Powari Standard Project
हिटनो 7
तबा यहोवा न मोसे लक कहीस,“आयक मी तोला फराओ को लाय परमेस्वर जसो, अना हारून ला तोरो कन लक बोलनवारो मजे भविस्यवक्ता ठैयरवा सू। जोन-जोन हुकुम मी तोला देहू वा तू हारून ला सांगजोस अना उ फराओ ला सांगेत तबा वा इसरायली गिनला यो देस मा लक जावन देहे। पर मी फराओ को मन ला गोटा जसो कड़ो बना देहू, जोनलक मी मिसर देस मा चमत्कार को काम चोवाहू1 फराओ तुमरो गोस्टि नही आयेकेत, तब मी मिसर मा आपरो हात बढाँहू अना आपरो सेनागिन मजे आपरो लोग इसरायल को खानदान ला नियाव को मोठो कामगिन लक मिसर देस लक बाहेर हेड़ू। अना जबा मी मिसर को लोक हुन पर आपरो हात बढ़ाय के उनला सजा देहू तबा उनला मालूम भयी जाहेत का मी च यहोवा परमेस्वर सेऊ जोनना मिसर देस लक इसरायली गिनला हेड़ी सेऊ।” तबा मोसे अना हारून ना जसो यहोवा परमेस्वर ना कह्यो होतो वसोच करयो। जब मोसे अखिन हारून मिसर को राजा फराओ को कठा गयो होतिन तबा मोसे अस्सी अना हारून तेरासी साल को होतो।
हारून को लठिया
तबा यहोवा परमेस्वर ना मोसे अना हारून ला यो हुकुम दियो, “जबा फराओ राजा तुम्हिला काही चमत्कार करन ला सांगेत तबा तू हारून लक कव्हजोस, आपरो लठिया समोर डाक का फराओ राजा को समोर उ सरप बन जाय।” एकोलाय मोसे अखिन हारून राजा फराओ को कठा गयीन अना जसो यहोवा परमेस्वर ना सांगयो होतो तसोच करीन, हारून ना आपरो लठिया फराओ अना करमचारी अना राजा को समोर डाखिस अना उ सरप बन गयो। यो चोवके फराओ राजा को राज को गियानी, बिदवान,पुजारी, सोदाहागिन अना मिसर को पन्डा भी वसोच करीन। उन सप्पा ना आपरो-आपरो लठिया फेकिन अना वय सरप बन गयिन। पर हारून को लठिया ना उन सप्पा लठिया ला गिटक लियो। एकोलक फराओ को मन लगत गोटा जसा भयि गयो। अना जसो यहोवा परमेस्वर ना कह्यो होतो, मोसे गिनको गोस्टि ला राजा नही मानयो।
मिसरीगिन पर दहा आफत को पड़नो
पानी को रकत बननो
तबा यहोवा परमेस्वर ना मोसे लक कह्यो,राजा फराओ को मन लगत कड़ो भय गयो से अता वा लोक गिनला नही जावन देहेत। एकोलाय सक्कारी जबा राजा फराओ नील नद्दी कन जाहेत, तबा तुम्हि नद्दी कन जावने अना आपरो हात मा वोच लठिया धरने जोन सरप बन गयो होतो। अना तू राजा फराओ लक कव्हजोस, का इबरानी गिनको परमेस्वर यहोवा मोला यो कव्हन लाय धाड़यो से, मोरो लोक गिनला बियाबान जंगल मा जावन देव वहान वय मोरो सेवा अराधना करहेत। पर अबा तकन तू ना मोरी गोस्टी नही मानयो सेत, अता तू चोवजोस मी नील नद्दी मा यो लठिया मारहिन अना पानी रकत बन जाहेत तबा तोला मालूम भयी जाहेत का मी च यहोवा परमेस्वर सेऊ।2 “तबा नील नद्दी को सप्पा मसरी मर जाहेत अना बस्सान लगहेत अना मिसर को लोक पानी नही पीव सकेत।”
मंग यहोवा परमेस्वर ना मोसे लक कव्हयो,हारून ला कव्ह का आपरो लठिया मिसर देस को तलाव, नद्दी, ओघर अना बिहर पानी को बावड़ी कन बढाय जोनलक सप्पा पानी रकत बन जाहेत, यहान तकन घरमा राखयो बरतन मा को पानी भी रकत बन जाहेत।
मोसे अना हारून ना तसोच करयो, जसा यहोवा परमेस्वर ना सांगयो होतो। राजा अना वोको सेवक सबको डोरा को चोवता- चोवता हुयो लठिया ला नील नद्दी को पानी मा मारयो अना नील नद्दी को पानी रकत बन गयो। तबा नील नद्दी मा जो मसरी होतिन सप्पा मर गयिन, नद्दी एतरो बस्सान लगयो का मिसर को लोक पानी नही पीव सकत होतिन। सप्पा मीसर मा रकत बगर गयो होतो। तबा मिसर देस को पन्डा सोदाहा बिदवान ला भी परमेस्वर वसोच कर देयिस तबा राजा फराओ को मन अखिन कड़ो भयी गयो अना वोना उनको गोस्टि ला नही मानयो। तबा फराओ राजा को दिल पर एना गोस्टि को काही असर नही भयो अना उ आपरो घर चलयो गयो। तबा मिसर देस को लोक पीवन को पानी लाय नील नद्दी को कठा खोदरा खदन लगीन काहेका उनको जवर पीवन को पानी नही होतो।
यहोवा परमेस्वर कन लक नील नद्दी को पानी ला रकत बनायो सात दिवस भयी गयो होतो।
Source notes (2)
- Cross-reference पेरीत 7:36
- Cross-reference परकासित वाक्य 16:4
Powari Standard Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.