Pengo Bible
ହିତପଦେସ 8
ଗିଆନ୍ନି ଆରାଦାନା
ଗିଆନ୍ ଇନାକା କୁକୁତ୍ ? ବୁଦି ଇନାକା ଗାଜାକାଟ୍ କିଉତ୍ ? ହେୱାନ୍ ହାଜ଼଼ିକଚଣ୍ ଉଚାବାହା ମୁଣ୍ଡ୍ତ, ସବୁହାଜ଼଼ିନି ଡେଡ଼ା ବାହାତ ନିଲ୍ନାନ୍ । ହେୱାନ୍ ଗାଡ଼୍ଦୁୱେର୍ ଲାଗାଂ, ଗାଡ଼୍ନି ହଣି ବାହାତ ମାନ୍ଜି ଗାଜାକାଟ୍ତାଂ କୁକ୍ଚି ଇନାନ୍, ଏ ମାନାୟାର୍, ଆନ୍ ମିଙ୍ଗେଙ୍ଗ୍ କୁକ୍ତାନାଙ୍ଗା; ଆରେ, ମାନାୟ୍ ମାଜ଼଼ିର୍ କାଜିଂ ନା କାଟ୍ ମାନାତ୍ । ଏ ବୁଦିହିଲ୍ୱି ମାନାୟ୍, ଜାଗ୍ରତ୍ନି କାତା ବୁଜା ଆଡ; ଏ ମୁରୁକ୍ ମାନାୟ୍, ଏପେଙ୍ଗ୍ ବାବି ଚିନ୍ତା କିଜ଼ି କାତା ଆଡ । ୱେନାଟ୍, ଇନେକିଦେଂକି ଆନ୍ ହାର୍ଦି ବିସ୍ରେ ଇଞ୍ଜ୍ନାଙ୍ଗ୍; ଆନ୍ ୱେନ୍ଦୁଲ୍ ଜେସି ନ୍ୟାୟ୍ କାତା ଇଞ୍ଜ୍ନାଙ୍ଗ୍ । ଇନେକିଦେଂକି ନା ୱେଇ ହାତ୍ପା ଇନାତ୍, ଦୁସ୍ଟ ନା ୱେନ୍ଦୁଲ୍ନି ଗିଣ୍ନିକା ବିସ୍ରେ । ନା ୱେଇ ୱିଜ଼଼ୁ କାତା ଦାର୍ମିକାତା; ହେ ବିତ୍ରେ ଟେଡ଼଼ା କି ଉଲ୍ଟା ବେରଣ୍ କିଚି ଆକାୟ୍ । ଇନେନ୍ ହୁଦାର୍ ହେଦାଂ ବୁଜାନାନ୍, ହେଦାଂ କାଜିଂ ହେସବୁ ସହଜ୍; ଆରେ, ବିଦ୍ୟାପାୟାତି ମାନାୟାର୍ କାଜିଂ ହେଦାଂ ଟିକ୍ ଆନାତ୍ । ରୁପା ପିସ୍ତି ନା ହିକ୍ୟା ଆରି ବାଚିକିତି ହନା ପିସ୍ତି ଗିୟାନ୍ ଇଟାଟ୍ । ଇନେକିଦେଂକି ଗିୟାନ୍ ବେସିମଲ୍ନି କାଲ୍ ହାର୍ଦାକା ଆରି ୱିଜ଼଼ୁ ଜିନିସ୍ ହେଦାଂ ଲାହାଂ ସମାନ୍ ଆଦେଂ ଜଗ୍ ଆକାୟ୍ । ଆନ୍ ଗିୟାନ୍, ଜାଗ୍ରତ୍ତିଂ ଜାର୍ ମାନିବାହା କିତାଙ୍ଗ୍ନା, ଆରେ, ଗିଆନ୍ ଆରି ପ୍ୟାସ୍ ପାୟାତାଂନା । ନିତ୍ରେମାପ୍ରୁତି ବିସ୍ରେତିଂ ଆନ୍ ପାଣ୍ଡ୍ରାନାଂ, ବାନ୍ୟା କାଜିଂ ଗିଣ୍; ଆକାର୍, ଗରବ୍ ଆରି ବାନ୍ୟା ହାଜ଼଼ି ଆରି ଟାଡ୍ରି ୱେଇ ଆନ୍ ଗିଣ୍ କିନାଙ୍ଗ୍ । ହାର୍ଦି ଚିନ୍ତା ଆରି ଗିୟାନ୍ ନା ତାକେ ମାନାତ୍; ଆନ୍ ନେ ହାର୍ବାବ୍ନା; ନା ତାକେ ବାପୁ ମାନାତ୍ । ନା ହୁକେ ରାଜାର୍ ରାଜ୍ କିନାର୍ ଆରି ଅଦିକାରିର୍ ସତ୍ ବିଚାର୍ କିନାର୍ । ନା ହୁକେ ଆଦିକାରିର୍, ମୁଡ଼୍ଦାକାର୍ ଆରି ପୁର୍ତିନି ୱିଜ଼଼ାର୍ ବିଚାର୍କାରିୟାର୍ ସାସନ୍ କିନାର୍ । ଇମ୍ଣାକାର୍ ନାଙ୍ଗ୍ ଜିଉନଦ୍ନାର୍, ଆନ୍ ହେୱାରିଂ ଜିଉନନାଙ୍ଗ୍, ଆରେ ଇମ୍ଣାକାର୍ ଜାତୁନ୍ତାଂ ନାଙ୍ଗ୍ ଡେକ୍ତାନାର୍, ହେୱାର୍ ନାଙ୍ଗ୍ ପାୟାନାର୍ । ନା ତାକେ ଦନ୍ ଆରି ଗାଜା ପାଣ୍, ଆରେ, ବୁଡାୱି ସଂପତି ଆରି ଦାର୍ମି ମାନାତ୍ । ନା ପାଡ଼୍ ହନା, ଆଁ, ହାର୍ଦି ହନା ପିସ୍ତି ହାର୍ଦାକା; ଆରେ, ନା କମାନି ହାର୍ଦି ରୁପା ପିସ୍ତି ହାର୍ । ଆନ୍ ଦାର୍ମି ହାଜ଼଼ିତ, ବିଚାର୍ନି ହାଜ଼଼ି ବିତ୍ରେ ତାଙ୍ଗ୍ନାଙ୍ଗ୍, ଆରେ ଇମ୍ଣାକାର୍ ନାଙ୍ଗ୍ ଜିଉନଦ୍ନାର୍, ହେୱାରିଂ ୱିଜ଼଼ୁ ସଂପତିନି ଆଦିକାରି କିନାଙ୍ଗ୍ ଆରି ହେୱାର୍ତି ଟୁଣ୍ଡି ବାର୍ତି କିନାଙ୍ଗ୍; ନିତ୍ରେମାପ୍ରୁ ନିଜେ ହାନିତ ଆରାମ୍ତ, ହେୱାନ୍ତି କାମାୟ୍ସବୁ ଆଗେତାଂ ନାଙ୍ଗ୍ ରଚି କିଜ଼ି ମାଞ୍ଚାନ୍ । ଆଗେକାଡ଼୍ତାଂ ଇଚିସ୍ ଆଗେକାଡ଼୍ତାଂ କି ପୁର୍ତିନି ମୁଡ଼୍ରଚ୍ଚିତାଂ ଆଗେତାଂ ଆନ୍ ତିର୍ ମାନାଙ୍ଗା । ନାଗୁଡ଼ିଂ ସବୁ ହିଲ୍ୱି ସମୁତ, ଜାରାଣିଂ ହିଲ୍ୱି ସମୁତ ଆନ୍ ଜଲମ୍ ଆତାଙ୍ଗ୍ନା; ଆରେ, ମାଡ଼଼ିଙ୍ଗ୍ ଆରି ଟିକ୍ରାଙ୍ଗ୍ ରଚ୍ୟା ଆୱି ଆଗେ ଆନ୍ ଜଲମ୍ ଆତାଙ୍ଗ୍ନା; ହେ ସମୁତ ବୁଇଁ, କି ବାଟା, କି ଜଗତ୍ନି ଦୁଡ଼଼ିନି ଗୁଣ୍ଡା ହେୱାନ୍ ଉବ୍ଜାୟ୍ କିୱାଦାଂ ମାଚାନ୍ । ଇମ୍ଣି ସମୁତ ହେୱାନ୍ ଆକାସିଂ ରଚ୍ଚାନ୍, ହେ ସମୁତ ଆନ୍ ହେବେ ମାଚାଙ୍ଗ୍, ଇମ୍ଣି ସମୁତ ହେୱାନ୍ ଡେଙ୍ଗା ଜପି ହାମ୍ଦୁର୍ନି ହାନ୍ଦି ରଚ୍ଚାନ୍, ଆରେ ଜପ୍ଣି ଆକାସ୍ତିଂ ଡାଟ୍ କିତାନ୍ ଆରି ହାମ୍ଦୁର୍ ବଡ଼଼ାନାକାସବୁ ବେସି ଆତାତ୍; ଏଜ଼଼ୁଙ୍ଗ୍ସବୁ ଇନେସ୍ ହେୱାନ୍ତି ବଲ୍ ଉଡ଼଼ା ଆଦେଂ ଆଡୁତ୍, ଇଦାଂ କାଜିଂ ଇମ୍ଣି ସମୁତ ହେୱାନ୍ ହାମ୍ଦୁର୍ନି ହାନ୍ଦି ରଚ୍ଚାନ୍ ଆରି ଇମ୍ଣି ସମୁତ ଜଗତ୍ନି କୁନାଦି ଚିନ୍ କିତାନ୍; ହେ ସମୁତ ଆନ୍ ତା ଲାଗାଂ କାମ୍ଲିୟା ମାଚାଙ୍ଗ୍; ଆରେ, ଆନ୍ ଦିନ୍କେ ୱାରି ଆଜ଼଼ି ତା ମୁମ୍ଦ ନିତ୍ରେ ୱାରି କିତାଙ୍ଗ୍ । ଆରେ, ତା ପୁର୍ତିତ ୱାରି କିତାଙ୍ଗ୍ ଆରି ମାନାୟ୍ ମାଜ଼଼ିର୍ ଲାହାଂ ନା ୱାରି ମାଚାତ୍ । ଇଦାଂ କାଜିଂ ଏ ନା ମାଜ଼଼ିର୍, ନା ବଚନ୍ ୱେନାଟ୍, ଇନେକିଦେଂକି ଇମ୍ଣାକାର୍ ନା ହାଜ଼଼ି ଆହ୍ନାର୍, ହେୱାର୍ ଦନ୍ୟ । ହାର୍ଦି ହିକ୍ୟା ୱେନ୍ଜି ଗିଆନି ଆଡ; ଆରେ, ହେଦାଂ ପିହ୍ମାଟ୍ । ଇନେନ୍ ନା କାତା ୱେନାନ୍ ଆରି ନା ଦୁୱେର୍ ଲାଗାଂ ନିତ୍ରେ କାସି ମାନାନ୍, ନା ଦୁୱେର୍ ବାନ୍ଦା ଲାଗାଂ ଦାସ୍ତାନାନ୍, ହେ ମାନାୟ୍ ଦନ୍ୟ । ଇନେକିଦେଂକି ଇନେନ୍ ନାଙ୍ଗ୍ ପାୟା ଆଦ୍ନାନ୍, ହେୱାନ୍ ଜିବୁନ୍ ପାୟା ଆନାନ୍ ଆରି ନିତ୍ରେମାପ୍ରୁତି ୱାରିନି ଦୟା ପାୟା ଆନାନ୍ । ମତର୍ ଇନେନ୍ ନା ବିରୁଦ୍ତ ପାପ୍ କିନାନ୍, ହେୱାନ୍ ଜାର୍ ପାରାଣ୍ ନାସ୍ କିନାନ୍; ଇମ୍ଣି ୱିଜ଼଼ୁ ମାନାୟାର୍ ନାଙ୍ଗ୍ ଗିଣ୍ କିଦ୍ନାର୍, ହେୱାର୍ ହାକିତିଂ ମାନ୍ ଇନାର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.