Powari Standard Project
हिटनो 8
मेंडकागिन को हमला
मंग यहोवा परमेस्वर ना मोसे लक कह्यो, फराओ राजा को जवर जाय! अना वोको लक कव्हजोस, यहोवा परमेस्वर असो कव्हासे मोरो लोक गीनला सेवा आराधना करन जावन दे, मंग अदी नही जावन देजोस ता पूरो देस मेंडकागिन धाड़ू जोन सप्पा देस ला नुकसान पहुचें। नील नद्दी मा मेंडका च मेंडका भर जाहेत, अना वय तोरो हतरन महल, घर, का राजा, का परजा अना चुल्हा-चौका बरतन भान्डो, परात, पैना मा चघ जाहेत। मेंडका तोरो तन मा अना परजा का सबा नौकरगिन पर चघ जाहेत।
मंग यहोवा परमेस्वर ना मोसे लक कव्हयो, हारून लक सांग आपरो हात मा लठिया धरके नद्दी तलाव ओघर कन बढाव जोन लक मिसर देस मेंडकागिन लक भर जाय। तबा हारून ना मीसर देस को हर जगह को पानी को वोरता आपरो हात बढ़ाय के, अना मेंडकागिन ना मिसर देस पर चढ़के वोको पर छाय गयीन। तबा मिसरी पन्डा, सगुन सांगन वालो अना गियानी,बिदवान भी वसोच कर देयिन अना वय भी मेंडकागिन ला आन देयिन।
तबा फराओ राजा ना मोसे अना हारून ला बुलवायो अना कव्हयो यहोवा परमेस्वर लक बिनती करो का उ इन मेंडका गिनला मोरो अना मोरो जनता लक दूहूर करे, तबा तुम्हि लोक ला यहोवा को लाय पूजा-पाठ करन साठी यहान लक जावन देहू।
मोसे ना फराओ राजा ला जवाब दियो, अता तू च सांग कब पिराथना करनो से, जोन लक मेंडका तुम्हि लोक हुन को घर लक हिटके सिरप नील नद्दी मा रहेत।
अना वोना कह्यो काल पिराथना करजोस, तबा मोसे ना कव्हयो, जसो तू कव्हसेत वसोच होहेत,
जोनलक यो मालूम भयी जाहेत का आमरो परमेस्वर यहोवा को जसो दूसरो कोनी नाहत। मेंडकागिन तोरो अना तोरो सब नौकर-चाकर अखिन परजा को कन लक चले जाहेत बस नील नद्दी मा रहेत। तबा मोसे अखिन हारून राजा को कठा लक बाहेर हीट गयिन। अना मोसे आपरो कव्हन को अनुसार परमेस्वर लक मेंडकागिन ला जावन को लाय पिराथना करन लगयो। तबा परमेस्वर ना मोसे को गोस्टी ला मानयो अखिन उनको घर, आगँन, महेल अखिन खेतगिन लक सप्पा मेंडका गीन मर गयिन। तबा परमेस्वर मरयो हुया मेंडका गिनला एक कना जमा करीन अखिन पूरो देस बस्सान लगयो। जसो च मेडका सप्पा मर गयिन अना परेसानी दुहुर भयी गयो असो चोवके राजा आपरो वादा लक मुकर गयो अना दिल कर्रो कर लियो।
मुगसा को झुंड
यहोवा परमेस्वर ना मोसे ला कव्हयो, हारून लक सांग का वा आपरो लठिया उठाये अना जमीन को धूल मा पटके जोन लक पूरो मीसर देस मूगसा लक भर जाहेत। तबा हारून ना लठिया ला जमीन मा मारयो, जोनलक मूगसा अना गिचोड़ी मानूस गीन अना जनावर गीन पर छाय गयो। अना पूरो मीसर देस को धुल्लो पिस्सू बन गयो। असोच करन लाय पन्डा अखिन बिदवान, सोदाहा गिन कोसीस करीन पर नही कर पायो। तबा मानूस गीन अखीन जनावर गीनला पिस्सू अना मूगसा गिनना परेसान कर डाकीन। तबा सोदाहा अना पन्डा,बिदवान गिनना कव्हयो यो तो खरोखर परमेस्वर को काम से। एको पर फराओ को मन कर्रो भयी गयो जसो यहोवा परमेस्वर ना कव्हयो होतो, एकोलाय वोना धियान नही दियो।1
डान्समाखी को झुन्ड
मंग यहोवा परमेस्वर ना मोसे लक सांगयो “सक्कारी लवकर उठ के फराओ राजा को जवर जाजोस”, उ नील नद्दी कन जाहेत ता वोला कव्हजोस, यहोवा परमेस्वर को हुकुम सेत का मोरो लोक हुनला जावन दे, वय मोरो सेवा आराधना करहेत। अगर तू मोरो लोगगिन ला सेवा को लाय नही जावन देजोस ता मी तोरो पर अना मिसर देस का लोगगिन पर अना उनको मकान मा झुन्ड का झुन्ड डांस माखी धाड़िन, अना पूरो मिसर देस का रव्हन वालागिन को मकान अना उनको जाघा डांस माखी लक भर रहेत। पर गोसेन देस जहान मोरा लोगगिन रव्हासेत, उनला बेगरो करूँ उता डांस माखी नही रहेत, जोनलक तुम्हिला मालूम भयी जाये का मी च यहोवा परमेस्वर आऊ, अना यो देसमा मोरो अधिकार सेत। अना मी आपरो लोगगिन अना तोरो लोगगिन को बीच मा अन्तर ठयराहूँ, यो निसान काल होहे। यहोवा परमेस्वर ना वसोच करयो डांस माखी को दल, का नौकरगिन को घर का राजा को राजमहल अना पूरो देस डांस माखी लक भर गयो अना नास भयि गयो।
तबा राजा फराओ ना मोसे अना हारून ला बुलाये के सांगयो, “तुम्हि लोक जाव अखिन आपरो परमेस्वर को लाय अराधना चघाव।”
पर मोसे ना कव्हयो असो करनो सही नाहती, अमी आपरो परमेस्वर ला असो बली चघाबिन जोनलक मिसर को रव्हनवाला घीरना वारी जुनुस समझा सेत, यदी अमी घिरना वारी जुनुस बली चघाइन ता अमीला मिसर को रव्हन वालो गोटा लक मार डाकेत। अमीला तो बियाबान जंगल मा तीन दिवस को दूहुर मा जावनो से, वहान अमीला जसो हुकुम देहेत यहोवा परमेस्वर ला बली चघाबीन।
राजा फराओ ना जवाब देयिस, साजरो से तुम्हिला जावन देवासू का तुम्ही बियाबान परदेस मा जायके यहोवा परमेस्वर ला बली चघाव पर लगत दुहुर नोको जाजोस, वहान मोरो लाय भी पिराथना करने।
यो आयक के मोसे ना जवाब दियो, अबा मी यहान लक जाय रव्हो सेऊ, अना मी यहोवा परमेस्वर लक बिनती करहीन, का डांस माखी गिनला तुमरो लक दूहूर करे असो नोको होय का फराओ वापीस चलाकी करके लोगगिन ला रोकन को कोसीस करेत।
तबा मोसे फराओ को जवर लक बाहेर हिट के यहोवा परमेस्वर लक पिराथना करयो अखिन यहोवा परमेस्वर ना मोसे को कहनो मा, डांस माखी को दल फराओ अना वोको सेवक गिन अना परजा कन लक हटाय लियो अना एक भी नही बचयो। मंग फराओ ना आपरो मन कर्रो कर लियो अना लोगगिन ला जावन नही दियो।
Source notes (1)
- Cross-reference लूका 11:20
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.