Pengo Bible
ହିତପଦେସ 2
ଗିଆନ୍ନି ପାଡ଼୍
ଏ ନା ମାଜ଼଼ି, ଏନେଙ୍ଗ୍ ଜଦି ନା କାତା ମାନିକିନାୟ୍ ଆରି ନା ବଲ୍ସବୁ ମାନ୍ତ ଇଟା; ଏଚେକାଡ଼୍ଦ ଗିଆନ୍ ନିପ ଏନେଙ୍ଗ୍ କିତୁଲ୍ ୱେନା ଆରି ବୁଦିତ ଦିୟାନ୍ ହିୟା; ଆଁ, ଏଚେକାଡ଼୍ଦ ଏନେଙ୍ଗ୍ ହାର୍ବାବ୍ନା କାଜିଂ ହିର୍ବାନାୟ୍ ଆରି ବୁଦି କାଜିଂ ଗାଜା କାଟ୍ତାଂ କିନାୟ୍;
ଏଚେକାଡ଼୍ଦ ରୁପା ଲାକେ ହେଦାଂ ଡେକ୍ନାଦେର୍ ଆରି ମୁଚ୍ଚି ଦନ୍ ଲାକେ ହେଦାଂ ଡେକ୍ନାଦେର୍ ।
ଲାଗିଂ ଏପେଙ୍ଗ୍ ନିତ୍ରେମାପ୍ରୁତି ବିସ୍ରେନି ପାଣ୍ଡ୍ରୁ ବୁଜାନାଦେର୍ ଆରି ପର୍ମେସ୍ୱର୍ତି ବିସ୍ରେନି ଗିୟାନ୍ ପାୟାନାଦେର୍ ।
ଇନେକିଦେଂକି ନିତ୍ରେମାପ୍ରୁ ଗିଆନ୍ ହିଦ୍ନାନ୍, ହେୱାନ୍ତି ୱେଇଦାଂ ଗିଆନ୍ ଆରି ବୁଦି ହତ୍ନାତ୍ । ହେୱାନ୍ ସତ୍ ମାନାୟ୍ କାଜିଂ ଗିୟାନ୍ ରୁଣ୍ଡାୟ୍ କିନାନ୍, ହେୱାନ୍ ହୁଦାର୍କାରିରିଂ ଆଡାନାକା ଲାକେ ଆନାତ୍ । ଇନେସ୍କି ହେୱାନ୍ ନ୍ୟାୟ୍ନି ହାଜ଼଼ି ରାକ୍ୟା କିଦେଂ ଆଡ୍ନାନ୍ ଆରି ଜାର୍ ପାର୍ତି କିନାକାର୍ ହାନାକା ସମାଲିକିନାର୍ । ହେବେ ଏନେଙ୍ଗ୍ ଦାର୍ମି ଆରି ହାର୍ବିଚାର୍ ଆରି ନ୍ୟାୟ୍ ଆରି ମଙ୍ଗଲ୍ନି ସବୁ ହାଜ଼଼ି ପୁନାୟ୍ । ଇନେକିଦେଂକି ଗିୟାନ୍ ମି ମାନ୍ତ ହଣାତ୍, ଆରେ, ବିଦ୍ୟା ମି ପାରାଣ୍ନି ସୁକ୍ହିଦ୍ନାକା ଆନାତ୍; ପ୍ୟାସ୍ ମି ଜପି କାତ୍ନାକା ଆନାନ୍, ଗିୟାନ୍ ମିଙ୍ଗେଙ୍ଗ୍ ରାକ୍ୟା କିଦ୍ନାତ୍ । ହେବେ ଇମ୍ଣାକାର୍ ବାନ୍ୟା କାତା ଇନାର୍, ଇମ୍ଣାକାର୍ ମାଜ୍ଗାୱାଡ଼଼ାଙ୍ଗ୍ ହାଜ଼଼ି ବୁଲାଚାଲା କିନି କାଜିଂ ସଲକ୍ ହାଜ଼଼ି ପିହ୍ନାର୍; ଇମ୍ଣାକାର୍ ବାନ୍ୟାକାମାୟ୍ କିଦେଂ ୱାରିୟା ଆନାର୍ ଆରି ଦୁସ୍ଟର୍ତି ବାନ୍ୟା କାତାତ ମାନ୍ହିନାର୍; ଇମ୍ଣାକାର୍ ଜାର୍ ଜାର୍ ହାଜ଼଼ିତ ଟେଡ଼଼ା ଆରି ଜାର୍ ଜାର୍ ହାଜ଼଼ି ବାଙ୍ଗ୍ଟା, ଇଲାକେ ବାନ୍ୟାକାମାୟ୍ କିନାକାର୍ତି ହାଜ଼଼ିତାଂ ମିଦାଂ ଉଦାର୍ ଆନାତ୍ । ଆରେ, ଇମ୍ଣି ଲକାର୍ଡକ୍ରି ରାଞ୍ଜାୟ୍ କାତା ଇନାତ୍, ଇନେନ୍ ଜାର୍ କାଡ଼୍ଦେକାଡ଼୍ନି ସାଙ୍ଗ୍ ପିସ୍ତି ଜାର୍ ପର୍ମେସ୍ୱର୍ତି ନିୟମ୍ ବାଣାନାତ୍ । ଇନେର୍ତି ଇଲ୍ ହାକିନିପ ଆରି ଇନେର୍ତି ହାଜ଼଼ି ହାକି ନିପ ହାନାତ୍, ଇନେର୍ ଲାଗାଂ ହାଚିସ୍ ଇନେର୍ ମାସ୍ଦି ୱାଉର୍ ଆରି ଜିବୁନ୍ନି ହାଜ଼଼ି ଆରେ ଆହୁନ୍, ଇଲାକେ ଲକାର୍ଡକ୍ରିତାଂ ମିଦାଂ ଉଦାର୍ ଆନାତ୍ । ଇଦାଂ କାଜିଂ ଏପେଙ୍ଗ୍ ସତ୍ମାନାୟାର୍ତି ହାଜ଼଼ି ବୁଲାଚାଲା କିୟାଟ୍ ଆରି ଦାର୍ମିର୍ତି ହାଜ଼଼ି ଆସ୍ତି ହାଲାଟ୍, ଇନେକିଦେଂକି ହୁଦାର୍ ମାନାୟାର୍ ଦେସ୍ତ ବାହା କିନାର୍, ଆରେ, ସତ୍ଦାର୍ମିର୍ ହେବେ ହାର୍ତିର୍ ମାନାର୍ । ମତର୍ ବାନ୍ୟାର୍ ଦେସ୍ତାଂ ନସ୍ଟ ଆନାର୍ ଆରି ବିସାସ୍ତ ବିସ୍ହିନାକାର୍ ହେବେତାଂ ଉନ୍ଦ୍ୟାନାର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.