Pengo Bible
ହିତପଦେସ 10
ସଲମନ୍ତି ହାର୍ଦି ହିକ୍ୟା
ସଲମନ୍ତି ହାର୍ଦିହିକ୍ୟା। ଗିଆନ୍ନି ମାଜ଼଼ି ଆବାତି ୱାରି କିୟ୍କିନାନ୍; ମାତର୍ ବୁଦିହିଲ୍ୱି ମାଜ଼଼ି ହେଦାଂ ଆୟାତି ଦୁକ୍ନିକା । ବାନ୍ୟା ଉବ୍ଜାତି ଦନ୍ ଇନାକା ପାଡ଼୍ ଆହୁତ୍; ମତର୍ ଦାର୍ମି ହାକିତାଂ ଉଦାର୍ କିନାନ୍ । ନିତ୍ରେମାପ୍ରୁ ଦାର୍ମିନି ପାରାଣ୍ତିଂ ନାସ୍କିତ ନାସ୍କି ପାଗୁନ୍; ମତର୍ ହେୱାନ୍ ଦୁସ୍ଟର୍ତି କାମାୟ୍ ସମାନ୍ କିଉନ୍ । ଇମ୍ଣି ମାନାୟ୍ ଟକ୍ୱା କାମାୟ୍ କିନାନ୍, ହେୱାନ୍ ଅର୍କିତ୍ ଆନାନ୍; ମତର୍ କାମ୍ଲିୟା ମାଜାନ୍ କିନାତ୍ । ଜେଟ୍ମାସ୍ତ ଇନେନ୍ ରୁଣ୍ଡାୟ୍ କିନାନ୍, ହେୱାନ୍ ବୁଦିକାରିୟା ମାଜ଼଼ି, ମତର୍ କୱେର୍ ସମୁତ ଇନେର୍ ହୁଞ୍ଜିମାନାର୍, ହେ ମାଜ଼଼ି ଲାଜ୍ହିଲ୍ୱାକାନ୍ । ଦାର୍ମି କାପ୍ଡ଼଼ାତ ଆର୍ସିବାଦ୍ ଆନାତ୍; ମତର୍ ଦୁସ୍ଟର୍ତି ୱେଇ ବାନ୍ୟା କାମାୟ୍ତ ଡାବାନାତ୍ । ଦାର୍ମିର୍ତି ଏତୁ ଦନ୍ୟ, ମତର୍ ଦୁସ୍ଟର୍ ତର୍ ମୁଞ୍ଜ୍ନାତ୍ । ଇନେନ୍ ୱାସ୍କିତ ଗିୟାନି, ହେୱାନ୍ ବଲ୍ ଇଟ୍ନାନ୍; ମତର୍ ମୁରୁକ୍ ମୁଞ୍ଜ୍ୟା ଆନାର୍ । ହୁଦାର୍ନିକାର୍ ପାଣ୍ଡ୍ରା ଆୱାଦାଂ ତାଙ୍ଗ୍ନାର୍, ମତର୍ ଇଟିଂହାନ୍ଟିଂ ତାଙ୍ଗ୍ନାକାର୍ ଜାଣା ପଡ଼ାନାର୍ । ଇନେନ୍ କାଣ୍କୁ ମିଟ୍କା ଇଡ଼୍ନାନ୍, ହେୱାନ୍, ଦୁକ୍ ଉବ୍ଜାୟ୍ କିନାନ୍, ଆରେ, ଅଗିଆନ୍ତ କାତା ଇନାକାନ୍ ମୁଞ୍ଜ୍ୟାନାନ୍ । ଦାର୍ମିର୍ତି ୱେଇ ଜିବୁନ୍ନି ଚୁରାଣ୍ ଲାକେ, ମତର୍ ଦୁସ୍ଟର୍ ୱେଇ ବାନ୍ୟାନିକା ଡାବାନାତ୍ । ଡାରା କଲି ଉବ୍ଜାୟ୍ କିନାନ୍, ମତର୍ ଜିଉ ସବୁ ଅଦାର୍ମି ଡାବାୟ୍ କିନାତ୍ । ହାର୍ବାବିକିନି ୱେନ୍ଦୁଲ୍ତ ଗିଆନ୍ ମାନ୍ଗାନାତ୍, ମତର୍ ବୁଦିହିଲ୍ୱାକାରିଂ ଗାଗାଡ଼୍ କାଜିଂ ବେଡ୍ଗା । ଗିଆନିର୍ ଗିଆନ୍ ରୁଣ୍ଡାୟ୍ କିନାର୍, ମତର୍ ଗିୟାନ୍ହିଲ୍ୱି ୱେଇ ଏକାୱାନାକା ନାସ୍ ଲାକେ ଆନାତ୍ । ମାଜାନ୍ତି ଦନ୍ ତାଦି ଡାଟ୍ ଗାଡ଼୍, ହିଲ୍ୱାକାର୍ତି ହିଲ୍ୱାକା ହେୱାର୍ତି ନାସ୍ । ଦାର୍ମିର୍ତି କସ୍ଟ ଜିବୁନ୍ନିକା, ଆରେ, ଅଦାର୍ମିର୍ତି କମାନି ପାପ୍ନିକା । ହାର୍ଦି ହିକ୍ୟା ଇନେନ୍ ମାନି କିନାନ୍, ହେୱାନ୍ ଜିବୁନ୍ ହାଜ଼଼ିତ ତାଙ୍ଗ୍ନାନ୍; ମତର୍ ଇନେନ୍ କେତ୍ନାକା ପିହ୍ନାନ୍, ହେୱାନ୍ ବୁଲ୍କା ଆନାନ୍ । ଇନେନ୍ ଡାରା ଡାବାୟ୍ କିନାନ୍, ତା ୱେନ୍ଦୁଲ୍ ମିଚ୍ନିକା; ଆରେ, ଇନେନ୍ ଗାଣ୍ଜୁ ରଚ୍ନାନ୍, ହେୱାନ୍ ଅଗିୟାନି । ବେସି ବଚନ୍ତ ଅଦାର୍ମିନି ବାର୍ତି ମାନାତ୍, ମତର୍ ଇନେନ୍ ଜାର୍ ୱେନ୍ଦୁଲ୍ତିଂ ମଦାୟ୍ କିନାନ୍, ହେୱାନ୍ ବୁଦିକାରିୟା । ଦାର୍ମିର୍ତି ୱେନ୍ଦୁଲ୍ ବାଚିକିତି ରୁପା ଲାକେ, ମତର୍ ଦୁସ୍ଟର୍ତି ମାନ୍ ଅଲପ୍ ମଲ୍ । ଦାର୍ମିର୍ତି ୱେନ୍ଦୁଲ୍ ହେନିରିଂ ପାଲି କିନାତ୍, ମତର୍ ଅଗିଆନ୍ନିର୍ ବୁଦିହିଲ୍ୱି କାଜିଂ ହାନାର୍ । ନିତ୍ରେମାପ୍ରୁତି ଆର୍ସିବାଦ୍ ଦନି କିନାତ୍, ଆରେ, ହେୱାନ୍ ହେଦାଂ ରଚେ ଦୁକ୍ ମେହାୟ୍ କିଉନ୍ । ବାନ୍ୟା କାମାୟ୍ କିଜ଼ି ଅଗିୟାନି ୱାରି ଆନାନ୍, ହେଲାକେ ଗିଆନି ଲକ୍ ବୁଦି ଲାବ୍ କିଜ଼ି ୱାରି ପାୟାନାନ୍ । ଦୁସ୍ଟ ମାନାୟ୍ ଇନାକା ପାଣ୍ଡ୍ରା ଆନାନ୍, ହେଦାଂ ନେ ହେଦାଂ କାଜିଂ; ମତର୍ ଦାର୍ମିର୍ତି ମାନ୍ଆହା ହେୱାନିଙ୍ଗ୍ ହିୟାନାତ୍ । ହୁଜ଼଼ାୱାଣି ଆତିସ୍ ଦୁସ୍ଟ ଆରେ ମାନ୍ଗୁର୍, ମତର୍ ଦାର୍ମି ୱିଜ଼୍ୱିକାଡ଼୍ ମୁଡ଼୍କୁନାଦି ଲାକେ । ଇନେସ୍ ଟାଡାତିଂ ହଇନି ରାସ୍ ଆରି କାଣ୍କୁ କଦା, ହେଲାକେ ଜାର୍ ପକ୍ତାତାକାର୍ କାଜିଂ ନିସ୍ତାୟ୍ । ନିତ୍ରେମାପ୍ରୁତି ବିସ୍ରେ ପାଣ୍ଡ୍ରା ଆତିସ୍ ଦିନ୍ ବାଡାୟ୍ କିନାନ୍, ମତର୍ ଦୁସ୍ଟର୍ତି ବାର୍ହୁ ଉଣା କିୟାନାତ୍ । ଦାର୍ମିର୍ତି ଆହା ୱାରିନିକା ଆନାତ୍, ମତର୍ ଦୁସ୍ଟର୍ତି ବାର୍ସି ନସ୍ଟ ଆନାତ୍ । ନିତ୍ରେମାପ୍ରୁତି ହାଜ଼଼ି ସଲ୍କେମାନାୟାର୍ତି କାଜିଂ ଡାଟ୍ ଗାଡ଼୍; ମତର୍ ବାନ୍ୟାକାମାୟ୍କିନାକାର୍ କାଜିଂ ହେଦାଂ ନାସ୍ନିକା । ଦାର୍ମି ଇନାୱାଡ଼଼ାଙ୍ଗ୍ ପା ଗୁଚା ଆଉନ୍; ମତର୍ ଦୁସ୍ଟ ଦେସ୍ନିକାନ୍ ଆଉନ୍ । ଦାର୍ମିର୍ତି ୱେଇ ଗିୟାନ୍ ଉବ୍ଜାୟ୍ କିନାତ୍, ମତର୍ କୁଟ୍କିନି ୱେନ୍ଦୁଲ୍ ନସ୍ଟ ଆନାତ୍ । ଦାର୍ମିର୍ତି ମୁମ୍ଦ ହାର୍ କାତା ପୁନାତ୍, ମତର୍ ଦୁସ୍ଟର୍ତି ୱେଇ ଗାଣ୍ଜୁ କାତା ଇନାତ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.