Pengo Bible
ହିତପଦେସ 3
ଜିପକ୍ ଦାଙ୍ଗ୍ଣାଂତି ହାର୍ଦି ହିକ୍ୟା
ଏ ନା ମାଜ଼଼ି, ଏପେଙ୍ଗ୍ ନା ବିଦି ବାଣା ଆମାଟ୍; ମତର୍ ମି ମାନ୍ତ ନା ବଲ୍ ସବୁ ପାଲି କିୟାଟ୍ । ଇନେକିଦେଂକି ତା ପାଚେ ଆଇଁସ୍ ବାଡାନାକା ଆରି ଜିବୁନ୍ନି ବାର୍ହୁ ଲମର୍ ଆରି ସୁସ୍ତା ବାଡା ଆନାତ୍ । ଦୟା ଆରି ହାତ୍ପା ମିଙ୍ଗେଙ୍ଗ୍ ପିସ୍ତେମେତ୍; ଜାର୍ କାଟ୍ତ ରିଣ୍ଡାକାଂ ଗାଚା ଆରି ଜାର୍ ମାନ୍ତିନି ୱାସ୍କିତ ଲେକିକିଜ଼଼ି ଇଟାଟ୍ । ହେଦାଂ କିତିସ୍, ଏପେଙ୍ଗ୍ ପର୍ମେସ୍ୱର୍ ଆରି ମାନାୟ୍ କାଣ୍କୁକାଂ ଦୟା ଆରି ହାର୍ ବାବ୍ନା ଲାବ୍ କିନାଦେର୍ । ଏପେଙ୍ଗ୍ ସବୁୱାସ୍କି ଲାହାଂ ନିତ୍ରେମାପ୍ରୁତାକେ ପାର୍ତି କିୟାଟ୍ ଆରି ଜାର୍ ହାର୍ବାବ୍ନାତ ବାର୍ସି କିମାଟ୍ । ଜାର୍ତି ସବୁ ହାନିତ ହେୱାନିଂ ମାନି କିୟାଟ୍; ହେବେ ହେୱାନ୍ ମି ହାଜ଼଼ିସବୁ ସଲକ୍ କିନାନ୍ । ଏପେଙ୍ଗ୍ ଜାର୍ କାଣ୍କୁକାଂ ଗିଆନି ଆମାଟ୍; ନିତ୍ରେମାପ୍ରୁଙ୍ଗ୍ ପାଣ୍ଡ୍ରା ଆଡ ଆରି ବାନ୍ୟାତାଂ ବିନେ ଆଡ । ହେଦାଂ ମି ପୁଣେଲ୍ କାଜିଂ ଉଜ୍ ଆନାତ୍ ଆରି ପ୍ଡେନ୍ ମୁଟି ଲାକେ ଆନାତ୍ । ଏପେଙ୍ଗ୍ ଜାର୍ ଦନ୍ତ ଆରି ୱିଜ଼଼ୁ କମାନି ପର୍ତୁମ୍ ପାଡ଼୍ତ ନିତ୍ରେମାପ୍ରୁତି ସମାନ୍ କିୟାଟ୍ । ହେବେ ମି ଟୁଣ୍ଡି ବେସି ଦନ୍ତ ବାର୍ତି ଆନାତ୍ ଆରି ମି କୁଣ୍ଡ୍ତ ପୁନି ଅଙ୍ଗୁର୍ରାସ୍ ଡ଼଼ିଜ଼଼ି ହାନାତ୍ । ଏ ନା ମାଜ଼଼ି, ନିତ୍ରେମାପ୍ରୁତି ଲେତ୍ନାକା ବେକାର୍ ଇନ୍ମାଟ୍ ଆରି ହେୱାନ୍ତି ସାସନ୍ତ ୱାହ୍ମାଟ୍ । ଇନେକିଦେଂକି ଇନେସ୍ ଆବା ଜାର୍ ସାରିନି ମାଜ଼଼ିତିଂ, ହେଲାକେ ନିତ୍ରେମାପ୍ରୁ ଜାର୍ ଜିଉନନାକାନିଂ ସାସନ୍ କିନାନ୍ । ଇମ୍ଣି ମାନାୟ୍ ଗିଆନ୍ ପାୟାନାନ୍ ଆରି ବୁଦି ଲାବ୍ କିନାନ୍, ହେୱାନ୍ ଦନ୍ୟ । ଇନେକିଦେଂକି ରୁପାନି ବେପାର୍ତାଂ ତା ବେପାର୍ ହାର୍ଦାକା, ଆରେ ହାର୍ଦାକା ହନାତାଂ ତା ଲାବ୍ ବେସି । ହେଦାଂ ମୁକ୍ତାତାଂ ବେସି ମଲ୍ନିକା, ଆରେ ମିଦାଂ ଇମ୍ଣାକାପା ଦାମ୍ନି ଜିନିସ୍ ତା ସମାନ୍ ଆନି ଜଗ୍ ଆକାୟ୍ । ତା ତିନି କେଇ ବେସି ଦିନ୍, ତା ଡେବ୍ରି କେଇ ଦନ୍ ଆରି ଗାଜା ପାଣ୍ ମାନାତ୍ । ତା ହାଜ଼଼ିସବୁ ସୁକ୍ନିକା ହାଜ଼଼ି ଆରି ତା ସବୁ ହାଜ଼଼ି ସୁସ୍ତାନିକା ଆନାତ୍ । ଇମ୍ଣାକାର୍ ତା ଆହ୍ର ଆନାର୍, ହେୱାର୍ କାଜିଂ ହେୱାନ୍ ଜିବୁନ୍ବାର୍ତି ମାର୍ ଲାକେ; ଇମ୍ଣି ମାନାୟ୍ ହେଦାଂ ଆସ୍ତି ଇଟ୍ନାନ୍, ହେୱାନ୍ ଦନ୍ୟ । ନିତ୍ରେମାପ୍ରୁ ଗିଆନ୍ତ ପୁର୍ତିତିଂ ରଚ୍ଚାନ୍, ହେୱାନ୍ ବୁଦିତ ଆକାସ୍ମଣ୍ଡ୍ଲ୍ ତିର୍ କିତାନ୍ । ତା ଗିୟାନ୍ତ ଡେଙ୍ଗା ବାହାତାଂ ଏଜ଼଼ୁଙ୍ଗ୍ ଡ଼଼ିନିକ୍, ଆରେ, ବାଦାଡ଼୍ତାଂ ଅସ୍ ଟପା ଟୁପା ଆର୍ନାତ୍ । ଏ ନା ମାଜ଼଼ି, ଇସବୁ ନି କାଣ୍କୁକାଂ ହାଲ୍ମେତ୍, ମି ଗିୟାନ୍ ଆରି ପ୍ୟାସ୍ ରାକ୍ୟା କିୟା । ହେଦାଂ ମି ପାରାଣ୍ନି ଜିବୁନ୍ ଆରି ଗାଡେଲ୍ନି ହାଜ ଆନିକ୍ । ଲାଗିଂ ଏପେଙ୍ଗ୍ ଜାର୍ ହାଜ଼଼ିତ ପାଣ୍ଡ୍ରାୱାଦାଂ ତାଙ୍ଗ୍ନାଦେର୍, ଆରେ, ମି ପାନା ଉଜ଼଼ୁଦେର୍ । ହୁଞ୍ଜ୍ନି କାଡ଼୍ଦ ନି ପାଣ୍ଡ୍ରା ଆଉତ୍, ଆଁ, ଏପେଙ୍ଗ୍ ହୁଞ୍ଜ୍ନାଦେର୍ ଆରି ନି ହୁଞ୍ଜ୍ନାକା ସୁକ୍ନିକା ଆନାତ୍ । ତ୍ରିପ୍କୁ ଉବ୍ଜାତି ଆହାତିଂ କି ବାନ୍ୟାର୍ତି ଏକାୱାତି ବୁଡାୟ୍ତିଂ ପାଣ୍ଡ୍ରା ଆମାଟ୍ । ଇନେକିଦେଂକି ନିତ୍ରେମାପ୍ରୁ ମି ପାକ୍ୟା ଆନାନ୍, ହେୱାନ୍ ମି ପାନା ଡ଼଼ୁକାତାଂ ରାକ୍ୟା କିଦ୍ନାନ୍ । ଉପ୍କାର୍ କିନି ସାକ୍ତି ମି କେଇଦ ମାଚିସ୍, ସମାନ୍ ଦାନ୍ଅନାକାରିଂ ମୁନା କିମାଟ୍ । ଜାର୍ ଲାଗାଂ ଜିନିସ୍ ମାଚିସ୍, “ହାଲାଟ୍, ଆରେରଗ ୱାଡ, ଆସେଙ୍ଗ୍ ୱିଗାଲିଂ ହିଦ୍ନାଂ” ଇଦାଂ ଏପେଙ୍ଗ୍ ପାଡ଼୍ହା ଇଞ୍ଜାକାରିଂ ଇନ୍ମାଟ୍ । ଏପେଙ୍ଗ୍ ପାଡ଼୍ହାଇଞ୍ଜାକାର୍ ମି ଲାଗାଂ ପାଣ୍ଡ୍ରାୱାଦାଂ ବାହା କିତିଲେ ତା ବିରୁଦ୍ତ ବାନ୍ୟା ଚିନ୍ତା କିମାଟ୍ । ମାନାୟ୍ ମି କେତି କିଦ୍ୱିତିସ୍, ବିନାକାରଣ୍ତ ହେଦାଂ ଲାହାଂ ବିରୁଦ୍ କିମାଟ୍ । ଉତ୍ପାତ୍ୟାର୍ କାଜିଂ ଡାରା ଆମାଟ୍, ଆରେ, ତାଦି ଇନାକାପା ହାଜ଼଼ି ବାଚି କିମାଟ୍ । ଇନେକିଦେଂକି କୁର୍ଲିୟା ମାନାୟ୍ ନିତ୍ରେମାପ୍ରୁତି ଗିଣ୍ନିକାନ୍; ମତର୍ ହୁଦାର୍ ମାନାୟାର୍ ଲାହାଂ ହେୱାନ୍ତି ସାଙ୍ଗ୍ ମାନାତ୍ । ପାପିର୍ତି ଇଞ୍ଜ ନିତ୍ରେମାପ୍ରୁତି ସାଇପ୍ ମାନାତ୍, ମତର୍ ହେୱାନ୍ ଦାର୍ମିର୍ତି ଇଲ୍କୁକାଂ ଆର୍ସିବାଦ୍ କିନାନ୍ । ଆତିସ୍ପା ହେୱାନ୍ ହୁଞ୍ଜ୍ନାକାରିଂ ନିନ୍ଦା କିନାନ୍, ଆତିସ୍ପା ହେୱାନ୍ ହୁଦାର୍ ମାନାୟାରିଂ ଦୟା କିନାନ୍ । ଅଗିୟାନି ମାନାୟ୍ ଗାଜାନି ଆଦିକାର୍ ଆନାନ୍, ମତର୍ ଲାଚ୍କୁଡ଼଼ାର୍ ଅଗିଆନ୍ନିରିଂ ଉର୍ଣ୍ଣତି ଆନାର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.