हिटनो 3

परमेस्वर कन लक मोसे ला हाकलनो

1मोसे आपरो सुसरो यितरो मिदयान देस को याजक को मेढ़ा अना सेरी गीनला चरावत होतो। मोसे ना करप ला जगंल मा दिनबुड़ती कन होरेब नाव को पहाडी को जवर लेगयो जोन यहोवा को पहाड़ भी कहलावासे। 2अना यहोवा को दूत न एक झाड़ी को बीच इसतो की लव मा वोला दरसन दियो, अखिन वोना‍ नजर उचल के चोवयो कि झाड़ी मा स्तो पेटायो ता से पर वा भसम नही होय रहयो सेत। 3तबा मोसे न कह्यो, मी उता जायके एना मोठो अचरज चोऊ वा झाड़ी कायलाई नही भसम होवासे?

4जबा यहोवा ना चोवयो का मोसे मुरक के, चोवन लाय आवासे। तबा पिरभू ना झाड़ी को बीच लक वोला हाकलिस, “अरे मोसे, मोसे!”

मोसे ना कह्यो, हाँ मी यहान सेउ?

5वोना कह्यो, इता जवर नोको आवो, अना अपरो पाय लक पनही हेड़, काहेकि जोन जघा मा तू उभो सेस वा पवीतर जघा से। 6मंग वोना कह्यो, मी तोरो अजी को पिरभू, अना अबराहम, इसहाक अखीन याकूब को पीरभू सेऊ, तबा मोसे ना आपरो टोन्ड ला झाक लियो, काहे का परमेस्वर कन चोवन को लाय डरात होतो।

7मंग यहोवा न कह्यो मी पक्को आपरी जनता जोन मिसर मा सेत उनको दुख अना उनकी चिल्लाहट महेनत ला चोवयो सेऊ, अखिन उनको दुख पर मीना चित्त लगाई सेउ। 8एकोलाय अबा मी उतरके आइसेउ का उनला मिसरी गीन को हात लक हिसक के यो देस लक उनला हेड़ के एक साजरो मोठो देस मा जोनमा दुध सहेद कि धार बोहावासे अना कनानी, हित्ती, एमोरी, परिज्जी,हिब्बी,अना यबूसी लोकगीन को जघा मा लेके जाहीन। 9एकोलाय अबा आयक इसरायली गीन को दुख को पुकार मीना आयकयो अना मिसरी गीनको अतियाचार करनो भी मोला चोवासेस। 10एकोलाय आव, मी तोला फिरौन को जवर धाड़ासू, का तु मोरी इसराइली लोगहुन ला मिसर लक हेड़ के आनो।

11पर मोसे ना यहोवा पिरभू लक कह्यो, “मी कोन आऊ, जोन फिरौन को जवर जाहू अना इसरायली गीनला मिसर लक हेड़ के आनू?”

12वोना कह्यो पक्को, मी तोरो संग रहीन, मीना तोला धाड़यो सेउ, यो गोस्टी को यो निसान होहेत, जबा तु मोरो लोक हुनला मीसर देस लक हेड़ के आनजोस तबा तू योच पहाड़ मा आपरो यहोवा पिरभू को सेवा आराधना करजोस। 13मोसे ना पिरभू लक कहीस, मी जबा इसरायली गीनको जवर जायके उनको लक कहिन “का तुमरो आजा बाबा को पिरभू यहोवा ना मोला तुमरो जवर धाड़िसेस। तबा अदि वय मोरो लक पुसे वोको का नाव से? तबा मी उनला का सांगू ?”

14परमेस्वर न मोसे लक कह्यो, “मी जोन सेऊ, वोच सेऊ” योच मोरो नाव से, असो इसराइली गिनला उनला सांगजोस। अना वोचना मोला तुमरो जवर धाड़ीसेस।1 15मंग परमेस्वर न मोसे लक यो भी कह्यो तु इसरायली गीन लक असो कव्हना तुमरो आजा बाबा गीन को पिरभू अना अबराहम, इसहाक अना याकूब को पिरभू यहोवा परमेस्वर, वोनच मोला तोरो जवर धाडिसेस। अना पीढ़ी-पीढ़ी मा मोरो योच नाव लक हेत करेत। 16एकोलाय अबा जायके इसरायली गीन सियानो गीनला जमा करके, उनको लक कव्हजोस तुमरो आजा बाबा अबराहम, इसहाक, अना याकूब को पिरभू यहोवा परमेस्वर न मोला दरसन देके यो कहिसेस, का मीना तुमरो पर अना जोन बरताव मिसर देस मा तुमरो पर होवासे वोको मी सूध लेयी सेऊ। 17अना मीना ठान लियो सेउ का तुमला मिसर को दुख मा लक हेड़के कनानी, हित्ती, एमोरी, परिज्जी, हिब्बी, अना यबूसी लोक गीन को देस मा लिजाहिन जोनमा दुध अना सहेद को धार बोहासे।

18तबा वय तोरी मानेत अना तु इसरायली सियानो गीनला संग धरके मिसर को राजा को जवर जायके वोको लक असो कव्हने इबरी गीनको पीरभू यहोवा लक आमरो मुलाकात भयो से एकोलाय अबा अमीला तीन दिवस बनोबास जंगल कि रस्ता मा जावन दे का अमी अपरो पीरभू यहोवा को लाय बलिदान चघाबीन। 19मी जाना सेउ का मिसर को राजा तुमला नही जावन देहेत, बल्कि मोठो ताकत लक दबावनो पर भी नही जावन देहेत। 20लेकिन मी आपरो ताकत ला बवजू अना मीसर मा भयानक काम करके वोला सजा देहुँ। वोको बादमा वा तुम्हिला जावन देहेत।

21तबा मी आपरो एना जनता पर मीसर को लोक हूनला दयालू करहीन। अना तबा तुम्ही जावने ता वय रिकामो हात नही जावन देहेत।2 22वोना बेरा तुमरी हरेक बायको आपरी-आपरी सेजारनी अना उनको घर मा रव्हन वारी लक सोन्नो-खुरो गहना अना कपरा मांग लेहेत, अना तुमी वय कपरा अपरा टुरा अना टूरी गीनला पेहरावना एना तरीका लक तुमी मिसरी गीनला लुटने।