Pengo Bible
ହିତପଦେସ 9
ଗିଆନ୍ ଆରି ନିର୍ବୁଦିୟା
ଗିଆନ୍ ଜାର୍ ଇଲ୍ ରଚ୍ଚାତ୍ନା, ହେୱାନ୍ ତା ସାତ୍ଗଟା ମୁଣ୍ଡାଙ୍ଗ୍ ରଚ୍ଚାନ୍ନା; ହେୱାନ୍ ଜାର୍ ପସୁସବୁ ଅସ୍ତାତ୍ନା; ହେୱାନ୍ ଜାର୍ ଅଙ୍ଗୁର୍ରାସ୍ ମେହାୟ୍ କିତାତ୍ନା; ହେୱାନ୍ ଜାର୍ ପାଟା ପା ଜାତୁନ୍ କିତାନ୍ନା । ହେୱାନ୍ ଜାର୍ ଆଡ଼ିୟାଣିକାଂ ପକ୍ତାତ୍ନା, ହେୱାନ୍ ଗାଡ଼୍ନି ଉଚା ବାହାତାଂ କୁକ୍ଚି ଇନାତ୍, ଇମ୍ଣାକାର୍ ଅବୁଜା, ହେୱାନ୍ ଇବେ ୱାଏନ୍; ଆରେ, ଇମ୍ଣାକାର୍ ବୁଦିହିଲାକାନ୍, ତାଙ୍ଗେଙ୍ଗ୍ ହେୱାନ୍ ଇନାନ୍, “ୱାଡ, ନା କାଦି ତିନାଟ୍ ଆରି ନା ମେହାୟ୍କିତି ଅଙ୍ଗୁର୍ରାସ୍ ଉଣାଟ୍ ।” ଏ ଅବୁଜା ମାନାୟାର୍, ବୁଦିହିଲାକାନ୍ ଲାହାଂ ପିସ୍ତି ଜିବୁନ୍ ରାକ୍ୟା କିୟାଟ୍; ଆରେ, ହାର୍ବାବ୍ନା ହାଜ଼଼ିତ ତାଙ୍ଗାଟ୍ । ଇନେନ୍ ହୁଞ୍ଜ୍ନାକାନିଂ ହିକ୍ୟା ହିନାନ୍, ହେୱାନ୍ ଆପେ ଲାଜୁ ଆନାନ୍, ଆରେ, ଇନେନ୍ ବାନ୍ୟାତିଂ କେତ୍ନାନ୍, ହେୱାନ୍ ନିଜେ ବଦ୍ଲାମ୍ ଆନାନ୍ । ହୁଞ୍ଜ୍ନାକାନିଂ କେତ୍ମାଟ୍, କିତିସ୍, ହେୱାନ୍ ମିଙ୍ଗେଙ୍ଗ୍ ଗିଣ୍ କିଦ୍ନାନ୍, ଗିଆନିଂ କେତାଟ୍, ହେବେ ହେୱାନ୍ ମିଙ୍ଗେଙ୍ଗ୍ ଜିଉନଦ୍ନାନ୍ । ଗିଆନ୍ନିଂ ହାର୍ଦି ହିକ୍ୟା ହିତିସ୍, ହେୱାନ୍ ଆରେ ଗିଆନି ଆନାନ୍, ଆରେ, ଦାର୍ମିରିଂ ହିକ୍ୟା ହିତିସ୍, ହେୱାନ୍ତି ବେସି ହିକ୍ୟା ବୁଦି ପାୟାନାନ୍ । ନିତ୍ରେମାପ୍ରୁତି ବିସ୍ରେତିଂ ପାଣ୍ଡ୍ରୁ ଆତିସ୍ ଗିୟାନ୍ତ ଆରାମ୍, ଆରେ, ଦାର୍ମିନିକାନ୍ ବିସ୍ରେ ଗିୟାନ୍ ଲାବ୍ କିତିସ୍ ହାର୍ ବିଚାର୍ ଆନାତ୍ । ଇନେକିଦେଂକି ନା ଦୁୱେର୍ ମିଦାଂ ଆଦିକ୍ ଦିନ୍ ବାଡା ଆନାତ୍, ଆରେ, ମି ଆଇଁସ୍ ବେସି ବାର୍ହୁ ବାଡାନାତ୍ । ଏପେଙ୍ଗ୍ ଗିୟାନି ଆତିସ୍, ଜାର୍ କାଜିଂ ଗିୟାନି ଆନାଦେର୍; ଜଦି ନିନ୍ଦା କିନାଦେର୍, ନିଜେ ହେଦାଂ ଡାଣ୍ଡ୍ ବଗି କିନାନ୍ । ଅଗିଆନି କଗ୍ଲେହିମ୍ଣା କଲ୍କଲ୍ ଇନାତ୍; ହେଦେଲ୍ ହାର୍ଦାକା ଆରି ଇନାକା ପୁନୁତ୍ । ହେଦେଲ୍ ଜାର୍ ଇଲ୍ନି ଦୁୱେର୍ ଲାଗାଂ ଆରି ଗାଡ଼୍ନି ଉଚାତ ଟାଟି ପାସ୍ତି କୁଚ୍ନାତ୍ । ହେୱାନ୍ ଲାଗେ ହିଜ଼଼ି ଜାର୍ ହାଜ଼଼ିତ ସଲକ୍ ହାନାକା ବିନେନିକାରିଂ କୁକ୍ଚି ଇନାନ୍, ଇନ୍ଦେଲ୍ ଅବୁଜା, ହେଦେଲ୍ ଇବେ ୱାଏନ୍ ବୁଦିହିଲ୍ୱି ମାନାୟାରିଂ ହେଦେଲ୍ ଇ କାତା ଇନାତ୍, ଚରି ଏଜ଼଼ୁଙ୍ଗ୍ ହୱାଦ୍ ଆରି ଡ଼଼ୁକ୍ଚି ତିନି ଆରାଣ୍ ବେସି ହୱାଦ୍ । ମତର୍ ହେ ମାନାୟ୍ ପୁନୁନ୍ ଜେ, ହାତି ମାନାୟାର୍ ହେବେ ମାନ୍ଗାନାର୍, ଆରେ, ହେୱାନ୍ତି କୁକ୍ୟାତାକାର୍ ପାତାଲ୍ନି ଡେଙ୍ଗା ବାହାତ ମାନାର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.