Pengo Bible
ହିତପଦେସ 4
ଗିଆନ୍ନି ଉପ୍କାର୍
ଏ ନା ମାଜ଼଼ିର୍, ଆବାତି ହିକ୍ୟା ୱେନାଟ୍ ଆରି ହାର୍ବାବିକିନାକା ଗିୟାନ୍ତ ମାନ୍ଦିଆନ୍ କିୟାଟ୍ । ଇନେକିଦେଂକି ଆନ୍ ମିଙ୍ଗେଙ୍ଗ୍ ହାର୍ଦି ହିକ୍ୟା ହିଦ୍ନାଙ୍ଗା, ନା ଆଦେସ୍ ପିହ୍ମାଟ୍ । ଆନ୍ ଜାର୍ ଆବାତି ମାଜ଼଼ି ମାଚାଙ୍ଗ୍, ଆରେ, ଆୟା କାଣ୍କୁକାଂ ରୱାଙ୍ଗ୍ ମତର୍ କ୍ଡଗେ ଲାଡ୍ରା ମାଚାଙ୍ଗ୍ । ଆବା ନାଙ୍ଗ୍ ହିକ୍ୟା ହିଜ଼଼ି ଇଞ୍ଚାନ୍, “ନି ମାନ୍ତ ନା କାତାସବୁ ଇଟା, ଆରେ ନା ବଲ୍ସବୁ ପାଲି କିୟା ହେବେ ଏନେଙ୍ଗ୍ ବାଚାନାୟ୍ ଗିୟାନ୍ ଆର୍ଜା ଆଡ, ହାର୍ବାବ୍ନା ଲାବ୍ କିୟାଟ୍, ହେଦାଂ ବାଣା ଆମାଟ୍; ଆରେ, ନା ୱେଇନି ବଚନ୍ତାଂ ବିନେ ଆମାଟ୍ । ହେଦାଂ ପିହ୍ମାଟ୍; ହେବେ ହେୱାନ୍ ନିଙ୍ଗେଙ୍ଗ୍ ପାଲି କିଦ୍ନାନ୍; ତାଙ୍ଗେଙ୍ଗ୍ ଜିଉନୱାଟ୍, ହେବେ ହେୱାନ୍ ନିଙ୍ଗେଙ୍ଗ୍ ରାକ୍ୟା କିଦ୍ନାନ୍ । ଗିଆନ୍ ସବୁତିଂ ଗାଜା ବିସ୍ରେ, ଲାଗିଂ ଗିୟାନ୍ ଲାବ୍ କିୟାଟ୍; ଆରେ, ମି ହାର୍ବାବ୍ନା ଲାବ୍ କିୟାଟ୍ । ତାଙ୍ଗେଙ୍ଗ୍ ୱାରି କିୟାଟ୍, ହେବେ ହେୱାନ୍ ମିଙ୍ଗେଙ୍ଗ୍ ଉନ୍ନତି କିଦ୍ନାନ୍; ତାଙ୍ଗେଙ୍ଗ୍ ପମ୍ତିସ୍, ହେୱାନ୍ ମିଙ୍ଗେଙ୍ଗ୍ ଜାଜ୍ମାଲ୍ କିଦ୍ନାନ୍ । ହେୱାନ୍ ମି କାପ୍ଡ଼଼ାତ ଦୟା ହାଜ ହିଦ୍ନାନ୍; ହେୱାନ୍ ମିଙ୍ଗେଙ୍ଗ୍ ହଲ୍ନି ମୁକୁଟ୍ ହିଦ୍ନାନ୍ ।” ଏ ନା ମାଜ଼଼ି, ୱେନା, ନା କାତା ମାନିକିୟା; ହେବେ ମି ଆଇଁସ୍ ବେସି ବାର୍ହୁ ଜିନାୟ୍ । ଆନ୍ ମିଙ୍ଗେଙ୍ଗ୍ ଗିୟାନ୍ନି ହାଜ଼଼ିତ ହିକ୍ୟା ହିଦ୍ନାଙ୍ଗା, ଆନ୍ ସଲକ୍ ହାଜ଼଼ିତ ମିଙ୍ଗେଙ୍ଗ୍ କାଡାୟ୍ କିଦ୍ନାଙ୍ଗା । ଏପେଙ୍ଗ୍ ହାନି ୱାଡ଼଼ାଲିଂ ମି ପାନାତ ବାଦା ୱାଉତ୍; ଆରେ, ହନ୍ନି ୱାଡ଼଼ାଲିଂ ଏପେଙ୍ଗ୍ ଉଜ଼଼ୁଦେର୍ । ହାର୍ଦି ହିକ୍ୟା ଡାଟ୍ କିଜ଼଼ି ଆହାଟ୍; ହେଦେଲିଂ ପିହ୍ମାଟ୍; ହେଦେଲିଂ ଇଟାଟ୍; ଇନେକିଦେଂକି ହେଦାଂ ମି ଜିବୁନ୍ । ବାନ୍ୟାର୍ତି ହାଜ଼଼ି ବିତ୍ରେ ହଣ୍ମାଟ୍ ଆରି ଦୁସ୍ଟ ମାନାୟାର୍ତି ହାଜ଼଼ିତ ହାଲ୍ମାଟ୍ । ହେଦାଂ ପିହାଟ୍, ହେବେନି ଲାଗାଂ ହିଜ଼଼ି ହାଲ୍ମାଟ୍; ହେବେତାଂ ବିନେ ଆଜ଼଼ି ହାଲାଟ୍ । ଇନେକିଦେଂକି ବାନ୍ୟା କାମାୟ୍ କିୱିତିସ୍ ହେୱାର୍ ହୁଞ୍ଜୁର୍, ଆରେ ଇନେରିଂ ମୁଚ୍ୱିତିସ୍ ହେୱାର୍ତି ହୁଚ୍କାଣ୍କୁ ରିଙ୍ଗ୍ନିକ୍ । ଇନେକିଦେଂକି ହେୱାର୍ ବାନ୍ୟାବାର୍ତି ଆରାଣ୍ ତିନାର୍; ଆରେ, ଡାରାନି ଅଙ୍ଗୁର୍ରାସ୍ ଉଣାର୍ । ମତର୍ ଦାର୍ମିର୍ତି ହାଜ଼଼ି ନାଣାଙ୍ଗେନି ଅଜଡ଼୍ ଲାକେ, ଇନାକା ମୁଣ୍ଡାମେଦାନ୍ ପାତେକ୍ ଆରେ ଆରେ ଜେଞ୍ଜ୍ଜାନାତ୍ । ଆରେ, ଦୁସ୍ଟର୍ତି ହାଜ଼଼ି ମାଜ୍ଗା ଲାକେ; ହେୱାର୍ ଇନାକାତ ଉସ୍ନାର୍, ହେଦାଂ ପୁନୁର୍ । ଏ ନା ମାଜ଼଼ି, ନା କାତାତ ମାନ୍ଦିଆନ୍ କିୟା; ନା ବଚନ୍ତ କିତୁଲ୍ ୱେନା । ହେଦାଂ ସବୁ ମି କାଣ୍କୁତାଂ ହାଲ୍ମେତ୍; ହେଦାଂ ସବୁ ମି ୱାସ୍କି ବିତ୍ରେ ଜାତୁନ୍ କିଜ଼଼ି ଇଟାଟ୍ । ଇନେକିଦେଂକି ହେଦାଂ ଇମ୍ଣାକାର୍ ପାୟାନାର୍, ହେୱାର୍ତି କାଜିଂ ହେଦାଂ ଜିବୁନ୍ ଆରି ଉଜ୍ନି ଗାଗାଡ଼୍ ଆନାତ୍ । ନି ମାନ୍ତିଙ୍ଗ୍ ବେସି ଜାତୁନ୍ ଇଟାଟ୍; ଇନେକିଦେଂକି ହେବେନି ଜିବୁନ୍ତାଂ ଚିନ୍ତା ହନାତ୍ । ଜାର୍ତାଂ ଟାଡ୍ରି ବେରଣ୍ ଦେହା କିୟାଟ୍ ଆରି କୁର୍ଲିୟା କାତା ମି ୱେଇଦାଂ ବେସି ଦେହା ଇଟାଟ୍ । ମି କାଣ୍କୁ ଆଗେ ହୁଡ଼଼ାଟ୍ ଆରି ମି କାଣ୍କୁନି ମେଟା ମି ଲାଗାଂ ଆଡେସ୍ ହୁଡ଼଼ାଟ୍ । ଏନେଙ୍ଗ୍ ଜାର୍ ପାନା ଆଡେସ୍ କିଜ଼଼ି କିୟା ଆରି ମି ସବୁ ହାଜ଼଼ି ତିର୍ ଆଏତ୍ । ତିନି କି ଡେବ୍ରି ନିପ ହାଲ୍ମାଟ୍, ଆରେ ମି ପାନା ବାନ୍ୟାତାଂ ଦେହା କିୟାଟ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.