Pengo Bible
ହିତପଦେସ 11
ବେକାର୍ କେଜି ଗୁଣ୍ଡ୍ ନିତ୍ରେମାପ୍ରୁତି ଗିଣ୍ ବିସ୍ରେ। ମତର୍ ସମାନ୍ ଗୁଣ୍ଡ୍ ହେୱାନ୍ତି ସାରି ଆନାତ୍ । ଆକାର୍ ୱାତିସ୍ ଲାଜୁ ୱାନାତ୍; ମତର୍ ହୁଦାର୍ ମାନାୟ୍ତାକେ ଗିୟାନ୍ ମାନାତ୍ । ସଲ୍କେ ମାନାୟାର୍ତି ସଲ୍କେ ହେୱାରିଂ ହାଜ଼଼ି ଚଚ୍ନାନ୍, ମତର୍ ବିସାସ୍ତ ବିସ୍ ହିନାକାର୍ କୁଟ୍କିନାକାରିଂ ହେୱାରିଂ ନସ୍ଟ କିନାତ୍ । ରିସା ଦିନ୍ତ ଦନ୍ ଲାବ୍ ଆକାୟ୍, ମତର୍ ଦାର୍ମିର୍ ହାକିତାଂ ରାକ୍ୟା କିନାତ୍ । ସାଦୁନି ଦାର୍ମିକାତା ଚଚ୍ନାତ୍, ମତର୍ ଦୁସ୍ଟ ଜାର୍ ଦୁସ୍ଟତ ସେସ୍ ଆନାତ୍ ହୁଦାର୍ ମାନାୟାର୍ତି ଦାର୍ମିକାତା ହେୱାରିଂ ଉଦାର୍ କିନାତ୍, ମତର୍ ବିସ୍ୱାସ୍ତବିସ୍ ହିନାକାର୍ ଜାର୍ ଜାର୍ ବାନ୍ୟା କାମାୟ୍ତ ଦାରାପଡ଼଼ା ଆନାର୍ । ଦୁସ୍ଟ ମାନାୟ୍ ହାତିସ୍, ତା ବାର୍ସି ନସ୍ଟ ଆନାତ୍ ଆରି ଅଦାର୍ମିର୍ତି ଆହା ନସ୍ଟ ଆନାତ୍ । ଦାର୍ମି ଦୁକ୍ତାଂ ଉଦାର୍ ପାୟାନାନ୍, ଆରେ, ଦୁସ୍ଟ ହେଦାଂ ବାଦୁଲ୍ ହେବେ ୱାନାନ୍ । ଅଦାର୍ମି ମାନାୟ୍ ଜାର୍ ୱେଇଦାଂ ପାଡ଼୍ହାନିକାରିଂ ନାସ୍ କିନାତ୍, ମତର୍ ଦାର୍ମି ଗିୟାନ୍ତ ଉଦାର୍ ପାୟାନାନ୍ । ଦାର୍ମିର୍ତି ଉନ୍ତି ଆତିସ୍, ଗାଡ଼୍ ନିକାର୍ ୱାରି କିନାର୍; ଆରେ, ଦୁସ୍ଟର୍ତି ନାସ୍ ଆତିସ୍, ଆରାଦାନା ଆନାତ୍ । ହୁଦାର୍ ମାନାୟ୍ତି ଆର୍ସିବାଦ୍ତ ଗାଡ଼୍ ଉନତି ଆନାତ୍, ମତର୍ ବାନ୍ୟା ମାନାୟ୍ତି ୱେଇଦ ତାଦି ନସ୍ଟ ଆନାତ୍ । ଇନେନ୍ ଜାର୍ ପାଡ଼୍ହାନିକାରିଂ ବେକାର୍ ଇନାନ୍, ହେୱାନ୍ ବୁଦିହିଲ୍ୱାକାନ୍; ମତର୍ ବୁଦିନିକାନ୍ ଚୁପ୍ ଆଜ଼଼ି ମାନାନ୍ । ଇନେନ୍ ପାଲ୍ତୁ ଆଜ଼଼ି ବୁଲାନାନ୍, ହେୱାନ୍ ଡ଼ୁଗ୍ତି କାତା ହପ୍ନାନ୍, ମତର୍ ଇନେର୍ତି ପାର୍ତିନି ମାନ୍, ହେୱାନ୍ କାତା ଡ଼ୁକ୍ଚି ଇଟ୍ନାନ୍ । ହାର୍ଦି କାତା ଅବାବ୍ତ ବୁଡାନାତ୍, ଆରେ, ବେସିଲମର୍ ମାନାୟ୍ ଜପି ଜାତିନି ରାକ୍ୟା ଆନାତ୍ । । ଜାଣାହିଲ୍ୱି ମାନାୟ୍ କାଜିଂ ଇନେନ୍ ଦାଇ ଆନାନ୍, ହେୱାନ୍ ଆତିସ୍ପା କସ୍ଟ ପାୟାନାନ୍; ମତର୍ ଦାଇ ଆଦେଂ ଇନେନ୍ ଗିଣ୍ କିନାନ୍, ହେୱାନ୍ ବାଚାନିତ ମାନାନ୍ । ଦୟାକିନି କଗ୍ଲେ ଗାଜା ଜାଜ୍ମାଲ୍ ଆସ୍ତି ଇଟ୍ନାତ୍, ଆରେ, ଉତ୍ପାତ୍ୟା କଗ୍ଲେ ଦନ୍ ଆସ୍ତି ଇଟ୍ନାତ୍ । ଦୟାନି ମାନାୟ୍ ଜାର୍ ପାରାଣ୍ନି ହାର୍ କିନାତ୍; ମତର୍ ଇନେନ୍ ଅମାନ୍ୟା, ହେୱାନ୍ ଜାର୍ ଗାଗାଡ଼୍ତିଂ ଦୁକ୍ ହିନାନ୍ । ଦୁସ୍ଟ ମାନାୟ୍ ମିଚ୍ କମାୟ୍ କିନାର୍, ମତର୍ ଇନେନ୍ ଦାର୍ମି ବିୟାନ୍ ୱିତ୍ନାନ୍, ତାଦି ହାତ୍ପା ଇନାମ୍ ମାନାତ୍ । ଇମ୍ଣି ମାନାୟ୍ ଦାର୍ମି କାତାତ ସତ୍ ମାନାତ୍, ହେୱାନ୍ ଜିବୁନ୍ ପାୟାନାନ୍; ଆରେ, ବାନ୍ୟାକାମାୟ୍ ପାଚେ ହନ୍ନାନ୍, ହେୱାନ୍ ଜାର୍ ହାକି ଗିଟାନାତ୍ । କୁଟ୍ମାନ୍ ମାନାୟ୍ ନିତ୍ରେମାପ୍ରୁତି ଗିଣ୍ କିନାନ୍, ମତର୍ ହୁଦାର୍ନିକାର୍ ହେୱାର୍ତି ୱାରିନିକାନ୍ ଆନାନ୍। ବାନ୍ୟା ମାନାୟ୍ କେଇ ଆସ୍ପା ଆତିସ୍ ପା ଦଣ୍ଡ୍ ପାୟାନାର୍, ମତର୍ ଦାର୍ମିର୍ତି ଲାତ୍ରା ରାକ୍ୟା ପାୟା ଆନାର୍ । ପାଞ୍ଜିନି ମୁତ୍ଲାତ ଏଚେକ୍ ହନା ଡାଣ୍ଡି ତୁସିକିତିସ୍ ପା, ହେଲାକେ ହାର୍ ବିଚାର୍ ପିହ୍ନି ହଲ୍ନି କଗ୍ଲେ ହେଲାକେ । ଦାର୍ମିର୍ତି ଆହା ପାଡ଼୍ କେବଲ୍ ହାର୍, ମତର୍ ଦୁସ୍ଟର୍ତି ବାର୍ସିନି ପାଡ଼୍ ରିସା । ଇନେ ଇନେର୍ ଉପ୍କାର୍ କିଜ଼଼ି ଆରେ ବାଡାନାର୍, ଆରେ, ଇନେ ଇନେର୍ ସମାନ୍ କର୍ଚ ମାନିକିୱିତିସ୍ ପା ହେବେତାଂ କେବଲ୍ ଅବାବ୍ ଆନାତ୍ । ଦାନ୍ହିନି ମାନାୟ୍ ପଟ ପାଞ୍ଜ୍ନାନ୍, ଆରେ, ଏଜ଼଼ୁତିର୍ନାକାର୍ ଆପେ ପା ଏଜ଼଼ୁଙ୍ଗ୍ତ ତିର୍ୟାନାର୍ । ତାସ୍ ଇନେନ୍ ଆଲାଟ୍ କିଜ଼଼ି ଇଟ୍ନାନ୍, ହେୱାନିଙ୍ଗ୍ ମାନାୟାର୍ ସାଇପ୍ ହିନାର୍, ମତର୍ ଇମ୍ଣି ମାନାୟ୍ ହେଦାଂ ପ୍ରନାନ୍, ତା କାପ୍ଡ଼଼ାତ ଆର୍ସିବାଦ୍ ଆନାତ୍ । ଇମ୍ଣି ମାନାୟ୍ ଜାତୁନ୍ତ ସାରି ସେସ୍ଟା କିନାନ୍, ହେୱାନ୍ ଦୟା ପାୟାନାନ୍, ଆରେ ଇନେନ୍ ଲକାର୍ତି ବାନ୍ୟା କିଦେଂ ଦାହ୍ନାନ୍, ହେଦାଂ କାଜିଂ ହେଦାଂ ନେ ଗିଟା ଆନାତ୍ । ଜାର୍ ଦନ୍ତ ଇନେନ୍ ବେବାର୍ କିନାନ୍, ହେୱାନ୍ ମୁଚ୍ୟାନାନ୍; ମତର୍ ଦାର୍ମି ମାନାୟ୍ କ୍ଡଗେ ଆକି ଲାକେ ପାଲମ୍ ଆନାତ୍ । ଜାର୍ କୁଟୁମ୍ତିଂ ଇନେନ୍ ଦୁକ୍ ହିନାନ୍, ହେୱାନ୍ ଦୁକାଲାକେ ଆଦିକାର୍ ପାୟାନାନ୍; ଆରେ, ଅଗିଆନି ଗିୟାନ୍ ମାନାୟ୍ନି ଆଡ଼଼ିୟା ଆନାନ୍ । ଦାର୍ମିର୍ତି ପାଡ଼୍ ଜିବୁନ୍ନିକା ମାର୍ ଆନାତ୍, ଆରେ, ଇନେନ୍ ଗିଆନ୍ନିକାନ୍, ହେୱାନ୍ ବିନ୍ନିକାର୍ ଜିବୁନ୍ ଲାବ୍ କିନାନ୍ । ହୁଡ଼଼ାଟ୍, ପୁର୍ତିତ ଦାର୍ମିର୍ ନେ ପାତିପାଡ଼୍ ପାୟାନାର୍, ଲାଗିଂ ଦୁସ୍ଟ ଆରି ପାପିର୍ ଇନାକା ପାତିପାଡ଼୍ ପାୟା ଆଉର୍?
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.