हिटनो 1

मिसर देस मा इसरायलीगिन पर अत्याचार

1इसरायल मजे याकूब को संगा मिसर देस मा वोको टुरागिन जोन आपरो घराना समेत आयो होतिन उनको नाव को सूची असो परकार से। 2रूबेन, सीमोन, लेवी, यहूदा, 3इस्साकार, जबूलून, बिन्यामीन, 4दान, नप्ताली, गाद, अखिन आसेर 5यूसूफ तो पयले लक मिसर देस मा आ गयो होतो। याकूब को खानदान मा जलम लियो सब सत्तर जन होतिन। 6यूसूफ अना वोको सब भाऊहुन अना वोना खानदान को सब लोकगीन मर गईन। 7पर इसरायल को सन्तान फरन-फूलन लगीन अना वय लगत ताकत वर भइ गइन, अना सारो देस उनलक भर गयो।1

8मिसर देस मा एक नवतो राजा भयो। जोन यूसूफ ला नही जानत होतो। 9वोना आपरो परजा गिनला कह्यो “चोवो इसरायलीगिन आमरो लक गिनती मा लगत सेत अना वय लगत ताकतवर सेत अना आमरो लाय खतरा सेत।2 10एकोलाय आव, अमी उन लक कूरता को बरताव करबोन, कदी असो नोको भयी जाय का लड़आई को बेरा वय दुस्मन गीन को संग भयी जाय अना लड़ के देस लक अमीला पराय देये। ।”3 11एकोलाय उनना उनको पर बिगार करान वारा ठैयराइन का उनको लक जबराइन काम करा के उनला दुख देये, अना उनना राजा फिरोन को लाय पितोम अना रामसेस नाव को गुदाम वारा नगर बनायो। 12पर जेतरो उनला परताड़ित कियो गयो अना वय उनला दुख देवत होतिन, वसोच-वसोच वय बढ़न अना बगरन लगीन एकोलाय वय इसरायली गिन लक गजब डर गइन। 13तोभी मिसरी गीनना इसरायल गीन लक कड़ो महेनत लक गुलामी करवाइन। 14अना उनको जिन्दगी ला ईटा गारा अखिन खेती को काम, किसम-किसम को काम, कड़ो सेवा लक दुखी कर डाकिन। जोन कोनी काम मा वय उनको लक सेवा करवासेत, वोको मा कड़ाई लक बरताव करासेत।

15“सिपरा अना पूआ नाव को दोन इबरी सूईन गीनला मीसर को राजा न हुकूम देइस। 16जबा तुमी इबरी बायको गीनला लेकरा पैदा होवन को बेरा गोटा पर बसी चोवने तबा अदि टुरा होहेत ता मार डाकने अना टूरी होहेत ता जिन्दी रव्हन देवनो। 17पर वय सूईन परमेस्वर को भेव मानत होतीन एकोलाय मिसर को राजा की हुकूम नही मानीन, टुरा गीनला भी जिन्दो सोड़ देत होतीन। 18तबा मिसर देस को राजा न उनला हाकलके पुसीस,तुमी जोन टुरा गीनला जिन्दो काहे सोड़ देवासेव असो कायलाई करासेव?”

19सूईन गीनना फिरौन ला जवाब देइन,इबरी आई-माई गीन मिसरी आई-माई को जसो नहात, वय असी फुरती वारी से का सूईन गीनको आवन लक पहेले उनला टुरा पैदा होय जावासेत। 20एकोलाइ परमेस्वर ना सूईन गीनको संग भलाई करीस, अना वय लोक बढ़के लगत ताकतवर भय गइन। 21काहेका सूईन गीन परमेस्वर को भेव मानत होतिन, एकोलाय परमेस्वर ना उनको संगा भलाई कियो अना उनको परिवार बसाइस,। 22तबा फिरौन ना आपरी सबरी लोक गीनला हुकूम देइस, इबरी गीनको जेतरा टुरा पैदा होहेत, उन सबला तुमी नील नदी मा डाक देवने अना सबच टूरी गीनला जिन्दो रव्हन देवने। 4