना मोसे लक कहेलायो होतो।