Pengo Bible
ହିତପଦେସ 31
ଲମୁୟେଲ୍ ରାଜାତି କାତା
ଲମୁୟେଲ୍ ରାଜାତି କାତା; ଇଚିସ୍, ତା ତେହି ତାଙ୍ଗ୍ ଇନାକା ହିକାୟ୍ କିଜ଼ି ମାଚାତ୍, ହେ କାତା । ଏ ନା ମାଜ଼ି, ଏ ନା ଗରବ୍ନି ମାଜ଼ି, ଏ ନା ମାନ୍ସି କିତି ମାଜ଼ି, ଆନ୍ ନିଂ ଇନାକା ଇନାଙ୍ଗ୍? ଏପେଙ୍ଗ୍ କଗ୍ଲେକାଂ ଜାର୍ ବାପୁ ହିମାଟ୍, କି ରାଜାର୍ ହେବେ ନସ୍ଟ ଆନାର୍, ହେବେ ତାଙ୍ଗ୍ମାଟ୍ । ଏ ଲମୁୟେଲ୍ ରାଜା, ଅଙ୍ଗୁର୍ରାସ୍ ଉଣାକା ହାର୍ ଆକାୟ୍, ରାଜାର୍ତି ହାର୍ ଆକାୟ୍; କି କାଲିଙ୍ଗ୍ ଇମେକ୍ ଇଞ୍ଜି ଇନାକା ସାସନ୍କାରିୟା ହାର୍ ଆକାୟ୍ । ହେୱାର୍ ଉଟିସ୍, ବିଦି ବାଣାଜ଼ି ଦୁକ୍ମାଜ଼ିର୍ ୱିଜ଼ାର୍ତି ବିଚାର୍ ବିନେ କିନାର୍ । ଅଚେତା ମାନାୟ୍ତିଂ କାଲିଙ୍ଗ୍ ହିୟାଟ୍ ଆରି ମାନ୍ତଦୁକ୍ ମାନାୟ୍ତିଂ ଅଙ୍ଗୁର୍ ରାସ୍ ହିୟାଟ୍ । ହେ ମାନାୟ୍ ଉଣ୍ଜି ଜାର୍ ଦୁକ୍ ବାଣା ଆଏନ୍ ଆରି ଜାର୍ କସ୍ଟ ଆରେ ମାନ୍ତ ଇଟ୍ମେନ୍ । ଗୁଲା ମାନାୟ୍ ପାକ୍ୟାତ, ୱିଜ଼ାର୍ ଟୁରାର୍ ପାକ୍ୟାତ, ଜାର୍ ୱେଇ ଜେନାନ୍ । ୱେଇ ଜେସି ସମାନ୍ ବିଚାର୍ କିନାନ୍, ଆରେ ଦୁକ୍ ଆରି ଅର୍କିତାରିଂ ହାର୍ବିଚାର୍ କିୟାଟ୍ ।
ସବୁ ଗୁଣ୍ନି କଗ୍ଲେ
ଗୁଣ୍ନି କଗ୍ଲେଙ୍ଗ୍ ଇନେର୍ ପାୟାନାର୍ ? ମୁକ୍ତାତାଂ ନେ ତା ମଲ୍ ଆଦିକ୍ । ତା ଆଣ୍ଡ୍ରେନ୍ ମାନ୍ ତା ତାକେ ବାର୍ସି କିନାନ୍, ଆରେ ତା ଲାବ୍ନି ଅବାବ୍ ଆଉତ୍ । ହେଦେଲ୍ ଜିବୁନ୍ ପାତେକ୍ ଆଣ୍ଡ୍ରେନ୍ତି ନସ୍ଟ କିୱାଦାଂ ହାର୍ କିନାତ୍ । ହେଦେଲ୍ ମେଣ୍ଡା ବୁରା ଆରି ମସିନା1 ଡେକ୍ଚି ସାରିତ ଜାର୍ କେଇଦ କାମାୟ୍ କିନାନ୍ । ହେୱାନ୍ ବେପାର୍ ଜାଜ୍ ଲାକେ; ହେୱାନ୍ ଦେହାତାଂ ଜାର୍ କାଦି ତେନାନ୍ । ହେଦେଲ୍ ପା ଅଜଡ଼୍ ଆୱିହିଂ ନିଙ୍ଗ୍ନାତ୍ ଆରି ଜାର୍ ଟଣ୍ଡାର୍ବାଇ ୱିଜ଼ାରିଂ କାଦି ଆରି ଆଡ଼ିୟାଣିକାଂ ସମାନ୍ କାମାୟ୍ ହିନାତ୍ । ହେ ଜମି ବିସ୍ରେ ବୁଜାଜ଼ି ହେଦାଂ କଡ଼୍ନାତ୍, ହେଦେଲ୍ ଜାର୍ କେଇନି ପାଡ଼୍ ହିଜ଼ି ଅଙ୍ଗୁର୍ବାଡ଼୍ ରୁସ୍ନାତ୍ । ହେଦେଲ୍ ବାପୁତ ଜାର୍ ମେଙ୍ଗାଙ୍ଗ୍ ଗାଚ୍ନାତ୍ ଆରି ଜାର୍ ବାପାଙ୍ଗ୍ ବାପୁ କିନାତ୍ । ଜାର୍ ବେପାର୍ ଜେ ଲାବ୍କିନାକା, ଇଦାଂ ହେଦେଲ୍ ବୁଜାନାତ୍; ଆରେ, ନାଣାକାଡ଼୍ଦ ତା ଅଜଡ଼୍ ହାଉତ୍ । ହେଦେଲ୍ ତା କେଇ ହୁଦାଂ ନୁଲ୍ ଡ଼ଚ୍ନାତ୍ ଆରି ଜାର୍ ହେନ୍ଦ୍ରାତିଂ ନିଜେ ରଚ୍ନାତ୍ । ହେଦେଲ୍ ଦୁକ୍ ମାନାୟାର୍ କାଜିଂ କେଇ ମେଲା କିଜ଼ି ହିନାତ୍ ଆରି ହିଲ୍ୱାକାର୍ କାଜିଂ ଜାର୍ କେଇ ଲାମାୟ୍ କିନାତ୍ । ହେଦେଲ୍ ଅସ୍ ଲାଗାଂ ଜାର୍ କୁଟୁମ୍ ବିସ୍ରେ ପାଣ୍ଡ୍ରା ଆଉତ୍; ଇନେକିଦେଂକି ତା ୱିଜ଼ୁ କୁଟୁମ୍ ଗେରୁବାନି ଉହୁମ୍ ହେନ୍ଦ୍ରା ଉସ୍ପାନାର୍ । ହେଦେଲ୍ ଜାର୍ କାଜିଂ କାବ୍ରାଚିତ୍ରା ହାର୍ଦି ହେନ୍ଦ୍ରା ଜାଗ୍ରତ୍ କିନାତ୍, ଆରେ ହେଦେଲ୍ ଡ଼ିଞ୍ଜ୍ନି କୱାଣ୍ହେନ୍ଦ୍ରା ଆରି ୱାଙ୍ଗାବାନି ହେନ୍ଦ୍ରା ଉସ୍ପାନାତ୍ । ତା ଆଣ୍ଡ୍ରେନ୍ ଦେସ୍ନି ବୁଡ଼ାଲୁର୍ ଲାହାଂ ଗାଡ଼୍ ଦୁୱେର୍ତ କୁଚ୍ନି ୱେଡ଼ାଲିଂ ଚିନ୍କିୟାନାନ୍ । ହେଦେଲ୍ କୱାଣ୍ ହେନ୍ଦ୍ରା ଜାଗ୍ରତ୍ କିଜ଼ି ପ୍ରନାତ୍, ଆରେ ବେପ୍ରିୟାର୍ କେଇଦ ମେଙ୍ଗାଂଗାଚ୍ନାକା ପା ପ୍ରନାତ୍ । ବାପୁ ଆରି ମାନିନିକା ତା ହେନ୍ଦ୍ରା ଲାକେ; ଆରେ, ୱାନିକାଡ଼୍ ବିସ୍ରେ ହେଦେଲ୍ ପାଣ୍ଡ୍ରା ଆଉତ୍ । ହେଦେଲ୍ ଗିଆନ୍ତ ଜାର୍ ୱେଇ ଜେନାତ୍; ତା ୱେନ୍ଦୁଲ୍ତ ଦୟାନି ବିଦି ମାନାତ୍ । ହେଦେଲ୍ ଜାର୍ କୁଟୁମ୍ନି ବେବାର୍ତ ଦିଆନ୍ କିନାତ୍, ଆରେ ନିସ୍ତାୟ୍ନି କାଦି ତିନୁତ୍ । ତା ମାଜ଼ିର୍ ନିଙ୍ଗ୍ଜି ତାଙ୍ଗ୍ ଦନ୍ୟ ଦନ୍ୟ ଇନାର୍ ଆରି ତା ଆଣ୍ଡ୍ରେନ୍ ପା ତାଙ୍ଗେଙ୍ଗ୍ ୱାରି କିନାନ୍; ହେନି ଗାଡ଼୍ଚେକ୍ ଗୁଣ୍ ଚଚ୍ଚିକ୍ନା, ମତର୍ ଏନେଙ୍ଗ୍ ହେ ୱିଜ଼େକାଂ ପିସ୍ତି ବେସି ହାର୍ ମାନାୟ୍ । ରଞ୍ଜ୍ନାକା ରାସିକା ଆନାକା ଆରି ହଲ୍ନାକା ବେକାର୍; ମତର୍ ଇମ୍ଣି କଗ୍ଲେ ନିତ୍ରେମାପ୍ରୁଙ୍ଗ୍ ପାଣ୍ଡ୍ରା ଆନାତ୍, ହେଦେଲ୍ ୱାରିନିକା ଆନାତ୍ । ତା କେଇନି ପାଡ଼୍ ତାଙ୍ଗ୍ ହିୟାଟ୍, ଆରେ ତା ନିଜ୍ କାମାୟ୍ ଗାଡ଼୍ ଦୁୱେର୍ତ ତା ୱାରି କିଏତ୍ ।
Source notes (1)
- Footnote ମସିନା ଇଚିସ୍ କୁଦ୍ଡ଼ା ମାର୍ତାଂ ଡରି ପେନ୍ଞ୍ଜି ହେ ଡରିତାଂ ନୁଲ୍ ଉନ୍ନ୍ଦି ଡ଼ଜ୍ଜି ମାଚାର୍ ଇଦିଲିଂ ମସିନା ଇନାର୍।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.