Pengo Bible
ଜିସାଇୟ 66
ପରମେସ୍ୱର୍ ଜଗତ୍ତିଂ ବିଚାର୍ କିନାନ୍
ନିତ୍ରେମାପ୍ରୁ ଇ କାତା ଇନାନ୍, “ସାର୍ଗେ ମା ଗାଦି ଆରି ପୁର୍ତି ମା ପାନା; ଏପେଙ୍ଗ୍ ମା କାଜିଂ ଇନେବାର୍ତି ଇଲ୍ ରଚ୍ନାଦେର୍ ? ଆରି ଇମ୍ଣି ବାହା ମା ଜମ୍ନି ବାହା ଆନାତ୍ ? ଇନେକିଦେଂକି ମା କେଇ ଇ ସବୁ ଉବ୍ଜା ଆତାତ୍ନା, ଆରେ ହେବେ କାଜିଂ ଇସବୁ ଉବ୍ଜାଣ୍ ଆତାତ୍, ଇଦାଂ ନିତ୍ରେମାପ୍ରୁ ଇନାନ୍; ମତର୍ ଇ ମାନାୟ୍ କାଜିଂ, ଇଚିସ୍ ଇମ୍ଣି ମାନାୟ୍ ଦୁକି, ଡ୍ରିଂତିମାନ୍ ଆରି ଇନେନ୍ ମା ବଚନ୍ତ କଂପା ଆନାନ୍, ହେଦାଂ କାଜିଂ ଆସେଙ୍ଗ୍ ହୁଡ଼୍ନାସ୍ ।” “ଇନେନ୍ କଡି ଅହ୍ନାନ୍, ହେୱାନ୍ ମାନାୟ୍ ଅହ୍ନାକାନ୍ ଲାକେ ଆନାନ୍; ଇନେନ୍ ମେଣ୍ଡାଗଡ଼ିୟା ପୁଜା କିନାନ୍, ହେୱାନ୍ ନିକୁଡ଼୍ ଗାଡେଲ୍ ରାସ୍ତି ମାନାୟ୍ ଲାକେ ଆନାନ୍; ଇନେନ୍ ଆକାତ୍ ହିନାନ୍, ହେୱାନ୍ ପାଞ୍ଜିତି ନେତେର୍ ଆକାତ୍ ହିନି ମାନାୟ୍ ଲାକେ ଆନାନ୍; ଇନେନ୍ ଦୁପ୍ନି ଆହିକିନାନ୍, ହେୱାନ୍ ପେନ୍କୁ ଦନ୍ୟବାଦ୍ ହିନି ମାନାୟ୍ ଲାକେ ଆନାନ୍; ଆଁ, ହେୱାର୍ ଜାର୍ତି ହାଜ଼ି ବାଚି କିତାର୍ଣ୍ଣା ଆରି ହେୱାର୍ତି ଜିବୁନ୍ ଜାର୍ତି ଗିଣ୍ଜଗ୍ ବିସ୍ରେ ସାରି ଆନାତ୍; ଆପ୍ ପା ହେୱାର୍ତି କାରାପ୍ ବିସ୍ରେ ବାଚି କିନାପ୍ ଆରି ହେୱାର୍ତି ପାଣ୍ଡ୍ରାନି ବିସ୍ରେ ହେୱାର୍ କାଜିଂ ଗିଟାୟ୍କିନାସ୍; ଇନେକିଦେଂକି ଆପ୍ କୁକ୍ତି ୱେଡ଼଼ାଲିଂ ଇନେର୍ ଉତର୍ ହିଦ୍ୱାତାର୍; ଆପ୍ ୱେଚ୍ନି ୱେଡ଼଼ାଲିଂ ହେୱାର୍ ୱେନ୍ୱାତାର୍; ମତର୍ ଇନାକା ମା ଲାଗେ ବାନ୍ୟା, ହେଦାଂ ହେୱାର୍ କିତାର୍ ଆରି ଇମେତାକେ ମାଦାଂ ସାରି ଆକାୟ୍, ହେଦାଂ ହେୱାର୍ ବାଚି କିତାର୍ ।” ନିତ୍ରେମାପ୍ରୁତି ବଚନ୍ତ କମ୍ପାନାଦେରା ଜେ “ଏପେଙ୍ଗ୍, ଏପେଙ୍ଗ୍ ହେୱାନ୍ତି କାତା ୱେନାଟ୍; ଇମ୍ଣି ମି ଟଣ୍ଡାର୍ ମିଂ ଗିଣ୍ କିଦ୍ନାର୍, ମା ତର୍ କାଜିଂ ପେତ୍ସେଦାନାର୍, ହେୱାର୍ ଇଚାର୍ନା, ଆପେଙ୍ଗ୍ ଇନେସ୍ ମି ୱାରି ହୁଡ୍ଦେଂ ଆଡ୍ନାପ୍, ଇଦାଂ କାଜିଂ ନିତ୍ରେମାପ୍ରୁ ଜାଜ୍ମାଲ୍ ଆଏନ୍; ମତର୍ ହେୱାର୍ ଲାଜ୍କୁଇନାର୍ । ଗାଡ୍ଦାଂ ଆଡ଼ବିନି କାଟ୍, ମନ୍ଦିର୍ତାଂ କାଟ୍, ଇନେର୍ ଜାର୍ ସାତ୍ରୁରିଂ ପାତିପାଡ଼୍ ହିନାନ୍, ହେ ନିତ୍ରେମାପ୍ରୁତି କାଟ୍ ।
ଜିରୁସାଲମ୍ ହୁଦାଂ ୱାରି
କସ୍ଟ ପାୟାନି ଆଗେ ହେଦେଲ୍ ହିମ୍ଣା ଗାଟାତାତ୍; ଗରବ୍ କସ୍ଟ ୱାନି ଆଗେ ହିମ୍ଣାଂ ଜଲମ୍ ଆତିକ୍ । ଏଲେଂବାର୍ତି ବେରଣ୍ ଇନେର୍ ୱେଚାର୍ଣ୍ଣା ? ଏଲେଂବାର୍ତି କାତା ଇନେର୍ ହୁଡ଼ତାର୍ଣ୍ଣା ? ର ଦିନ୍ତ କି ଇମ୍ଣି ଦେସ୍ନି ଜଲମ୍ ଆନାତ୍ ? ଇମ୍ଣି କୁଟୁମ୍ନି ଲକୁ କି ରଞ୍ଜେମାଟ୍ ଜଲମ୍ ଆନାର୍ ? ସିୟନ୍ ଗରବ୍ନି କସ୍ଟ ପାୟାତି ପାଚେ, ହେଦେଲ୍ ଜାର୍ ହିମ୍ଣାକାଂ ଜଲମ୍ କିତାତ୍ ।” ନିତ୍ରେମାପ୍ରୁ ଇନାନ୍, ଆପ୍ ଜଲମ୍ ଦିନ୍ ଏକାୱାଇ କିଜ଼଼ି କି ଜଲମ୍ କିୟ୍କିଉପ୍ ? ମି ଇସ୍ୱର୍ ଇନାନ୍, ଜଲମ୍ କିୟ୍କିନାପ୍ ଜେ ଆପ୍, ଆପ୍ କି ଗରବ୍ ଟେବାୟ୍ କିନାପ୍ ? ଏ ଜିରୁସାଲମ୍ତିଂ ଜିଉନନାକାଦେର୍ ୱିଜ଼଼ାକାଦେର୍, ଏପେଙ୍ଗ୍ ତା ଲାହାଂ ୱାରି କିୟାଟ୍ ଆରି ତା କାଜିଂ ସାର୍ଦା କିୟାଟ୍; ତା ବିସ୍ରେ ଆଡ଼୍ବାନାକାଦେର୍ ୱିଜ଼଼ାଦେର୍, ମି ୱାରି କାଜିଂ ତା ଲାହାଂ ସାର୍ଦା କିୟାଟ୍; ହେବେଣ୍ଡାଂ ଏପେଙ୍ଗ୍ ତାଦି ସୁସ୍ତାବାର୍ତି ମାୟ୍ ଉଣ୍ଜି ସାରି ଆନାଦେର୍, ଏପେଙ୍ଗ୍ ମାୟ୍ ପିଜ୍ଜି ହେଦେଲ୍ତି ଦାନ୍ତ ବେସି ୱାରି ଆନାଦେର୍ । ଇନାକିଦେଂକି ନିତ୍ରେମାପ୍ରୁ ଇ କାତା ଇନାନ୍, ହୁଡ଼଼ାଟ୍, ଆପେଙ୍ଗ୍ ତାନିପ ଗାଜା ନାଗୁଡ଼୍ ଲାକେ ସାନ୍ତି ଆରେ ଡ଼଼ିଜ଼଼ିହାନି ହାମ୍ଦୁର୍ ଲାକେ କେତେକ୍ ଦେସ୍ନି କାବାଆନାକା ଚଚ୍ନାସ୍, ଆରି ଏପେଙ୍ଗ୍ ହେବେତାଂ ଉଣାଦେର୍ ଆରେ ଏପେଙ୍ଗ୍ ମାରାତାଂ ପିଣ୍ଡ୍ୟାନାଦେର୍ ଆରି ମେଣ୍ତାଂ ଜପି ଏନ୍ଦ୍ନାଦେର୍ ଇନେସ୍ ରୱାନିଂ ତା ତେହି ସୁସ୍ତା କିନାତ୍, ହେଲାକେ ଆପ୍ ମିଂ ସୁସ୍ତା କିନାପ୍ ଆରି ଏପେଙ୍ଗ୍ ଜିରୁସାଲମ୍ତ ସୁସ୍ତା ପାୟାନାଦେର୍ । ଆରେ, ଏପେଙ୍ଗ୍ ଇଦାଂ ହୁଡ୍ନାଦେର୍ ଆରି ମି ନେଞ୍ଜେଡାକି ୱାର୍ୟା ଆନାତ୍, ଆରେ ମି ପ୍ଡେକୁ ପୁନି କାଚ୍ରା ଲାକେ ଜିବୁନ୍ ଆନାତ୍; ଆରେ, ନିତ୍ରେମାପ୍ରୁତି କେଇ ହେୱାନ୍ତି ଆଡ଼଼ିୟାର୍ ପାକ୍ୟାତ ହନାତ୍ ଆରି ହେୱାନ୍ ଜାର୍ ସାତ୍ରୁର୍ତି ବିରୁଦ୍ତ ରିସା ଆନାନ୍ ।
ଇସ୍ୱରତି ପାଣ୍ ହାରିହାରା ବିଚାର୍
ଇନାକିଦେଂକି ବେସିକେଦ୍ତିତ ଜାର୍ତି ରିସା ଆରି ଆସ୍ତିନାଣି ହୁଦାଂ ଜାର୍ ଇଣ୍ କିନାକା କାଜିଂ ନିତ୍ରେମାପ୍ରୁ ନାଣି ଲାହାଂ ୱାନାନ୍ ଆରି ହେୱାନ୍ତି ଗଡ଼଼ାଗାଡ଼଼ି ସବୁ ହୁଜ଼଼ାୱାଣି ଲାକେ ଆନାତ୍ । ଇନାକିଦେଂକି ନିତ୍ରେମାପ୍ରୁ ନାଣି ହୁଦାଂ ଆରି ଜାର୍ କାଣ୍ଡା ହୁଦାଂ ସବୁନି ମଇତ ଲାହାଂ ଗଣ୍ଡ୍ଗଲ୍ କିନାନ୍; ହେବେ ନିତ୍ରେମାପ୍ରୁତି ହୁଦାଂ ହାତାକାର୍ ବେସି ଆନାର୍ । ନିତ୍ରେମାପ୍ରୁ ଇନାନ୍, ଇମ୍ଣାକାର୍ ମାଦ୍ଣାକାର୍ ରୱାନିଙ୍ଗ୍ ପାଚେନି ବାଡ଼ଦ ହାନି କାଜିଂ ଜାର୍ତିଂ ପୁଇପୁୟା ଆରି ସକଟ୍ କିନାନ୍, ପାଞ୍ଜି ଜେଇ ଆରି ଗିଣ୍ ଜିନିସ୍ ଆରି ଅର୍ଲି ତିନାର୍, ହେୱାର୍ ରଚେ ନସ୍ଟ ଆନାର୍ । ଇନେକିଦେଂକି ହେୱାର୍ତି କାମାୟ୍ ଆରି ହାନ୍ଦାୟ୍ସବୁ ପୁନାପ୍, ସବୁ ଦେସ୍ନିକାର୍ ଆରି ବାସାନିକାର୍ ମାନାୟାରିଂ ମା ରୁଣ୍ଡାୟ୍ କିନାକା ସମୁ ୱାନାତା ଆରି ହେୱାର୍ ୱାଜ଼଼ି ମା ଗାଜା ପାଣ୍ ହୁଡ଼ନାର୍ । ଆରେ, ଆପ୍ ହେୱାର୍ତି ବିତ୍ରେ ର ଚିନ୍ ରଚ୍ନାସ୍ ଆରି ହେୱାର୍ତି ବିତ୍ରେତାଂ ରାକ୍ୟାପାୟାତି ମାନାୟ୍ତିଂ ଆପ୍ ବାରବିନ୍ ଦେସ୍ନିକାର୍ ଲାଗାୟ୍, ତର୍ସିସ୍, ପୁଲ, ଲୁଦ, ଇମ୍ଣାକାର୍ ୱିଲ୍ଆସ୍ତାକାନ୍, ତୁବଲ ଆରି ଜବନ ୱିସ୍ତିକିଂ ଇମ୍ଣି ଦେହାନି ଏସ୍କୁପ୍ଲିଂ ମାଦାଂ ଡାକ୍ପୁଟା ବିସ୍ରେ ଇନାୱେଡ଼଼ାଂ ୱେନ୍ୱାତାର୍ନା, କି ମା ସାକ୍ତି ହୁଡ୍ୱାତାର୍ନା, ହେୱାର୍ତି ଲାଗାୟ୍ ପକ୍ନାସ୍ ଆରି ହେୱାର୍ତି ବାରବିନ୍ ଦେସ୍ନିକାର୍ ବିତ୍ରେ ମାଦି ଗାଜା ପାଣ୍ ହପ୍ନାନ୍ । ଆରେ, ନିତ୍ରେମାପ୍ରୁ ଇନାନ୍, ଇସ୍ରାଏଲ୍ନି ହିମ୍ଣାଂ ଇନେସ୍ ସକଟ୍ ବାହାତ ନିତ୍ରେମାପ୍ରୁତି ଇଞ୍ଜ ଇନାମ୍ ତାନାର୍, ହେଲାକେ ହେୱାର୍ ମି ଟଣ୍ଡାର୍ ୱିଜ଼଼ାରିଂ ନିତ୍ରେମାପ୍ରୁ ଉଦେସ୍ତ ଇନାମ୍ କାଜିଂ, ସବୁ ଦେସ୍ନିକାର୍ ବିତ୍ରେତାଂ ହେୱାରିଂ ଗଡ଼ା, ଗଡ଼଼ାଗାଡ଼଼ି ଆରି ଚଦଲ, କଚର ଆରି ଚାଣ୍ଡେହନ୍ନି ପସୁଙ୍ଗ୍ ଜପି ମା ପୁଇପୁୟା ମାଡ଼଼ି ଜିରୁସାଲମ୍ତ ତାହିୱାନାନ୍ । ଆରେ, ଆପ୍ ହେୱାର୍ତି ବିତ୍ରେତାଂ ମାପ୍ରୁହେବାକିନାକାନ୍ ଆରି ଲେବିୟ ଆନି କାଜିଂ ମାନାୟ୍ ଇଟ୍ନାନ୍, ଇଦାଂ ନିତ୍ରେମାପ୍ରୁ ଇନାନ୍ । “ଇନାକିଦେଂକି ଆପ୍ ଇମ୍ଣି ପୁନି ଆକାସିଂ ଆରି ପୁନି ପୁର୍ତି ମାପ୍ରୁତି ସାକ୍ତିତ ରଚ୍ନାକା, ହେଦାଂ ଇନେସ୍ ନା ମୁମ୍ଦ ତାଇ ଆନାତ୍, ହେଲାକେ ମି ବଁସ୍ ଆରି ମି ତର୍ ତିର୍ ଆନାତ୍, ଇଦାଂ ନିତ୍ରେମାପ୍ରୁ ଇନାନ୍ । ଆରେ, ର ଉୱାଁସ୍ତାଂ ବିନ୍ ଉଁୱାସ୍ ପାତେକ୍ ଆରି ର ଜମ୍ନିବାର୍ତାଂ ବିନ୍ ଜମ୍ନିବାର୍” ପାତେକ୍ ସବୁ ମୟିତ୍ ମା ମୁମ୍ଦ ଜୱାର୍ କିନିକାଜିଂ ୱାନାର୍, ଇଦାଂ ନିତ୍ରେମାପ୍ରୁ ଇନାନ୍ । “ଆରେ, ହେୱାର୍ ବାର୍ତ ହାଲ୍ଜି, ଇମ୍ଣାକାର୍ ନା ବିରୁଦ୍ତ ପାପ୍ କିତାର୍ନା, ହେ ମାନାୟାରିଂ ମାଡ଼଼ା ହୁଡ୍ନାର୍; ଇନାକିଦେଂକି ହେୱାର୍ତି ପ୍ଡିକୁ ହାଉତ୍, କିବା ହେୱାର୍ତି ନାଣି ହାଉତ୍; ଆରେ, ହେୱାର୍ ୱିଜ଼଼ୁ ପୁର୍ତିତ ଗିଣ୍ପାଦ୍ ଆନାର୍ ।”
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.