Zabuli

Shitabu sha

Zabuli

ULONGULERU

Shitabu sha Zabuli ndo mjojoniru gwa nyimbu na maluwa. Muluga ya Shiebrania shisoweru Zabuli shana mana “Lwimbu lwa zyuma.” Zabuli zivuwa zimema yimbu zya kumzyuma Mlungu, kumbiti kwana ayi na zimonga za Zabuli, zimonga ziyowelera maluwa ga utanga kwa Mlungu zimonga zya madaya zyazitakulira hinginika nkulu. Kwana yimbu zya kumzyuma mfalumi gwa Israeli, zimonga zitenderwa kuwafunda wantu luhala na mafiru ga Mlungu na gamonga. Shitabu sha Zabuli shilebwa na wantu gwekagweka na shijojonilitwi kwa muvinja nentu ya miya yimu. Zabuli zimonga zilembitwi makashu shaka sha mfalumi Daudi. Bibilia itakula yomberi ndo yakalembiti Zaburi zivuwa. Na wamonga walemba pa Wayahudi kuwuya muumanda aku Babeli. Wabetula wamaniti handa upeleru wa majojoniru ga Zabuli ziweriti pakati pa kalini ya tatu mpaka ya msheshi pamberi pa kwiwuka kwa Kristu Yesu. Mpangiliwu gwa upeleru guweriti na walanga ya zaburi miya amusini, gweni gubagulitwi mala mhanu muvitabu vidikavidika.

Ziweri nyimbu ama maluwa Zabuli zoseri ndo muundu gwa shayili. Umani mdidini kuusu muundu gwa shayili wa Shiebrania hawutangi nentu kumana Zabuli. Shintu shamana mukulemba shayili ya Shiebrania shishemwa uteratera, walemba watula pamuhera misitali miwili mu Zabuli. Mfanu msitali gwa kwanja gulaviya matakulu na gwa pili gutola muwamu mwa msitali gumu gwa mitatu ayi, iwezekana paguwuyira liholu lilii lya kwanja, ama kuwuyira liholu lilaali kwa visoweru vimonga su kushishintila ama kutula liholu lyalisingana na mstali gwa kwanja, ama litakulira mstali gwa kwanja kwa lupalahera nentu.

Shitabu sha Zabuli ndo muwamu mwa shitabu shimanika na shitabu shashinemelerwa nentu Mubibiliya. Zabuli zivuwa ziweriti zitenderwa munguwira mu Numba Nkulu ya Mlungu aku Yerusalemu. Zabuli itufunda twenga ntambu ya kumluwa na kumzyuma Mlungu gwa kumpindi nentu. Zabuli ya ishilini na tatu ijega nyamaziya kwa wantu yawawera mukwinginika. Zabuli ya amusini na yimu itakulira kuleka vidoda. Zabuli miya na lilongu ijega nyamaziya ya moyu na matumbiru kwa kubwera kwiza kwakuyi Masiya yanakaweri mfalumi na mtambika.

Yagawera amu mushitabu sha zabuli

Shitabu sha kwanja sha Zabuli ndo kwanjira shipandi sha 1-41

Shitabu sha pili sha Zabuli ndo kwanjira shipandi sha 42-72

Shitabu sha tatu sha Zabuli ndo kwanjira shipandi sha 73-89

Shitabu sha msheshi sha Zabuli ndo kwanjira shipandi sha 90-106

Shitabu sha mhanu sha Zabuli ndo kwanjira shipandi sha 107-150