हिटनो 2

मोसे को जलम

1लेवी को घराना को एक मानूस ना एक लेवी को खानदान कि एक बायका लक लगन कर लियो। 2वा बायको पोट लक भई अना वोको लक एक टूरा जलम लियो, यो चोवके ना का टुरा लगत कफसुरत से, ता वोला तीन महिना तकन लुका के राखिस।1 3जबा वा वोला नही लुकाय सकी, तबा वोको लाई घागर काड़ी की टोपली लेके वोको पर चिकनी डामर अना राल लगाई, अखिन वोमा टुरा ला राखके नील नद्दी को किनार मा पडार को बीच मा राख देयीस। 4वोना टुरा कि बहिन दुहूर उभी रही, अना चोवतो रही का वोको कसो दसा होहेत?

5तबा फिरौन की टूरी आंग धोवन काजी नद्दी को कगर मा गयी। वोकि सखी नद्दी को कगर-कगर हिड़न लगी। तबा वोना पडार को बीचमा टोपली ला चोयके आपरी दासी ला आनन लाई धाड़िस। 6जबा वोना वोला उघाड़के चोवीस का एक रोवतो हुयो लेकरा से, तबा वोला दया आई अना वोना कह्यो, यो त कोनी इबरी को टुरा आय।

7तबा टुरा कि बहिन न फिरौन कि टूरी लक कह्यो, का मी जायके इबरी आई-माई गीन मा लक, कोनी धाई ला तोरो जवर बुलाय के आनू? जोन तोरो लाई यो टुरा ला दूध पीवाहे।

8फिरौन कि टूरी ना कहीस “जाय! तबा टूरी जायके टुरा कि माय ला बुलायके आनीस। 9फिरौन कि टूरी न वोको लक कह्यो,तु ऐना टुरा ला लीजाय के मोरो लाई दूध पीवा, अखिन मी तोला बनी देहू।” तबा वा बायको टुरा ला लीजाय के दूध पीवान लगी। 10जबा टुरा जरासो मोठो भयो तबा वा वोला फिरौन कि टूरी को जवर ले गयिस अना उ वोको टुरा ठहरायो अखिन वोना असो कहेके वोको नाव मोसे राखीस, मीना एला पानी लक हेड़ीसेऊ।

मूसा को मिद्यान देश परायनो

11असो भयो का जबा मोसे जुवान भयो अना बाहेर आपरो भाउ अना खानदान को जवर जायके उनको दुख पर नजर करीस। वोना चोवयो का एक मिसरी मानूस वोको इबरी भाउ ला मार रहयो से।2 12वोना इता-उता चोवीस का कोनी नहात त वोना मिसरी ला मार डाखिस अना बारु मा लुकाय देइस। 13मंग दुसरो दिवस बाहेर जायके वोना चोवयो का दुही इबरी मरदमाना आपस मा झगड़ा-राड़ कर रहयो सेत वोना अपरादी लक कह्यो “तु आपरो भाउ ला कायलाई मारासे?”

14तबा वोना कह्यो “कोन ना तोला आमरो पर मुखिया अना फैसला करन वारो ठहरायो सेस? का तुना जसो मिसर को रव्हनवारो ला मार डाकयो सेत वसोच मोला भी मारनो चाव्हासेस?” तबा मोसे यो सोचके डर गयो पक्को पोल खुल गयो सेत।3 15जबा फिरौन न या गोस्टी आयकीस, तबा मोसे ला मारन की जुकती करीस। तबा मोसे फिरौन को समोर लक परायो, अना मिदयान देस मा जायके रव्हन लगयो, अना उ वहान एक बेहेर को जवर जाय के बस गयो। 16मिदयान देस को याजक कि सात टूरी होतीन। अना वय वहान आयके पानी भरन लगीन का कोटना मा भरके आपरो बाप कि मेढ़ा अना सेरी गीनला पानी पिवाबीन। 17तबा चरानवालो आयके उनला हटावन लगयो, एको पर मोसे ना उभो होयके उनकी मदद करीस, अना सेरी-मेंढी गीनला पानी पिवाइस। 18जबा वय आपरो बाप रुएल को जवर लौटीन तबा वोना उनको लक पुसीस, “का कारन से कि आज तुमी एतरो जल्दी लौटके आईसेव?”

19उनना कहीन,“एक मिसरी मरद ना अमीला चरानवालो गीनको हात लक सोड़ायो सेस अना आमरो लाय लगत पानी भरके मेढ़ा-सेरी गीनला पिवाईस।”

20तबा वोना अपरी टूरी गीन लक कह्यो उ मरद कहान से? तुमी वोला काई लाई सोड़के आईसेव? वोला बुलायके आनो का उ जेवन करहेत।

21“अना मोसे वोना मरद को संग रव्हन लाई तैय्यार भयो। वोना वोकी अपरी टूरी सिप्पोरा को बिहा कर देइस। 22वोको लक टुरा भयो तबा मोसे ना असो कह्यो मी दूसर देस मा परदेसी सेऊ”, वोको नाव गेरसोम राखीस।

23लगत दिवस को बीतन पर मिसर को राजा मर गयो। इसरायली लोक कड़ो सेवा को कारन कुन्हान लगीन। एकोलाय सायता को लाय चिल्लान लगीन, तबा बिगार को कारन उनको अरज यहोवा तकन पहोचयो। 24तबा यहोवा ना उनको रोवनो चिल्लानो आयक के जोन करार वोना अबराहम, इसहाक अना याकूब लक कियो होतो हेत करयो।4 25अना यहोवा ना इसरायली गीन पर नजर घुमाय के उन पर आपरो मन लगायो।