Pengo Bible
ହିତପଦେସ 7
ଦାରିକ୍ତାଂ ଜାଗ୍ରତ୍
ଏ ନା ମାଜ଼଼ି, ନା କାତା ପାଲି କିୟାଟ୍ ଆରି ନା ବଲ୍ସବୁ ଜାର୍ ମାନ୍ତ ରୁଣ୍ଡାୟ୍ କିଜ଼଼ି ଇଟାଟ୍ । ନା ବଲ୍ସବୁ ପାଲି କିୟାଟ୍, ତେବେ ଏପେଙ୍ଗ୍ ବାଚାନାଦେର୍ ଆରି ଜାର୍ କାଣ୍କୁନି ପୁତ୍ଡ଼଼ା ଲାକେ ନା ବିଦି ରାକ୍ୟା କିୟାଟ୍ । ମି ୱିଜ଼଼ୁ ୱାଚ୍କାଂ ହେଦାଂ ଗାଚାଟ୍; ମି ୱାସ୍କିତ ହେଦାଂ ସବୁ ଲେକିକିଜ଼଼ି ଇଟାଟ୍ । ଗିୟାନ୍ତିଂ ଇନାଟ୍, ଏନେଙ୍ଗ୍ ନା ତଣ୍ଦେଲ୍, ଆରେ ହାର୍ବାବ୍ନାତିଂ ନିଜର୍ ଲକ୍ ଇଞ୍ଜି ଇନାଟ୍ । ହେବେ ହେୱାର୍ ଲକାର୍ଡକ୍ରିତାଂ, ଇଚିସ୍ ଚୁକ୍ଲି ଇନିତାଂ ବିନ୍କଗ୍ଲେତାଂ ମିଙ୍ଗେଙ୍ଗ୍ ରାକ୍ୟା କିଦ୍ନାତ୍ । ଆନ୍ ଜାର୍ ଇଲ୍ନି ଜାଡ଼଼ାଙ୍ଗ୍ ଜାଲି ପାର୍ଦା ତିଙ୍ଗ୍ ଇଟ୍କାଡ଼୍ କିଜ଼଼ି ମାଚାଙ୍ଗ୍; ହେବେ ଆନ୍ ହୁଡ଼୍ତାଂ, ଅଗିୟାନ୍ନିର୍ ବିତ୍ରେ ଆରି ଚିନ୍କିତାଂ ବେଣ୍ଡ୍ୟାର୍ ବିତ୍ରେ ରୱାନ୍ ବୁଦିହିଲାକାନ୍ ବେଣ୍ଡ୍ୟା ମାନାୟ୍ ଦାରିୟାଣି ଇଲ୍ କନା ଲାଗାଂ ଚିପାହାସ୍ଦିଂ ହିଜ଼଼ି ହାଲୁ ହାଲୁ ତା ଇଞ୍ଜ ହାନି ହାଜ଼଼ିତ ହାଚାତ୍ । ହେପାଦ୍ନା ୱେଡ଼଼ା ଆର୍ତି ସମୁ, ମିକା ହାରେସ୍ ଆଜ଼଼ିମାଚାତ୍, ମ୍ଡିସି ଆରି ମାଜ୍ଗା ଆନି ସମୁତ । ହେବେ ହୁଡ଼଼ାଟ୍, ରଞ୍ଜେଲ୍ କଗ୍ଲେ ତା ଲାହାଂ ବେଟ୍ଆତାତ୍, ହେଦେଲ୍ ଦାରିବେସ୍ତାଂ ହଲ୍ଜି ଆରି ୱାସ୍କିତ ଚାତୁର୍ । ହେଦେଲ୍ ବେସି ଟାଉରି ଆରି ମାନିକିୱାକା, ତା ପାନା ଜାର୍ ଇଞ୍ଜ ମାନ୍ଗୁତ୍ । ହେଦେଲ୍ ଇନା ଇନାୱାଡ଼଼ାଙ୍ଗ୍ ହାଡ଼଼ାକ୍ତ, ଇନେ ଇନାୱାଡ଼଼ାଙ୍ଗ୍ ଡେଡ଼଼ାତ ମାନ୍ଗାନାତ୍ ଆରି ୱିଜ଼଼ୁ କନାତ କାସି କୁଚ୍ଚି ମାନାତ୍ । ହେ କଗ୍ଲେ ତାଂ ଆସ୍ତି ଚୁମା ହିତାତ୍, ଆରେ ଲାଜାୱି ୱେଇଦାଂ ତାଙ୍ଗେଙ୍ଗ୍ ଇଚାତ୍ “ମଙ୍ଗଲ୍ନିକା ପୁଜା ନା ଲାଗାଂ ମାନାତ୍; ଆନ୍ ନେଞ୍ଜେଙ୍ଗ୍ ଜାର୍ତି ମାନ୍ସି ପୁରା କିତାଂନା । ଲାଗିଂ ନି ଲାହାଂ ମେହା ଆଦେଂ ବାର୍ତ ୱାତାଙ୍ଗ୍ ଆରି ଜାତୁନ୍ତ ନି ୱେଇ ଡେକ୍ତେଙ୍ଗ୍ ୱାତାଙ୍ଗ୍ନା, ଆରେ ନିଙ୍ଗ୍ ଗିଟାଆତ୍ତାଂ। ଆନ୍ ଗଦି ଆରି ମିସର୍ତାଂ ତାହିୱାତି ମେହାତି ବାନାକାଟି ନୁଲ୍ନି କୱାଣ୍ ହେନ୍ଦ୍ରା ଜାର୍ ପଲଙ୍କତ ପାସ୍ତାଙ୍ଗ୍ନା । ଆରେ, ଗାନ୍ଦାରାସ୍, ବାସ୍ନା ମାର୍ ଆରି ଦାରୁଚିନି ନା ପାସ୍ତାକା ହାର୍ବାସ୍ନା କିତାଙ୍ଗ୍ନା । ୱାଡ, ଆସେଙ୍ଗ୍ ନାଣାଙ୍ଗେତାଂ ମେହାନାସ୍ ଆରି ଜିଉତ ମେହାଜ଼ି ମାନାସ୍ । ଇନେକିଦେଂକି ଆଣ୍ଡ୍ରେନ୍ ଇଞ୍ଜ ହିଲୁନ୍, ହେୱାନ୍ ଦେହା ହାଚାନ୍ନା । ହେୱାନ୍ ମଣାବାର୍ତି ଟାକାଂ ରଚେ ଅତାନ୍ନା, ହେୱାନ୍ ପୁନି ସମୁତ ମାସ୍ଦି ୱାନାନ୍ ।” ଇଲାକେ ଗାଦା ହୱାଦ୍ ବେରଣ୍ ଇଞ୍ଜି ହେଦେଲ୍ ତା ମାନ୍ ଜେଲ୍ତାତ୍, ଅଟିତ ଚୁକ୍ଲିତ ତାଙ୍ଗେଙ୍ଗ୍ ଜେଲ୍ଜି ଅତାତ୍ । ଇନେସ୍ କଡି ହାଦେଙ୍ଗ୍ ହାନାତ୍ ଆରି ଇନେସ୍ ଗାଚ୍ୟାତି ମାନାୟ୍ ବୁଦିହିଲ୍ୱି ଦାଣ୍ଡ୍ ପାୟାଦେଂ ହାନାର୍, ହେଲାକେ ହେଦେଲ୍ ହେଦାପ୍ରେ ତା ପାଚେ ପାଚେ ହାଚାତ୍ । ଆରେ, ଇନେସ୍ ପଟିଂ ଡ଼଼ୁକାତିଂ ଜିବୁନ୍ ନାସ୍କିନାକା ପୁନ୍ୱାଦାଂ ହେବେ ଆର୍ଦେଂ ଦାପ୍ରେ ଉମ୍ନାତ୍, ହାରିହାରା ତା ତ୍ଡାକି ହେଲାକେ ଆମ୍ ହୁକେ ଏଚ୍ୟା ଆତାତ୍ । ଲାଗିଂ ଏ ନା ମାଜ଼଼ିର୍, ନା କାତା ୱେନାଟ୍ ଆରି ନା ୱେଇନି ବଚନ୍ତ ମାନ୍ଦିଆନ୍ କିୟାଟ୍ । ମି ମାନ୍ ତା ହାଜ଼଼ିତ ହାଲ୍ମେତ୍, ଏପେଙ୍ଗ୍ ହାଜ଼଼ିତ ବାଣାଜ଼଼ି ହାଲ୍ମାଟ୍ । ଇନେକିଦେଂକି ହେଦେଲ୍ ହେନିରିଂ ଚିତ୍ରାକାବ୍ରା କିତାତ୍ନା, ଆଁ, ତା ହାତି ଲକୁ ବେସିହେନି ଗାଣାକିୟା ଆଉତ୍। ତା ଇଲ୍ ପାତାଲ୍ତ ହାନି ହାଜ଼଼ି, ଇନାକାକି ହାକି ନିପ ଅଦ୍ନାତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.