Pengo Bible
ଦାନିୟେଲ୍ 1
ବାବିଲନ୍ତ ତା ହାଙ୍ଗ୍ଦାକାର୍ ଆରି ଦାନିୟେଲ୍
(୧:୧-୬; ୧:୨୧)
ନବକୁଦନିସ୍ଚର୍
ଜିହୁଦାନି ରାଜା ଜିହୟାକିମ୍ନି ସାସନ୍ କାଡ଼୍ଦ ତିନ୍ ବାର୍ହୁତ ବାବିଲ୍ନି ରାଜା ନବୁକଦ୍ନିତ୍ସର୍ ଜିରୁସାଲମ୍ତ ୱାଜ଼ି ହେଦାଂ ମୁକ୍ତାନ୍ ।
(୨ ବଂସାବଲି ୩୬:୭)
ଆରେ, ମାପ୍ରୁ ଜିହୁଦାନି ରାଜା ଜିହୟାକିମ୍ତିଂ ଆରି ପର୍ମେସ୍ୱର୍ତି ଇଲ୍ନି କେତେକ୍ ବାହା ତା କେଇଦ ହେଲାୟ୍ କିତାନ୍; ହେବେ ହେୱାନ୍ ସିନିୟନି ଦେସ୍ତ ମାନି ଜାର୍ ପେନ୍ ମନ୍ଦିର୍ତ ହେସବୁ ଅତାନ୍ ଆରି ବାହା ସବୁ ହେୱାନ୍ ଜାର୍ ପେନ୍ନି ଗୁଦାମ୍ ଇଞ୍ଜ ଇଡ୍ତାନ୍ ।
ଆରେ, ରାଜା ଇସ୍ରାଏଲ୍ନି ହିମ୍ଣାଂ ବିତ୍ରେତାଂ, ଇଚିସ୍, ରାଜ୍ନିକାର୍ ଆରି କୁଟୁମ୍ ବଁସ୍ତାଂ କୁନିଆୱି, ହଲ୍ନାକା ଆରି ସବୁ ଗିୟାନ୍ତ ଆଡ୍ନାକାନ୍, ବିଦ୍ୟାତ ଚାତୁର୍, ବୁଦିତ ଗିଆନ୍ ଆରି ରାଜାଇଞ୍ଜ ନିଲ୍ତେଂ ଜଗ୍ କେତେକ୍ ବେଣ୍ଡ୍ୟା ଲଗାଂ ତାତେଂ ଆରି କଲଦିୟ ବିଦ୍ୟା ଆରି ବଚନ୍ ହିକାୟ୍ କିଦେଂ ଜାର୍ତି ବେଜୁଆଦିକାରି ଅସ୍ପନସ୍ତିଂ ଇଚାନ୍ । ଆରେ, ହେୱାର୍ ଇନେସ୍ ତିନ୍ ବାର୍ହୁନି ହାରିହାରାତ ରାଜାତି ଲାଗାୟ୍ ନିଲ୍ନାର୍, ଇଦାଂକାଜିଂ ରାଜା ହେୱାର୍ତି କାଜିଂ ରାଜାତି କାଦିନି ଜିନିସ୍ତାଂ ଆରି ଉଣି ଅଙ୍ଗୁର୍ରାସ୍ତାଂ ନିତ୍ରେ ବାଗ୍ ହିନି କାଜିଂ ଆରି ତିନ୍ ବାର୍ହୁ ପାତେକ୍ ହେୱାର୍ତି ପହାପାଲି କିନି କାଜିଂ ବାଚି କିତାନ୍ । ଇୱାର୍ତି ବିତ୍ରେ ଜିହୁଦା ବଁସ୍ନିକାର୍ ଦାନିୟେଲ୍, ହନାନିୟ, ମିସାୟେଲ୍ ଆରି ଅସରିୟ ମାଚାର୍ । ଆରେ, ବେଜୁଆଦିକାରି ହେୱାରିଂ ତର୍ ହିତାନ୍; ହେଦେଲ୍ ଦାନିୟେଲ୍ତିଂ ବେଲ୍ଟସତ୍ସର୍, ହନାନିୟତିଂ ସଦ୍ରକ୍, ମିସାୟେଲ୍ତିଂ ମୈସକ୍ ଆରି ଅସରିୟତିଂ ଅବେଦ୍ ନଗ ତର୍ ହିତାତ୍ ।
ଦାନିୟେଲ୍ତି ପାର୍ତି
ମତର୍ ରାଜାତି କାଦିନିକା ଜିନିସ୍ତ ଆରି ତା ଉଣି ଅଙ୍ଗୁର୍ରାସ୍ତ ଜାର୍ତିଂ ବିଟାଡ଼୍ କିୱି କାଜିଂ ଦାନିୟେଲ୍ ନିଜ୍ ମାନ୍ତ ତିର୍ କିତାନ୍; ଇଦାଂକାଜିଂ ହେୱାନ୍ ଇନେସ୍ ଜାର୍ତିଂ ବିଟାଡ଼୍ କିଉନ୍, ଇଦାଂକାଜିଂ ହେୱାନ୍ ବେଜୁଆଦିକାରିତିଂ ଗୱାରି କିତାନ୍ । ହେଏଚେକାଡ଼୍ଦ ପର୍ମେସ୍ୱର୍ ହେ ବେଜୁଆଦିକାରିତି କାଣ୍କୁତ ଦାନିୟେଲ୍ତିଂ ଉପ୍କାର୍ ଆରି ଦୟାନି ଲଗୁ କିତାତ୍ । ହେବେ ବେଜୁଆଦିକାରି ଦାନିୟେଲ୍ତିଂ ଇଚାନ୍, ଜେ ମି ତିନାକା ଆରି ଉଣାକା ଜିନିସ୍ ତିର୍ କିତାର୍ଣ୍ଣା, ଆନ୍ ଜାର୍ ମାପ୍ରୁ ହେ ଗାଜାରାଜାତିଂ ପାଣ୍ଡ୍ରା ଆନାଙ୍ଗ୍; ଇନେକିଦେଂକି ହେୱାନ୍ ମି ହମାନ୍ ବୟିସ୍ ବେଣ୍ଡ୍ୟାର୍ ମୁମ୍ ବାଟା ମି ମୁମ୍ ଇନାକିଦେଂ ଆର୍ତାକା ହୁଡ଼୍ନାନ୍ ? ତାଆତିସ୍, ଏପେଙ୍ଗ୍ ରାଜାତି ଲାଗାୟ୍ ନା କାପ୍ଡ଼ାତିଂ ହେଲାୟ୍ କିନାଦେର୍ ।
ହେବେ ବେଜୁଆଦିକାରି ଦାନିୟେଲ୍, ହନାନିୟ, ମିସାୟେଲ୍ ଆରି ଅସରିୟତି ଜପି ଇମ୍ଣି ଇଲ୍ମୁଣିକା ବାଚି କିଜ଼ି ମାଚାନ୍, ହେଦେଲିଂ ଦାନିୟେଲ୍ ଇଚାନ୍; ଉପ୍କାର୍ କିଜ଼ି ଜାର୍ ଆଡ଼୍ୟାରିଂ ଦସ୍ ଦିନ୍ ପରିକ୍ୟା କିୟା; ମାଂ ତିନି କାଜିଂ କୁଚାକ୍ଡାୱା ଆରି ଉଣି କାଜିଂ ଏସ୍ ହିଦ୍ୟାୟେତ୍ । ତାପାଚେ ନି ମୁମ୍ଦ ମା ମୁମ୍ ଆରି ରାଜାର୍ କାଦି ତିନାକାର୍ ବେଣ୍ଡ୍ୟାର୍ତି ମୁମ୍ ଲାକେ ଚଞ୍ଜ୍ୟା ଆୟେତ୍; ହେବେ ଏନ୍ ଇନେସ୍ ହୁଡ଼୍ନାୟ୍, ହେ ଇସାବ୍ରେ ଏନ୍ ଆଡ଼୍ୟାର୍ କାଜିଂ ବେବାର୍ କିଆ ।
ହେବେ ହେଦେଲ୍ ଇ ବିସ୍ରେ ହେୱାର୍ତି କାତା ଇଡ଼୍ଜି ଦସ୍ ଦିନ୍ ପାତେକ୍ ହେୱାର୍ତି ପରିକ୍ୟା କିତାତ୍ । ଆରେ, ଦସ୍ ଦିନ୍ନି ହାରିହାରାତ ରାଜାର୍ କାଦି ତିନାକାର୍ ସବୁ ବେଣ୍ଡ୍ୟାର୍ତି ମୁମ୍ ବାଟା ହେୱାର୍ତି ମୁମ୍ ହାର୍ ଚଞ୍ଚାତ୍ ଆରି ହେୱାର୍ ଆଦିକ୍ ଦୁମା ଚଞ୍ଚାର୍ । ଇବେଣ୍ଡାଂ ଇଲ୍ମୁଣିକା ହେୱାର୍ତି ହେ ତିନାକା ଆରି ଉଣାକା ଅଙ୍ଗୁର୍ରାସ୍ ଟେବାୟ୍ କିଜ଼ି ହେୱାରିଂ କୁଚାକ୍ଡାୱା ହିତାତ୍ ।
ଆରେ, ପର୍ମେସ୍ୱର୍ ଚାର୍ ବେଣ୍ଡ୍ୟାରିଂ ସବୁ ବିଦ୍ୟା ଆରି ଗିଆନ୍ତ, ବୁଦି ଆରି ଆଡ୍ନାକା ହିତାନ୍ ଆରେ, ଦାନିୟେଲ୍ ବାର୍ବିନ୍ନିକା ଦର୍ସନ୍ ଆରି କ୍ଡେଞ୍ଜ୍କଣ୍ ବିସ୍ରେ ବୁଦିମାନ୍ ଆତାନ୍ ।
ଆରେ, ରାଜା ହେୱାରିଂ ତା ଲାଗାଂ ତାନି କାଜିଂ ସମୁ ତିର୍ କିଜ଼ି ମାଚାନ୍, ହେଦାଂ ତିନ୍ ବାର୍ହୁ ୱିସ୍ତିଲେ, ବେଜୁଆଦିକାରି ହେୱାରିଂ ନବୁକଦ୍ନିତ୍ସରତି ଲାଗେ ତାହିୱାତାତ୍ । ଆରେ, ରାଜା ହେୱାର୍ତି ଲାହାଂ ବେଣ୍ବାଟ୍ କିତାନ୍; ଆରେ, ହେ ୱିଜ଼ାର୍ ବିତ୍ରେ ଦାନିୟେଲ୍, ହନାନିୟ, ମିସାୟେଲ୍ ଆରି ଅସରିୟ ହମାନ୍ ଇନେର୍ ଚଞ୍ଜ୍ୱାତାର୍; ଲାଗିଂ ରାଜାର୍ କାମାୟ୍ତ ବାଚିକିୟାତାନ୍ । ଆରେ, ଗିଆନ୍ ଆରି ବୁଦି ବିସ୍ରେନିକା ଇମ୍ଣାକାପା କାତା ରାଜା ହେୱାରିଂ ୱେନ୍ବିତିସ୍, ହେ ସବୁ ବିସ୍ରେ ହେୱାନ୍ ଜାର୍ ସବୁ ରାଜିନିକା ସବୁନିକା ଚୁଟ୍କିୟାର୍ ଆରି ଡିହୁରିର୍ ବାଟା ହେୱାର୍ତି ପାଣ୍ଡିତ୍ ଦସ୍ ଗୁଣ୍ ଆଦିକ୍ ହୁଡ଼୍ତାନ୍ । ଆରେ, ଦାନିୟେଲ୍ କରସ୍ ରାଜାତି ପର୍ତୁମ୍ ବାର୍ହୁ ପାତେକ୍ ମାଚାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.