Pengo Bible
ଜିସାଇୟ 65
ବିଚାର୍ ଆରି ଉଦାର୍
“ଇମ୍ଣାକାର୍ ମା ବିସ୍ରେ ୱେନ୍ବାଆତାର୍, ହେୱାର୍ତି ଦୁୱେର୍ ଆପ୍ ଦାହ୍ନାସା; ଇମ୍ଣାକାର୍ ମାଙ୍ଗ୍ ଦାସ୍ତାୱାତାର୍, ହେୱାର୍ ମାଙ୍ଗ୍ ପାୟାତାର୍ଣ୍ଣା; ଇମ୍ଣି ଦେସ୍ନି ମାନାୟାର୍ ମା ତର୍ଦ ଡାକ୍ପୁଟା ଆୱାଦାଂ ମାଚାର୍, ହେୱାରିଂ, ମାଙ୍ଗ୍ ହୁଡ଼୍ଦାଟ୍, ମାଙ୍ଗ୍ ହୁଡ଼୍ଦାଟ୍ ଇଞ୍ଜି ଆପ୍ ଇଚାପ୍ । ଇମ୍ଣାକାର୍ ଜାର୍ ଜାର୍ ହାନ୍ଦାୟ୍କିନିସାବ୍ରେ ବାନ୍ୟାହାଜ଼ିତ ହାନାର୍, ଏଲେଙ୍ଗ୍ ଗଣ୍ଡ୍ଗଲିଆ ମାନାୟାର୍ କାଜିଂ ଆସେଙ୍ଗ୍ ୱେଡ଼ାବୁଡି ଜାର୍ କେଇ ଲାମାୟ୍ କିତାସ୍ନା; ହେ ମାନାୟାର୍ ବାଡ଼୍ଦ ପୁଜାକିଜ଼ି ଆରି ଅଲପ୍ ଇଟା ଜପି ଦୁପ୍ନି ନାଣି ଆହିକିଜ଼ି ମା ମୁମ୍ ଆଗେ ନିତ୍ରେ ନିତ୍ରେ ମାଙ୍ଗ୍ ରିସା କିଦ୍ନାର୍; ହେୱାର୍ ଦୁଗେର୍ବାହା ବିତ୍ରେ କୁଚ୍ନାର୍ ଆରି ଡ଼ୁକ୍ତି ବାହାତ ବାହା କିନାର୍; ହେୱାର୍ ପାଞ୍ଜି ଜେଇ ତିନାର୍ ଆରି ହେୱାର୍ତି ବାହାତ ଗିଣ୍ ଜେଇନି ଜଡ଼ାଙ୍ଗ୍ ମାନିକ୍; ହେୱାର୍ ଇନାର୍, ଜାର୍ବାହାତ ନିଲାଟ୍, ମା ଲାଗାଂ ୱାମାଟ୍, ଇନେକିଦେଂକି ଆପ୍ ମିଙ୍ଗ୍ ପିସ୍ତି ପୁଇପୁୟା; ଇୱାର୍ ମା ମୁଙ୍ଗେଲ୍ତ ଦରମ୍ ଲାକେ, ୱେଡ଼ାବୁଡି ଆସ୍ତିନାଣି ଲାକେ । ହୁଡ଼ାଟ୍, ମା ମୁମ୍ଦ ଇଦାଂ ଲେକାତାତ୍ନା; ଆପ୍ ଚିମ୍ରାଜ଼ି ମାନୁସ୍, ମତର୍ ପାତିପାଡ଼୍ ହିନାସ୍, ଆଁ, ଆପ୍ ହେୱାର୍ ୱାକ୍ତ ପାତିପାଡ଼୍ ହିନାସ୍,” ନିତ୍ରେମାପ୍ରୁ ଇନାନ୍, “ମାଡ଼ିଙ୍ଗ୍ ଜପି ଦୁପ୍ନିକତ୍ନାଦେରା ଆରି ହାରୁମାଡ଼ି ଜପି ମାଙ୍ଗ୍ ନିନ୍ଦାକିଦ୍ନାଦେରା ଜେ ଏପେଙ୍ଗ୍, ମି ପାପ୍ ଆରି ମି ଆକର୍ଦାଦିର୍ ପାପ୍ସବୁ ପାତିପାଡ଼୍ ଆସେଙ୍ଗ୍ ରମାଡ୍ ହିନାସ୍; ଇଦାଂକାଜିଂ ଆପ୍ ପର୍ତୁମ୍ ହେୱାର୍ତି କାମାୟ୍ ହିସାବ୍ କିଜ଼ି ହେୱାର୍ ୱାକ୍ତ ହିନାସ୍ ।” ନିତ୍ରେମାପ୍ରୁ ଇ କାତା ଇନାନ୍, “ଅଙ୍ଗୁର୍ ଜୁବ୍ଡ଼ାତ ଇନେସ୍ ପୁନି ଅଙ୍ଗୁର୍ରାସ୍ ଗାଟା ଆଦ୍ନାତ୍ ଆରି ମାନାୟାର୍ ଇନାର୍, ଇଦାଂ ନସ୍ଟ କିମାଟ୍, ଇନେକିଦେଂକି ଇବେ ଆର୍ସିବାଦ୍ ମାନାତ୍; ହେଲାକେ ଆପ୍ ଜାର୍ ଆଡ଼ିୟାର୍ କାଜିଂ କିନାସ୍, ଆପ୍ ୱିଜ଼ାରିଂ ନାସ୍ କିଉସ୍ । ଆରେ, ଆପ୍ ଜାକୁବ୍ତାଂ ର ଲାତ୍ରା ଆରି ଜିହୁଦାତାଂ ମା ମାଡ଼ିଙ୍ଗ୍ନି ର ଆଦିକାରି ଉବ୍ଜାୟ୍ କିନାସ୍ ଆରି ମା ବାଚିକିତି ମାନାୟାର୍ ହେଦାଂ ଆଦିକାର୍ କିନାର୍ ଆରି ମା ଆଡ଼ିୟାର୍ ହେବେ ବାହା କିନାର୍ । ଆରେ, ମା ଇମ୍ଣି ମାନାୟାର୍ ମାଙ୍ଗ୍ ଦାସ୍ତାନାର୍, ହେୱାର୍ କାଜିଂ ସାରଣନି ର ମେଣ୍ଡାହାଡ଼ା ଆରି ଆକର୍ ଜଲା କଡିମାନ୍ଦାନି ହୁଞ୍ଜ୍ନି ବାହା ଆନାତ୍ । ମତର୍ ନିତ୍ରେମାପ୍ରୁତିଂ ପିହ୍ନାଦେରା, ମା ପୁଇପୁୟା ମାଡ଼ିତ ବାଣାନାଦେରା, ଗାଦ ଉଦେସ୍ତ ପାଟା ଗାଡ଼ିକିନାଦେରା ଆରି ରଚ୍ଚାକା ପେନ୍ ଉଦେସ୍ତ ମେହାତି ଅଙ୍ଗୁର୍ରାସ୍ ବାର୍ତି କିତାଦେର୍ଣ୍ଣା ଜେ ଏପେଙ୍ଗ୍, ଏପେଙ୍ଗ୍ ୱିଜ଼ାଦେର୍ କାଣ୍ଡା ଅହ୍ନି ବାହାତ ଟଡ୍ନାଦେର୍; ଇନେକିଦେଂକି ଆପ୍ କୁକ୍ତି ୱାଡ଼ାଂ ଏପେଙ୍ଗ୍ ଉତର୍ ହିଦ୍ୱାତାଦେର୍; ଆପ୍ କାତା ଇଞ୍ଜ୍ନି ୱାଡ଼ାଲିଂ ଏପେଙ୍ଗ୍ ୱେନ୍ୱାତାଦେର୍; ମତର୍ ମା କାଣ୍କୁକାଂ ଇନାକା ବାନ୍ୟା, ହେଦାଂ ନେ ଏପେଙ୍ଗ୍ କିତାଦେର୍ ଆରି ହେବେ ଆପେଙ୍ଗ୍ ସାରି ଆକାୟ୍, ହେଦାଂ ନେ ବାଚି କିତାଦେର୍ ।” ଇଦାଂ କାଜିଂ ମାପ୍ରୁ ନିତ୍ରେମାପ୍ରୁ ଇ କାତା ଇନାନ୍, “ହୁଡ଼ାଟ୍, ମା ଆଡ଼ିୟାର୍ ତିନାର୍, ମତର୍ ଏପେଙ୍ଗ୍ ଏସ୍କି ଆନାଦେର୍; ହୁଡ଼ାଟ୍, ଆଡ଼ିୟାର୍ ୱାରି କିନାର୍, ମତର୍ ଏପେଙ୍ଗ୍ ଲାଜୁ ଆନାଦେର୍; ହୁଡ଼ାଟ୍, ମା ଆଡ଼ିୟାର୍ ମାନ୍ନି ସୁକ୍ କାଜିଂ କେର୍ନାର୍, ମାତର୍ ଏପେଙ୍ଗ୍ ଚିନ୍ତାତ ଦୁକ୍ କାଜିଂ ଆଡ଼୍ବାନାଦେର୍ ଆରି ଜିବୁନ୍ ରିସା କାଜିଂ କାକୁଲ୍ତି ଆନାଦେର୍ । ଆରେ, ଏପେଙ୍ଗ୍ ମା ବାଚିକିତି ମାନାୟାର୍ ଲାଗାଂ ମି ତର୍ ପାର୍ମାଣ୍ ଲାକେ ଇଟ୍ୟାନାତ୍ ଆରି ମାପ୍ରୁ, ନିତ୍ରେମାପ୍ରୁ ମିଂ ଅସ୍ତାନାନ୍; ହେୱାନ୍ ଜାର୍ ଆଡ଼ିୟାରିଂ ବିନ୍ ତର୍ଦ ଡାକ୍ପୁଟାୟ୍ କିନାନ୍; ହେବେ ଇମ୍ଣି ମାନାୟ୍ ପୁର୍ତିତ ଜାର୍ତିଂ ଆର୍ସିବାଦ୍ କିନାନ୍, ହେୱାନ୍ ହାତ୍ପା ପର୍ମେସ୍ୱର୍ତାଂ ଜାର୍ତିଂ ଆର୍ସିବାଦ୍ କିନାନ୍ ଆରି ଇମ୍ଣି ମାନାୟ୍ ପୁର୍ତିତ ରାଣ୍ ଇଟ୍ନାନ୍, ହେୱାନ୍ ହାତ୍ପା ପର୍ମେସ୍ୱର୍ ହୁକେ ପାର୍ମାଣ୍ ଇଟ୍ନାନ୍; ଇନେକିଦେଂକି ଆଗେକାଡ଼୍ କସ୍ଟସବୁ ୱିଣ୍ଡ୍ତାନ୍ନା ଆରି ହେଦାଂ ସବୁ ମା କାଣ୍କୁତାଂ ଡ଼ୁକ୍ତାତ୍ନା ।
ପୁନି ଉବ୍ଜାଣ୍
ଇନେକିଦେଂକି ହୁଡ଼ାଟ୍, ଆସେଙ୍ଗ୍ ପୁନି ଆକାସିଂ ଆରି ପୁନି ପୁର୍ତି ଉବ୍ଜାଣ୍ କିନାସ୍ ଆରି ଆଗେକାଡ଼୍ନି ବିସ୍ରେସବୁ ଏତୁ କିୟା ଆଉତ୍, କି ମାନ୍ତ ଏତୁ ୱାଉତ୍ । ମତର୍ ଇନାକା ଆସେଙ୍ଗ୍ ହୁଡ଼୍ନାସ୍, ଏପେଙ୍ଗ୍ ଜାଇଜୁଗ୍ ହେବେ ୱାରିକିଜ଼ି ୱାରିକିୟାଟ୍; ଇନେକିଦେଂକି ହୁଡ଼ାଟ୍, ଆସେଙ୍ଗ୍ ଜିରୁସାଲମ୍ତ ସୁକ୍ ଇସାବ୍ରେ ଆରି ହେବେନି ମାନାୟାରିଂ ୱାରିନି ଲକୁ କିନାସ୍ । ଆରେ, ଆପ୍ ଜିରୁସାଲମ୍ତ ସୁକ୍ ଆନାସ୍ ଆରି ମାନାୟାର୍ତାକେ ୱାରି କିନାସ୍; ଆରେ, ହେ ବିତ୍ରେ ଗାଲ୍ଗାଲ୍ଇନି ସବଦ୍, କି ଆଡ଼୍ବିନି ସବଦ୍ ଆରେ ୱେନ୍ୟା ଆଉତ୍ । ହେସମୁତାଂ ହେ ବାହାତ ଅଲପ୍ ଦିନ୍ନି କାଡ଼୍ଦେ କି ବାର୍ତିୱାତି ବୁଡ଼ାଲୁ ମାନାୟ୍ ଆରେ ମାନ୍ଗୁର୍: ଇନେକିଦେଂକି କାଡ଼୍ଦେ ସହେ ବାର୍ହୁ ବୟସ୍ତ ହାନାନ୍ ଆରି ପାପ୍ୟା ସହେ ବାର୍ହୁ ବୟସ୍ ଆଜ଼ି ସାଇପ୍ ପାୟାନାନ୍ । ଆରେ, ମାନାୟାର୍ ଇଲ୍ ରଚ୍ଚି ହେବେ ବାହା କିନାର୍ ଆରି ହେୱାର୍ ଅଙ୍ଗୁର୍ବାଡ଼୍ ଜାଗ୍ରତ୍ କିଜ଼ି ହେବେନି ପାଡ଼୍ ତିନାର୍ । ହେୱାର୍ ରଚ୍ଚିସ୍, ବିନ୍ନିକାନ୍ ହେବେ ବାହା କିଉନ୍; ହେୱାର୍ ରୁସ୍ତାର୍, ବିନ୍ନିକାନ୍ ପାଡ଼୍ ବଗି କିଉନ୍; ଇନେକିଦେଂକି ମା ମାନାୟାର୍ତି ଆଁଇସ୍ ମାର୍ନି ଆଁଇସ୍ ଲାକେ ଆନାତ୍ ଆରି ମା ବାଚିକିତି ମାନାୟାର୍ ବେସି କାଡ଼୍ ପାତେକ୍ ଜାର୍ତି କେଇଦାଂ କିତି ପାଡ଼୍ ବଗି କିନାର୍ । ହେୱାର୍ ପଲ୍ୟା କସ୍ଟ କିଉର୍, କି ବିପଦ୍ କାଜିଂ ଜଲମ୍ କିଉର୍; ଇନେକିଦେଂକି ହେୱାର୍ ଆରି ହେୱାର୍ ଲାହାଂ ହେୱାର୍ ମାଜ଼ିର୍, ନିତ୍ରେମାପ୍ରୁତି ଆର୍ସିବାଦ୍ନି ଲାତ୍ରା ଆନାର୍ । ଆରେ, ଇଦାଂ ଗିଟାନାତ୍ ଜେ, ହେୱାର୍ କୁକ୍ତିନି ଆଗେ ଆପ୍ ଉତର୍ ହିନାସ୍ ଆରି ହେୱାର୍ କାତା ଇନୁ ଇନୁ ଆପ୍ ୱେନାସ୍ । ହୁଣ୍ଡାର୍ବୁର୍କା ଆରି ମେଣ୍ଡାହିମ୍ଣା ରଚେ ଚରିକିନିକ୍ ଆରି ସିୟଁ କଡି ଲାକେ କାଚ୍ରା ତିନାତ୍; ଆରେ, ଦୁଡ଼ି ରାଚ୍ତି କାଦି ଆନାତ୍ । ହେୱାର୍ ମା ପୁଇପୁୟା ମାଡ଼ିନି ଇମ୍ଣି ବାହାତ ଡାରା କି ନାସ୍ କିଉର୍,” ନିତ୍ରେମାପ୍ରୁ ଇଦାଂ ଇନାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.