Pengo Bible
ହିତପଦେସ 6
ଜାଗ୍ରତ୍ ଆନି କାତା
ଏ ନା ମାଜ଼଼ି, ଜଦି ଏନେଙ୍ଗ୍ ଜାର୍ ପାଡ଼୍ହାନିକାର୍ ଜାମ୍ଲି ଆତାୟ୍ନା, ଜଦି ଲକୁ କାଜିଂ ଦାଇ ଆଜ଼଼ି ମାନାୟ୍, ଲାଗିଂ ଏପେଙ୍ଗ୍ ଜାର୍ ୱେଇନି ବଚନ୍ବାର୍ତି ଡ଼଼ୁକା ଆତାତ୍ନା ଆରି ଜାର୍ ୱେଇନି କାତାତ ଆହ୍ୟା ଆତାତ୍ନା । ଏ ନା ମାଜ଼଼ି, ଏପେଙ୍ଗ୍ ନଙ୍ଗ୍ ଇ କାମାୟ୍ କିୟା, ଜାର୍ତିଂ ଉଦାର୍ କିୟା; ଇନେକିଦେଂକି ଏପେଙ୍ଗ୍ ଜାର୍ ବନ୍ଦୁନି କେଇଦ ଆତାୟ୍ନା; ହାଲା, ଜାର୍ତିଂ ହୁଦାର୍ କିଜ଼଼ି ନି ପାଡ଼୍ହାନିକାରିଂ ବାର୍ ବାର୍ ଗୱାରି କିୟା । ଏପେଙ୍ଗ୍ ଜାର୍ କାଣ୍କୁକାଂ ହୁଚ୍କାଣ୍କୁ ହିମା, କି ଜାର୍ କାଣ୍କୁନି ମେଟାତିଂ ଡୁଗ୍ଦେଂ ହିମା । ଜାର୍ତିଂ କଟ୍ରା ଲାକେ ବାଣ୍ୱେନ୍ କେଇଦାଂ, ପଟି ଲାକେ ଜାଲ୍ନି କେଇଦାଂ ଉଦାର୍ କିୟା । ଏ ନିସ୍ତାୟ୍, ଏନେଙ୍ଗ୍ ଦାର୍କୁ ଲାଗାଂ ହାଲା, ତା କାମାୟ୍ ବାବିକିୟାଟ୍ ଆରି ଗିଆନି ଆ । ତା ବିଚାର୍କାରିୟା ନଲେ ସାସନ୍କାରିୟା ନଲେ ଇନେର୍ ହିଲ୍ୱିତିସ୍ ପା ହେୱାଙ୍ଗ୍ କାରାମାସ୍ତ ଜାର୍ କାଦି ଜାଗ୍ରତ୍ କିନିକ୍, ଆରେ, ତାସ୍ ୱାଡ଼଼ାଲିଂ କାଦି ରୁଣ୍ଡାୟ୍ କିନିକ୍ । ଏ ନିସ୍ତାୟ୍, ଏପେଙ୍ଗ୍ ଏଚେକ୍ ଦିନ୍ ହୁଞ୍ଜି ମାନ୍ଗାନାଦେର୍? ଏନେଙ୍ଗ୍ ଏଚେକାଡ଼୍ଦ ହୁଚ୍କାଣ୍କୁ ରିଙ୍ଗ୍ଦିତିସ୍ ନିଙ୍ଗ୍ନାୟ୍ ? ଆରେ ଅଲପ୍ ହୁଞ୍ଜ୍ଚିସ୍, ଆରେ ଅଲପ୍ ଡୁଗ୍ତିସ୍, ଆରେ ଅଲପ୍ ହୁଞ୍ଜ୍ନି କାଜିଂ କେଇ ଡ୍ରିପ୍କାୟ୍ ଆତିସ୍, ମି କାକୁଲ୍ତିଅବସ୍ତା ଚରେନ୍ ଲାକେ, ଆରେ ମି କାକୁଲ୍ତିତ ରାକ୍ୟା କିନି ମାନାୟ୍ ଲାକେ ଏକାୱାନାତ୍ । ବାନ୍ୟା ମାନାୟ୍, ଦସି ମାନାୟ୍; ହେୱାନ୍ ନିତ୍ରେ ଟାଡ୍ରି ୱେଇ କିଜ଼଼ି ହାନାନ୍; ହେୱାନ୍ କାଣ୍କୁ ଇଡ଼୍ନାନ୍, ହେୱାନ୍ କାଲ୍ଦାଂ ତଗ୍ନାନ୍, ହେୱାନ୍ ୱାଚ୍କା ହୁକେ ଚଚ୍ନାନ୍; ତା ୱାସ୍କିତ ଟାଡ୍ରି ମାନାତ୍, ହେୱାନ୍ ନିତ୍ରେ କୁଟ୍ ଚିନ୍ତା କିନାନ୍: ହେୱାନ୍ ଜଗ୍ଡ଼଼ାନି ବିୟାନ୍ ୱିତ୍ନାନ୍ । ଲାଗିଂ ତା ବିପଦ୍ ତ୍ରିପ୍କୁ ଏକାୱାନାତ୍, ଆରେ, ହେୱାନ୍ ଉଦାର୍ ପାୟାନି କାଜିଂ ଇନାକାପା ଉପାୟ୍ ହିଲୁତ୍ । ଚଅଗଟା ବିସ୍ରେତିଂ ନିତ୍ରେମାପ୍ରୁ ଗିଣ୍ କିନାନ୍; ସାତ୍ଗଟା ବିସ୍ରେ ପା ହେୱାନ୍ତି ଗିଣ୍ଜଗ୍ । ଆକାର୍ ହୁଡ଼୍ନାକା, ମିଚ୍ଇନାକା ୱେନ୍ଦୁଲ୍ ଆରି ଦସ୍ହିଲ୍ୱାକାର୍ ଅହ୍ନାକା କେଇ; ନସ୍ଟକିନି ଚିନ୍ତା ୱାସ୍କି, ବାନ୍ୟା କାମାୟ୍ କିଦେଂ ବେଗି ହନ୍ନି କାଲ୍କୁ; ମିଚ୍ ସାକି ଇନେନ୍ ମିଚ୍ ଇନାନ୍ ଆରି ଇନେନ୍ ଟଣ୍ଡାର୍ ବିତ୍ରେ ଜଗ୍ଡ଼଼ାନି ବିୟାନ୍ ୱିତ୍ନାନ୍ ।
ଦାରି ବିସ୍ରେ ଜାଗ୍ରତ୍ କାତା
ଏ ନା ମାଜ଼଼ି, ଏନେଙ୍ଗ୍ ଜାର୍ ଆବାତି ଗିଆନ୍ ପାଲି କିୟା, ଆରେ, ଜାର୍ ଆୟାତି ହିକ୍ୟା ପିହ୍ମା । ତାଦାଂ ନିତ୍ରେ ମି ମାନ୍ତ ଗାଚ୍ଚି ଇଟା, ଜାର୍ ଗାଡେଲ୍ତ ଗାଚା । ଏପେଙ୍ଗ୍ ତାଙ୍ଗ୍ନି ୱାଡ଼଼ାଲିଂ ହେଦାଂ ମିଙ୍ଗେଙ୍ଗ୍ ହାଜ଼଼ି ଚଚ୍ଚାନାତ୍, ଆରେ ହୁଞ୍ଜିନି ୱେଡ଼଼ାଲିଂ ହେଦାଂ ମିଙ୍ଗ୍ କାତ୍ନାକା ଆଦ୍ନାନ୍; ଏପେଙ୍ଗ୍ ଚେତ୍ନାନି ୱେଡ଼଼ାଲିଂ ହେଦାଂ ମି ଲାହାଂ ଆଲାନାନ୍ । ଇନେକିଦେଂକି ହେ ବଲ୍ ବଇଟା; ଆରି ହେ ହିକ୍ୟା ଅଜଡ଼୍; ଆରି ହିକ୍ୟାନି କେତ୍ନାକା ଜିବୁନିଂ ହାଜ଼଼ି; ହେୱାନ୍ ମିଙ୍ଗ୍ ବାନ୍ୟା କଗ୍ଲେତାଂ ଆରି ଲକାର୍ଡକ୍ରି ୱେନ୍ଦୁଲ୍ ଚୁକ୍ଲିତାଂ ରକ୍ୟା କିନାତ୍ । ଏପେଙ୍ଗ୍ ୱାସ୍କିତ ତା ହଲ୍ନାକା ମାନ୍ତ କିମାଟ୍; କି ତାଙ୍ଗ୍ ମିଟ୍କା ଇଡ଼୍ଜି ଆସ୍ତେଙ୍ଗ୍ ତାଙ୍ଗେଙ୍ଗ୍ ହିମାଟ୍ । ଇନେକିଦେଂକି ଦାରୁଲି କାଜିଂ ଆରାଣ୍ ଅବାବ୍ ଗିଟାଆଦ୍ନାତ୍, ଆରେ ଦାରି କଗ୍ଲେ ମାନାୟ୍ତି ବେସିମଲ୍ ପାରାଣ୍ତିଂ ଆହ୍ନି କାଜିଂ ରାଞ୍ଜାୟ୍ କିନାତ୍ । ଇନେର୍ ଇନାୱାଡ଼଼ାଂ ଜାର୍ ନେଞ୍ଜେଡାକିତ ନାଣି ଇଟ୍ନାତ୍, ଲାଗିଂ ତା ହେନ୍ଦ୍ରା ଇନାକା କାଡ଼୍ଜି ହାଲୁତ୍? ନଲେ ଇନେର୍ ଇନାୱାଡ଼଼ାଂ ଆହ୍ନି ଗଡାଂ ଜପି ତାଙ୍ଗ୍ନାନ୍, ଲାଗିଂ ତା ପାନାତ ଇନାକା ପକା ଆଉତ୍? ଜାର୍ ପାଡ଼୍ହାନିକାର୍ କଗ୍ଲେତାକେ ଇମ୍ଣି ମାନାୟ୍ ହାନାନ୍, ହେୱାନ୍ ହେଲାକେ; ଇନେନ୍ ତାଙ୍ଗ୍ ଆସ୍ପାନାନ୍, ହେୱାନ୍ ଦସିଆନାନ୍ । ଚର୍ ନାସ୍କି ଆଜ଼଼ି ପାରାଣ୍ ରାକ୍ୟା ଜଦି ଚରି କିନାନ୍, ଲାଗିଂ ମାନାୟାର୍ ହେଦିଲିଂ ବେକାର୍ କିଉର୍ । ମତର୍ ହେୱାନ୍ ଦାରାପଡ଼଼ାତିସ୍, ତାଙ୍ଗ୍ ସାତ୍ ଗୁଣ୍ ଲେଉଟାୟ୍ କିୟାନାତ୍; ଜାର୍ ଇଲ୍ନି ୱିଜ଼଼ୁ ତାଙ୍ଗ୍ ହିଦେଂ ଲାଗ୍ଦାନାତ୍ । ରୱାନ୍ ଦାରୁଲା ଆଣ୍ଡ୍ରେନ୍ ବୁଦିହିଲ୍ୱାକାନ୍; ଇନେନ୍ ନିଜେ ପାରାଣ୍ ନାସ୍ କିନାନ୍, ହେୱାନ୍ ହେଦାଂ କିନାନ୍ । ହେୱାନ୍ ଗାଉଆତିସ୍ ଆରି ଅପ୍ମାନ୍ ପାୟାନାନ୍; ଆରେ, ତା ଦସ୍ ଇନାୱାଡ଼ାଂ ପା ଡ଼ୁଗୁତ୍ । ଇନେକିଦେଂକି କଗ୍ଲେ ବିସ୍ରେନି ପ୍ରୁଣ୍ଡ୍ନି ମାନାୟ୍ନି ବେସି ରିସା ବିସ୍ରେ; ରିସା ଆନି ୱାଡ଼଼ାଲିଂ ହେୱାନ୍ ଅଲପ୍ପା କେମା କିଦୁନ୍ । ହେୱାନ୍ ଇମ୍ଣାକାପା ବୁଲ୍ ୱେନୁନ୍; କି ଏପେଙ୍ଗ୍ ବେସି ଲାଞ୍ଚ୍ ହିତିସ୍ପା ହେୱାନ୍ ମାନି କିଉନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.