Pengo Bible
ହିକ୍ୟାହିନାକା 1
ସବୁ ଆହାର୍
ଦାଉଦତି ମେହି, ଜିରୁସାଲମ୍ନି ରାଜା, ହିକ୍ୟାହିନି ବଚନ୍କୁ । ହିକ୍ୟାହିନାକାନ୍ ଇନାନା, ବେକାର୍ନି ବେକାର୍, ବେକାର୍ନି ବେକାର୍, ସବୁ ନେ ବେକାର୍ । ମାନାୟ୍ ୱେଡ଼ାଂ ତାରେନ୍ ଇମ୍ଣି ଇମ୍ଣି କାମାୟ୍ତ ୱାଡ଼଼ାକ୍ ଆନାର୍, ହେସବୁ ଇନା ଲାବ୍ ? ର ଟିକ୍ ହାନାତ୍ ଆରି ବିନ୍ ଟିକ୍ ୱାନାତ୍; ମତର୍ ପୁର୍ତି ସବୁୱେଡ଼଼ାଂ ମାନ୍ଗାନାତ୍ । ୱେଡ଼ା ହତ୍ନାତ୍ ଆରି ୱେଡ଼ା ହାନାତ୍, ଆରେ ଜାର୍ ହତ୍ନି ବାହାତ ହାନି କାଜିଂ ଜାତୁନ୍ ଆନାତ୍ । ଡ଼ୁଇ ଦିଗିନି ଦିଗ୍ତ ହାନାତ୍ ଆରି ପାଲନିପ ମାସ୍ନାତ୍; ଜାର୍ ହାଜ଼ିତ ନିତ୍ରେ କିନ୍ଦ୍ରାନାତ୍ ଆରି ଡ଼ୁଇ ଜାର୍ କିନ୍ଦ୍ରାଣିତ ଆରେରଗ ମାସ୍ନାତ୍ । ନାଗୁଡ୍ ସବୁ ହାମ୍ଦୁର୍ତାକେ ବଡ଼ାଜ଼଼ି ହାନିକ୍, ଆତିସ୍ପା ହାମ୍ଦୁର୍ତ ବାର୍ତି ଆଉତ୍; ନାଗୁଡ଼ିଂ ସବୁ ଜାର୍ ଜାର୍ ହାନି ବାହାତ ଆରେରଗ ହାନିକ୍ । ସବୁ ବିସ୍ରେ ଦାନ୍ଦା; ମାନାୟ୍ ହେଦାଂ ହାନ୍ଦାୟ୍ କିଦେଂ ଆଡୁନ୍; କାଣ୍ଗା ହୁଡ଼୍ନିତ ସାରି ଆକାୟ୍, କି କିତୁଲ୍ ୱେନିତ ସାରି ଆକାୟ୍ । ଇନାକା ଆତାତ୍ନା, ହେଦାଂ ନେ ଆନାତ୍ ଆରି ଇନାକା କିୟାତାତ୍ନା, ହେଦାଂ ନେ କିୟାନାତ୍; ଆରେ ୱେଡ଼ା ତାରେନ୍ ଇନାକାପା ପୁନି ବିସ୍ରେ ଆକାୟ୍ । ଇମ୍ଣି ବିସ୍ରେ ମାନାୟାର୍ ଇନାର୍, ହୁଡ଼ାଟ୍, ଇଦାଂ ପୁନାକା, ଏଲେଂ କି ଇମ୍ଣି ବିସ୍ରେ ମାନାତ୍ ? ହେଦାଂ ତ ଇଦାଂଆଗେ ମା ଆଗେକାଡ଼୍ନି ସମୁତ ମାଚାତ୍ । ଆଗେକାଡ଼୍ନି ମାନାୟାର୍ ବିସ୍ରେ ଇନାକାପା ଏତୁ ମାନ୍ଗୁତ୍; କି ୱାନିଦିନ୍ତି କାଡ଼୍ଦ ଇମ୍ଣାକାର୍ ଉପ୍ଜାନାର୍, ହେୱାର୍ତି ଏତ୍ ନେ ଉତରହିନାକା ୱାନିଦିନ୍ତ ମାନାୟାର୍ ବିତ୍ରେ ମାନ୍ଗୁତ୍ ।
ଗିଆନ୍ନି ବେକାର୍ନିକା
ଆନ୍ ହିକ୍ୟାହିନାକାଂ, ଜିରୁସାଲମ୍ତ ଇସ୍ରାଏଲ୍ ଜପି ରାଜା ମାଚାଙ୍ଗ୍ । ଆରେ, ଆକାସ୍ ତାରେନ୍ କିତି ସବୁ ବିସ୍ରେ ଗିୟାନ୍ ହୁଦାଂ ଆଲ୍ଚାନା ଆରି ଡେକ୍ନି କାଜିଂ ମାନ୍ଦିଆନ୍ କିତାଂ; ଇଦାହୁଦାଂ ପର୍ମେସ୍ୱର୍ ଜେ ମାନାୟ୍-ମାଜ଼ିରିଂ ତାନ୍ଦ୍ରା ଆଦେଂ ହିତାନ୍ନା, ଇଦାଂ ବେସି; କସ୍ଟନିକା । ୱେଡ଼ା ତାରେନ୍ କିତି ସବୁ କାମାୟ୍ ଆନ୍ ହୁଡ଼୍ତାଂନା; ଆରେ ହୁଡ଼ାଟ୍, ସବୁ ବେକାର୍, ଡ଼ୁଇନି ପାଚେ ହାନାକାର୍ ମତର୍ । ଇନାକା ବାଂଟା, ହେଦାଂ ହାଣ୍କୁ କିଦେଂ ଆଡୁତ୍, ଆରେ ଇନାକା ଅବାବ୍, ହେଦାଂ ଗାଣାକିୟା ଆଉତ୍ । ଆନ୍ ଜାର୍ ମାନ୍ତ ବାବିକିଜ଼ି ଇଚାଙ୍ଗ୍, ହୁଡ଼ା, ଜିରୁସାଲମ୍ତ ନା ଆଗେ ମାନି ସବୁ ମାନାୟାର୍ତାଂ ଆନ୍ ବେସି ଗିୟାନ୍ ପାୟାତାଂନା; ଆରେରଗ, ନା ମାନ୍ ଗିଆନ୍ ଆରି ବିଦ୍ୟାତ ବେସି ପୁନାକା ଆଦ୍ନାତା । ପାଚେ ଆନ୍ ଗିୟାନ୍ନି ଡ଼ୁକ୍ତାକା, ଆରେ ପାଗ୍ଲାନି ଆରି ଗିଆନ୍ହିଲ୍ୱି ଡ଼ୁକ୍ତାକା ପୁନି କାଜିଂ ମାନ୍ଦିୟାନ୍ କିତାଂ; ଇଦାଂ ନେ ଡ଼ୁଇନି ପାଚେହାନାକା ଇଞ୍ଜି ପୁଚାଙ୍ଗ୍ । ଇନାକିଦେଂକି ବେସି ଗିୟାନ୍ତ ବେସି ଦୁକ୍ ମାନ୍ଗାନାତ୍; ଆରେ, ଇନେନ୍ ବିଦ୍ୟାତ ବାଡାୟ୍ କିନାନ୍, ହେୱାନ୍ ଦୁକ୍ ବାଡାୟ୍ କିନାନ୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.