हिटनो 4

परमेस्वर ना मोसे ला अद्भूत चमत्कारी ताकत देईस

1तबा मोसे ना जवाब देइस वय मोरो बिस्वास नही करेत, अना मोरी नही आयकेत। पर वय मोला कहेत यहोवा पीरभू ना तोला दरसन नही देइस।

2यहोवा न वोको लक कह्यो, तोरो हात मा वा का से?

वोना जवाब दियो “लठिया”

3वोना कह्यो वोला भुई मा डाकदेव! मोसे ना लठिया ला भुई मा डाकिस तबा उ सरप बन गई। अना मोसे वोको समोर लक हट गयो। 4तबा यहोवा ना मोसे लक कह्यो, “हात बढायके वोकि पुसटी धरले जोनलक वय लोक बिस्वास करेत का तोरो आजा बाबा गिनको पिरभू मजे अबराहम, इसहाक, अना याकूब को पिरभू यहोवा न तोला दरसन दियो से।” 5तब परमेस्वर ना कह्यो, “अपरी लठीया को असोच परकार परयोग करो अखीन लोख भरोसा करहेत का तुम्हिना यहोवा मजे आपरो आजा-बाबा को परमेस्वर, अबराहम को परमेस्वर, इसहाक को परमेस्वर अना याकूब को परमेस्वर ला चोयो से।”

6मंग यहोवा पीरभू ना वोको लक यो भी कह्यो, आपरो हात छाती पर राख अखीन वोना आपरो हात छाती पर राखके झाक लेइस, मंग जबा वोला हेड़िस तबा चोवयो का वोको हात कोढ़ को कारन पांढरो भय गयो से। 7तबा वोना कह्यो, “आपरो हात छाती मा राखके झाक ले, जबा वोना वोको छाती पर लक हेड़िस, तबा का चोवासे का उ मंग सबरी देह को जसो भय गयो।” 8तबा यहोवा परमेस्वर न कह्यो, अदी वय तोरी गोस्टी मा कोनी भरोसा नही करहेत, अना पहेलो निसान ला नही मानहेत, ता दुसरो हिदान को बिस्वास करेहेत। 9अदि वय एना दूई हिदान गीनको बिस्वास नही करहेत, अना तोरी गोस्टि ला नही मानहेत। तबा तु नील नदी को पानी लेयके वोला सुक्को जमीन मा डाकजोस, तबा उ पानी खून बन जाहेत।

10मोसे न परमेस्वर लक कह्यो, अरे मोरो पिरभु मोरो जुबान अटकासेत, अना टोन्ड लक साजरो लक बोलनो नही आवासेत, अना तू आपरो दास लक गोस्टी करासेत ता जुबान लड़खड़ावा सेत।

11यहोवा ना वोको लक कह्यो, “मानूस को टोन्ड कोन ना बनाई सेस? अना मानूस ला मुको अना बहेरा या चोवन वालो, मोला यहोवा ला सोड़ कोन बनावसे। 12अबा जाय मी तोरो टोन्ड मा होयके जोन तोला कव्हनो से उ तोला सिकावतो जाहू।”

13मोसे ना कह्यो “अगो पिरभू किरपा कर के, तु कोनी ला धाड़।”

14तबा यहोवा को गुस्सा मोसे पर भड़क गयो अना गुस्सा मा मोसे ला कह्यो, “का तोरो भाउ लेवी कूल को हारून नहात? मोला साजरो लक मालूम सेत का उ बोलनो मा साजरो से। अना उ तोरो लक भेट करन आवासे,अना जब उ तोला चोहेत ता वोको मन मा खुसी होहे।” 15एकोलाय तु वोला गोस्टी सीकावजोस, मी वोको अना तोरो वानी मा रव्हीन। अना जोन काही तुमला करनो होहे उ तुमला सिकातो जाहू। 16उ तोरो कन लक गोस्टी करेहे उ तोरो लाई टोन्ड अना तु वोको लाई परमेस्वर ठैयरजोस। 17अना तु एना लठिया हात मा धरके जाव अना एको लक निसान अना चमत्कार दिसावने।

मोसे को मिसर देस मा लवटनो

18तबा मोसे आपरो सुसरो यितरो को जवर लवट गयो। अना वोना कह्यो, “मोला सार कर मी मिसर मा रव्हन वालो आपरो भाउगीन को जवर जायके चोऊ का वय अबा तकन जिन्दो से का नही।” यितरो ना कह्यो, साजरो लक जाय।

19अना यहोवा न मिदयान देस मा मोसे लक कह्यो मिसर ला वापिस लवट जाय काहेकि जोन मानूस तोरो पिरान लेवन वालो होतीन वय सबच मर गईन। 20तबा मोसे आपरी बायको अना टुरा गीन को गाढ़व मा चघा दियो। अना मिसर देस को कन परमेस्वर कि वोना लठिया ला हात मा लियो हुयो लवटयो।

21तबा यहोवा न मोसे लक कह्यो जबा तु मिसर मा पहुचेत तबा धियान रव्हे का जोन चमत्कार मीना तोरो वस मा कियो से, उन सबरी ला फिरौन ला चोवायजोस पर मी वोको मन ला हठ्ठी करुहू अना वय मोरो लोगगिन ला नही जावन देहे। 22अना तू फिरौन लक कव्हजोस यहोवा असो कव्हासे का इसरायल मोरो पहलो मोठो टुरा आय, 23अखिन मी जोन तोरो लक कह्यो सेऊ, का मोरो टुरा ला जावन देव, का उ मोरी सेवा करेहे अना तु ना अबा तकन वोला जावन नही दियोस एना कारन मी अबा तोरो टुरा अना तोरो मोठो टुरा ला मार डाखू।1

24तबा असो भयो का रस्ता मा सराय मा यहोवा न मोसे लक भेट करके वोला मार डाकनो चाह्यो। 25तबा सिप्पोरा न एक तेज चकमक गोटा लेके अपरो टुरा कि खलड़ी ला काप के खतना कर डाकी, अना मोसे को पाय गीनमा असो सांग के फेक देइस पक्को तु मोरो लाई खून बोहान वालो मोरो नवरा आस। 26तबा यहोवा न वोला सोड़ देइस वोना बेरा खतना को कारन वा बोली, तु खून वालो नवरा से।

27तबा यहोवा न हारून लक कह्यो “मोसे लक भेट करन जंगल मा जाय” उ गयो अना परमेस्वर को पहाड़ पर वोको लक मिलयो अना वोला चुमीस। 28तबा मोसे न हारून ला यो सांगीस का यहोवा न सबरी गोस्टी सांगके वोला धाड़िसेस अना कोन-कोन सा हिदान चोवान कि हुकूम वोला देइ सेस। 29तबा मोसे अना हारून ना जायके इसराइली गिनको सब बुजरूग गिन गीनला जमा करीन। 30अना जितरो गोस्टी यहोवा ना मोसे ला कह्यो होतो उ सबरी हारून ना उनला आयकायो, अना लोक हुन को समोर हिदान भी चोवायो। 31अना परमेस्वर ना उनको भरोसा करीन, अना यो आयक के का परमेस्वर ना इसराइली गिनको सूध लियो सेस,अना उनको दुख मा नजर घुमायो से, उनना भुई मा पड़के परनाम करीन।