हिटनो 6

1तबा यहोवा ना मोसे लक कह्यो, जोन बरताव मी फराओ का संग करहीन अबा तु वोला चोवजोस, उ मोरी मोठो ताकत को कारन आपरो देस लक मोरो लोगगिन ला मजबूर होय के हेड़ देहेत।

मोसे को हाकलनो

2परमेस्वर न मोसे ला सांगीस, मी पिरभु सेउ 3मीना अबराहम, इसहाक अना याकूब ला लगत सर्वसक्तीमान परमेस्वर को रूप मा दरसन देइस होतो पर मीना अपरो नाव पिरभु उन पर पिरगट नही करियो होतो।1 4मीना उनको पक्को करार करयो सेऊ, का मी उनला कनान देस देहीन, जहान वय परदेसी होयके रव्हासेत। 5मीना इसरायली गीनको दुख आयकी सेउ जोन न मिसर देस को रव्हन वारा न गुलाम बनायके राखीसेस अना मोला आपरो करार हेत आयोसे। 6एकोलाय इसरायल के लोगगिन लक कह्यो, “मी यहोवा सेउ, अना मी तुमला मिसरीगिन को सेवा को बोझा लक आजाद करूँ, अना तुमला उनको गुलामी लक सुड़ाहूँ, अना आपरी बगरयो हुयो भुजा अना नियाव को महान कामगिन को लक तुमला आजाद करूँ। 7मी तुमला आपरी परजा बनाहूँ, अना मी तुम्हरो परमेस्वर होहूँ। जबा मी तुमला मिसर कि गुलामी लक आजाद करूँ, तबा तुम्हि जान जाहो का मी च तुम्हारो परमेस्वर यहोवा सेऊ। 8जोन देस मी अबराहम इसहाक अना याकूब ला देवन को वादा कियो होतो वोना देसमा तुम्हिला आनू। अना वोको मा तुमरोच हक होहेत, मी परमेस्वर सेउ।” 9मोसे न इसरायली गीनला या आयकायो, पर उनना वोकी गोस्टी नही आयकयो काहेका उनको मन उनको कड़ो पन को गुलामी को काम लक टुट गयी होती।

10तबा पिरभू ना मोसे लक कह्यो, 11मिसर को राजा फरओ का जवर जाय, वोको लक कव्हजोस अपरो देस लक इसरायली गीनला जावन देव।

12पर मोसे न यहोवा पिरभु लक कह्यो चोव जबा इसरायली गीन न मोरी गोस्टी नही आयकीन तबा फराओ मी हक्कलावनो वारो मानूस को कसो मोरी गोस्टी आयकेत? 13मंग भी यहोवा पिरभु मोसे अना हारून लक बोलीस अना उनला हुकूम देइस का वय इसरायली गीन अना मिसर देस को राजा फरओ को जवर जाय अना इसरायली गीन ला मिसर देस लक बाहेर हेड़ के आने।

मोसे अना हारून को खानदान

14यो उनको सायनो गीन को खानदान को मुखिया से इसरायल को मोठो टुरा रूबेन को टुरा हनोक पल्लू, हेसरोन अना कम्मीर यो च रुबेन को गोत से। 15यो सीमोन को टुरा से यमूएल, यामीन, ओहद, याकीन, सोहर अना कनानी कि एक बायको लक पैदा टुरा साऊल यो च सिमोन को गोत से। 16आपरो-आपरो पीढ़ी को सूची मा यो लेवी को टुरा से गेसान कहात अना मरारी लेवी को जीवन एक सव सैतीस बरस होतीन।2 17यो गेसान को टुरा से लिबनी अना सिमी यो अपरो गोत को मुखिया होतो। 18यो कहात को टुरा से अमराम, यिसहार, हेबरोन अना ऊज्जीएल कहात को जीवन को कुल बरस एक सव तैंतीस होतयो। 19यो मरारी को टुरा से महली अना मूसी आपरी-आपरी पीढी को सूची मा यो च लेवी खानदान को गोत से।3

20अमराम न अपरी फुफी योकेबेद लक बिहा करीस वोना वोको लक हारून अना मोसे नाम को टुरा ला जलम देइस अमराम को जीवन का कुल बरस एक सव सैतीस होतीन। 21यो यिसहार को टुरा से कोरह, नेपेग अना जिकरी। 22यो ऊज्जीएल को टुरा से मीसाएल, एलसापन अना सितरी।

23हारून न अम्मीनादाब कि टूरी अना नहसोन कि बहिन एलीसेबा लक बिहा करीस वोना वोको लक नादाब, अबीहू एलआजर अना ईतामार नाम का टुरा ला पयदा करीस।4 24यो कोरह को टुरा से अस्सीर, एलकाना अना अबीआसप यो च कोरह खानदान को गोत से। 25हारून को टुरा एलआजर न पूटीएल कि टूरी लक बिहा करीस वोना पीनहास नामको टुरा ला पैदा करीस यो च आपरो-आपरो गोत गीन को सूची मा लेवी खानदान का सायना गीन को परिवार को मुखिया से।

26यो च मोसे अना हारून से जिनला यहोवा पिरभु न हुकूम देइस इसराइल गीन ला दल-बल सहित मिसर देस लक बाहेर हिट जावो। 27मोसे अना हारून ना च मिसर देस को राजा फरओ लक गोस्टी करीन उनना वोला कहीन का, इसराइली लोख ला मीसर लक जावन देय।

मोसे अना हारून ला परमेस्वर को हुकुम

28जबा यहोवा न मिसर देस मा मोसे लक यो गोस्टी कह्यो। 29मी त यहोवा परमेस्वर सेऊ एको लाई जोन काहि मी मोसे लक कव्हासेउ उ सप्पा मिसर को राजा फिरौन लक कव्हजोस।

30पर मोसे न यहोवा ला जवाब देइस मी त बिगर खतना को ओंठ वारो हक्कलावनो वालो मानूस सेउ। फराओ मोरो गोस्टि नही आयकेत।