Pengo Bible
ହିତପଦେସ 5
ଦାରି ବିରୁଦ୍ତ ଜାଗ୍ରତ୍
ଏ ନା ମାଜ଼଼ି, ନା ଗିଆନ୍ତ ମାନ୍ ହିୟାଟ୍; ନା ବୁଦି କାଜିଂ ମି କିତୁଲ୍ ୱେନାଟ୍; ଇନେସ୍ ଏପେଙ୍ଗ୍ ପ୍ୟାସ୍ ରାକ୍ୟା କିଜ଼଼ି ଆଡ୍ନାଦେର୍ ଆରି ଇନେସ୍ ମି ୱେଇଦି ଗିୟାନ୍ନି କାତା ପାଲି କିଦେଂ ଆଡ୍ନାଦେର୍ । ଇନେକିଦେଂକି ଦାରିକଗ୍ଲେ ଅଟିତାଂ ଟୁପା ଟୁପା ହୱାଦ୍ କାତା ଇନାତ୍, ତାଦି ୱେଇ ଚିକାଣ୍ ପିସ୍ତି ବେସି ଚିକ୍ଣିୟା ଆନାତ୍ । ମାତର୍ ତାଦି ହାରିହାରା ନିୟାୟ୍ କେନି ମାର୍ନି ରାସ୍ ଲାକେ, ରିଦାରା କାଣ୍ଡା ଲାକେ ଦାରା । ତାଦି ପାନା ହାକି ନିପ ଜୁଜ଼଼ି ହାନାତ୍; ତା ପାନା ସିଦା ଦୁଗେର୍ତ ଆର୍ନାତ୍; ଲାଗିଂ ହେୱାନ୍ ଜିବୁନ୍ନି ସଲ୍କେ ହାଜ଼଼ି ଗାଟା ଆଉନ୍; ତା ହାଜ଼଼ିସବୁ ବିଲ୍କି, ଆରେ ହେୱାନ୍ ହେଦାଂ ପୁନୁନ୍ । ଇଦାଂକାଜିଂ ଏ ନା ମାଜ଼଼ିର୍, ନା କାତା ୱେନାଟ୍ ଆରି ନା ୱେଇଦି ବଚନ୍ତାଂ ପିହ୍ମାଟ୍ । ହେଦାଂ ହେ କଗ୍ଲେ ତାଂ ଜାର୍ ହାଜ଼଼ି ଦେହା ଇଟାଟ୍ ଆରି ତା ଇଲ୍ନି ଦୁୱେର୍ ଲାଗାଂ ହାଲ୍ମାଟ୍ । ଇନେସ୍କି ଏପେଙ୍ଗ୍ ବିନ୍ନିକାର୍ ଜାର୍ ଇଜତ୍ ପାୟାନାର୍ ଆରି ହୁଦାର୍ ମାନାୟ୍ତିଂ ଜାର୍ତି ଜିବୁନ୍ ହାନାତ୍; ଇନେସ୍କି ଜାଣାହିଲ୍ୱି ମାନାୟାର୍ ନି ବପୁତ ବାର୍ତି ଆନାର୍ ଆରି ନି କାମାୟ୍ନି ପାଡ଼୍ ବିଦେସିର୍ ଇଞ୍ଜ ଇଟ୍ୟା ଆନାତ୍; ଆରେ ଏପେଙ୍ଗ୍ ହାନି ଅବସ୍ତାତ ଏଚେକାଡ଼୍ଦ ଏପେଙ୍ଗ୍ ଜେଇ ଆରି ଗାଗାଡ଼୍ ନାଦାର୍ ଆନାତ୍, ଏପେଙ୍ଗ୍ ଇନେସ୍କି ଆଡ଼୍ବାନାଦେର୍, ଆରେ ଇନାଦେର୍, ଆନ୍ ହାର୍ଦି ହିକ୍ୟା ଇନେସ୍ ଗିଣ୍ କିନାଙ୍ଗ୍ ! ଆରେ, ନା ମାନ୍ କେତ୍ନାକା ଇନେସ୍ ବେକାର୍ କିତାନ୍ ! ଆନ୍ ଜାର୍ ମାସ୍ଟରାର୍ କାତା ମାନିକିୱାତାଂ ଆରି ଇମ୍ଣାକାର୍ ନାଙ୍ଗ୍ ହିକ୍ୟା ହିତ୍ତାର୍, ହେୱାର୍ତି ବଚନ୍ କାଜିଂ ଜାର୍ କିତୁଲ୍ ୱେନ୍ୱାତାଂ, ଆନ୍ କୁଟୁମ୍ ଆରି ମଣ୍ଡ୍ଲି ବିତ୍ରେ ଇଚିସ୍ ସବୁବାନି ଆବ୍ଡ଼଼ୁତ ପଡ଼଼ାତାଂ । ଏପେଙ୍ଗ୍ ଜାର୍ ଏଜ଼଼ୁଙ୍ଗ୍ତାଂ ଏଜ଼଼ୁଙ୍ଗ୍ ଉଣାଟ୍ ଆରି ଜାର୍ କୁଇତାଂ ଚୁରାଣ୍ ଏଜ଼଼ୁଙ୍ଗ୍ ଉଣାଟ୍ । ମି ଚୁରାଣ୍ ଇନାକା ବାର୍ତ ଏନେତେନେ ମେଙ୍ଗ୍ନିକ୍? ଆରି ରାଜାଦାଣ୍ଡ୍ତ ଇନାକା ଚୁରାଣ୍ ଏଜ଼଼ୁଙ୍ଗ୍ ହାନିକ୍ ? ହେଦାଂ କେବଲ୍ ମିଦାଂ ଆଏତ୍, ମି ଲାହାଂ ଜାଣାହିଲ୍ୱି ମାନାୟାର୍ତି ଆମେତ୍ । ମି ଚୁରାଣ୍ ଦନ୍ୟ ଆଏତ୍; ଆରେ, ଏନେଙ୍ଗ୍ ଜାର୍ ଦାଂଣାକାଡ଼୍ନି କଗ୍ଲେତାଂ ୱାରି କିୟାଟ୍ । ଜିଉନି କଟ୍ରା ଆରି ହଲ୍ନି ରାନ୍ତି ଅଡା ଲାକେ, ତା ମାୟ୍କୁତ ନିତ୍ରେ ମିଙ୍ଗେଙ୍ଗ୍ ସାରି କିଏତ୍; ଆରେ, ତା ଜିଉତ ଏପେଙ୍ଗ୍ ନିତ୍ରେ ଜେଲ୍ଆ ଆଡ । ଏ ନା ମାଜ଼଼ି, ବିନ୍ନିକାର୍ କଗ୍ଲେ ହୁଦାଂ ଏନେଙ୍ଗ୍ ଇନେକିଦେଂ ଜେଲ୍ଆ ଆନାୟ୍? ଆରି ବିନେନି କଗ୍ଲେ ଲାହାଙ୍ଗ୍ ହୁଞ୍ଜ୍ନାଦେର୍? ଇନେସ୍କି ମାନାୟ୍ନି ସବୁ ହାନାକା ନିତ୍ରେମାପ୍ରୁତି ହୁଡ଼୍ନିତ ଆନାତ୍ ଆରି ହେୱାନ୍ ତା ସବୁ ହାଜ଼଼ି ସମାନ୍ କିନାନ୍ । ଦୁସ୍ଟ ମାନାୟ୍ତି ଜାର୍ ଦସି ହେଦିଲିଂ ଆହ୍ନାତ୍, ହେୱାନ୍ ଜାର୍ ପାପ୍ବାର୍ତି ଡରିତ ଗାଚ୍ୟା ଆନାତ୍ । ହେୱାନ୍ ହାର୍ଦି ହିକ୍ୟା ଅବାବ୍ତ ହାନାନ୍ ଆରି ଜାର୍ ଅଗିୟାନ୍ତ ବାଡାନିତ ବୁଲ୍କା ଆନାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.