हिटनो 5

फिरोन राजा को समोर मोसे अना हारुन

1एको मघा मोसे अना हारून ना जायके फिरोन राजा लक कह्यो “इसरायल को परमेस्वर यहोवा असो कव्हासे मोरो लोगगीन ला जावन दे, का वय जगंल मा मोरो लाय तिहार मानहेत।”

2फिरौन न कह्यो यहोवा कोन से का मी वोको बचन मानके इसरायली गीनला जावन देहीन? मी यहोवा ला नही जानासू अना मी इसरायली गीनला नही जावन देहू।

3उनना कहिन “इबरी गीन को परमेस्वर न हमरो लक भेट करिसेस, एकोलाय अमीला जंगल मा तीन दिवस को रस्ता पर जावन देव, का अपरो परमेस्वर यहोवा को लाय बलिदान करबीन, असो न होय का उ हमरो मा मरही फैलाए या तलवार चलाहे।”

4मिसर को राजा ना उनको लक कह्यो, “अरे मोसे, अरे हारून! तुमी कायलाय लोकगीन लक काम सुड़वानो चाव्हा सेव? तुमी जायके अपरो-अपरो बोझा उठाव।” 5अना फिरौन ना कह्यो, “आयको! यो देस मा वय लोक बेझा भयी गयो सेत। मंग तुम्ही उनला बोझा लक अराम दिलवानो चाव्हासेव।”

6फिरौन न वोच दिवस महेनत करन वारा गीनको वरता जोन अधिकारी होतीन उनला हुकूम दियो, 7“तुमी जोन अबा तकन ईटा बनावन को लाई लोकगीन ला कुटार देवत होतो, वा अबा देवनो बंद करो, वय आपच आपरो लाय कुटार आनहेत।” 8तोभी जेतरी ईटा अबा तकन उनला बनावनो पड़त होतो वोतरो च अबा भी बनावनो पड़ेत, ईटा की गिनती काही भी कम नही होवनो पाहिजे । काहेकि वय अलाल भयी गयो सेत, एनाच कारन असो सांगके चिल्लावासेत, का अमी जायके आपरो परमेस्वर को लाई बलिदान करबीन। 9वय मानूस गीन लक अखिन कड़ो सेवा करायो जाय का वय एको लक महेनत करहेत, अना खोटो गोस्टी मा धियान नही देहेत।

10तबा बेगार करवान वालो मेट गीनना राज महेल लक हीट के उनलक सांगीन का राजा असो कह्यो से, मी तुम्हीला कूटार नही देहीन। 11तुमी च जायके इता उता लक कुटार जमा करके आनो, अना जितरो काम रोज करासो वोमा काही कमी नही होनो पाहिजे। 12एकोलाय वय लोक सबरी मिसर देस मा बगर के कूटार को बदला सड़ा आनीन। 13बिगार करवान वालो मानूस असो कव्हत होतीन का काम ला गदने निपटाव, काहेका कुटार आनन को बाद तुम्ही ला दिवस भरमा उतरोच काम करनो से। 14अना इसरायली गीनको जोन मेट होतीन, जोनला राजा ला काम करनवारो गीनको हिसाब देवनो होतो, उनको पिटाई करके उन लक पुसयो गयो, “काजक कारन से का काल को बराबूर अज ईटा गीनती पुरो नही भयो?”

15तबा इसराइली गीनको मेटगीन जायके फिरौन लक दोहाई देयके सांगीन, तू आपरो दास गीनको संग असो बरताव कायलाय करासेत? 16तोरो सेवक गीनला कूटार ता नही भेटत मंग आमरो लक कह्यो जावासेत का ईटा बनाव,अना तोरो सेवक गीनको पिटाई भी भयो सेत। पर एमा तोरो लोगगीन को सेवक गीनको भी जुम्मेदारी से।

17फिरौन ना जवाब दियो तुम्ही सबरी को सबरी अलाल सेव एकोलाय तुम्ही सांगासेव का अमीला परमेस्वर को लाय बली चघान जावन देव। 18अबा जायके आपरो सेवा काम करो अना कूटार तुमला नही दियो जाहे पर ईटा गीन की गीनती पूरी करनी पड़ेहे।

19जबा इसरायली गीन को मेटगीन न यो गोस्टी आइकीन उनकी ईटा की गीनती कम नही होवनो पाहिजे, अना हरेक दिवस वोतरोच काम पुरो करनो पड़ेहेत, तबा वय जान गईन का उनको मुसीबत का दिवस आय गयो से।

20जबा वय फिरौन को समोर लक बाहेर हिट गयीन तबा मोसे अना हारून जोन वोको लक भेट करनो को लाई उभा होतीन उनला मिलेह; 21अखिन उनना मोसे अना हारुन लक कह्यो यहोवा तुमरो पर नजर करके न्याय करेत काहेकी तुमी न अमीला फिरौन अना वोका नवकर चाकर गीन की नजर मा गलत ठहराके अमीला घात करन को लाई उनको हात मा तलवार दे दियो सेस।

परमेस्वर लक मोसे को सिकायत

22तबा मोसे न यहोवा को जवर लवटके कह्यो अरे पिरभू तु न एना जनता को संग असी बुराई कायलाई करीस? अना तुना मोला कायलाई धाडिसेस? 23जबा लक मी तोरो नाव लक फिरौन को जवर गोस्टी करनो को लाई गयो तबा लक वोना एना लोगगिन को संग बुरो बरताव करिसेस अना तुना अपरी जनता को लाय काही भी सुटकारा नही करयो सेस।