Pengo Bible
ହିକ୍ୟାହିନାକା 2
ସୁକ୍ବଗନି ବେକାର୍
ଆନ୍ ଜାର୍ ମାନେ ମାନେ ଇଚାଙ୍ଗ୍, ୱାଡ, ଆନ୍ ନଂ ମିଂ ୱାରି ହୁଦାଂ ପରିକ୍ୟା କିଦ୍ନାଂ; ଇଦାଂକାଜିଂ ସୁକ୍ବଗ୍ କିୟାଟ୍; ଆରେ ହୁଡ଼ାଟ୍, ହେଦାଂ ପା ବେକାର୍ । ଆନ୍ ଗ୍ଡାଇନି ବିସ୍ରେ ଇଞ୍ଚାଙ୍ଗ୍, ହେଦାଂ ପାଗ୍ଲାତି; ୱାରି ବିସ୍ରେ ଇଞ୍ଚାଙ୍ଗ୍, ହେଦାଂ ଇନାକା କିନାତ୍ ? ଆନ୍ ଇନେସ୍ କାଲିଂଉଣିତ ଗାଗାଡ଼୍ତିଂ ସାରି କିନାଙ୍ଗ୍ ଆରି ଆକାସ୍ ତାରେନ୍ ମାନାୟ୍ ମାଜ଼ିର୍ ହାନିପାତେକ୍ ଇନାକା କିନାକା ହାର୍, ଇଦାଂ ପୁଞ୍ଜେଙ୍ଗ୍ ଆଡ୍ନି ପାତେକ୍ ଇନେସ୍ ଅଗିୟାନ୍ତ ହାନାଙ୍ଗ୍, ଇଦାଂ ମାନେ ମାନେ ଡେକ୍ତାଙ୍ଗ୍, ଇ ସମୁତ ପା ନା ମାନ୍ ଗିୟାନ୍ତ ନାଂ ହାଜ଼ି ଚଚ୍ଚି ମାଞ୍ଚାତ୍ । ଆନ୍ ଜାର୍ କାଜିଂ ଗାଜା ଗାଜା କାମାୟ୍ କିତାଂ; ଆନ୍ ଇଲ୍କୁ ରଚ୍ଚାଙ୍ଗ୍, ଆନ୍ ବେସି ଅଙ୍ଗୁର୍ବାଡ଼୍ ରଚ୍ଚାଙ୍ଗ୍; ଆନ୍ ନା କାଜିଂ ବାଡ଼୍ ଆରି ପାଡ଼ାମର୍କୁ ରଚ୍ଚାଙ୍ଗ୍, ହେ ବିତ୍ରେ ସବୁବାନି ପାଡ଼୍ମାର୍କୁ ରୁସ୍ତାଙ୍ଗ୍; ଆନ୍ ମାର୍ନି ପାଡ଼ା ଉବ୍ଜାନି ରାନ୍ତ ଏସ୍ପକ୍ନି କାଜିଂ ବାନ୍ଦ୍କୁ କାରିକିତାଂ; ଆନ୍ ଆଡ଼ିଏନ୍ ଆଡ଼଼ିୟାଣିକାଂ କଡ଼୍ତାଂ ଆରି ନା ଇଞ୍ଜ ଚନ୍ଚି ଆଡ଼ିୟାର୍ ମାଚାର୍; ଆରେ ନା ଆଗେ ଜିରୁସାଲମ୍ନି ୱିଜ଼ାର୍ତାଂ ନାୱାଙ୍ଗ୍ କଡିଂମେଣ୍ଡାଙ୍ଗ୍ ପସୁମାନ୍ଦା ଆଦିକ୍ ମାଚିକ୍; ଆନ୍ ରୁପା ଆରି ହନା, ଆରେ ବାର୍ବିନ୍ ରାଜାତି ଆରି ବାର୍ବିନ୍ ରାଜିନି ହାର୍ଦି ହାର୍ଦି ଦନ୍ ରୁଣ୍ଡାୟ୍ କିତାଂ; ଆନ୍ କେର୍ନାକାର୍ ଆରି କେର୍ନିକିକ୍, ଆରି ମାନାୟ୍ ମାଜ଼ିର୍ ସାରିନିକିଂ ବେସି ସାନ୍ଲିକାଂ ପାୟାତାଂ । ଇଲାକେ ନା ଆଗେ ଜିରୁସାଲମ୍ତ ଇନେର୍ ମାଚାର୍, ହେ ୱିଜ଼ାର୍ତାଂ ଗାଜା ଆରି ବାଡାତାଂ; ପା ନା ଗିୟାନ୍ ନା ତାକେ ମାନ୍ଗାତାତ୍ । ଆରେ, ନା କାଣ୍ଗା ଇନାକା ହୁଡ୍ନାତ୍ ଇନାକା କିତାତ୍, ହେଦିଲିଂ ଆନ୍ ହେଦେଲିଂ ମୁନା କିୱାତାଂ; ଆନ୍ ଜାର୍ ମାନ୍ତିଙ୍ଗ୍ ଇନାକାପା ସୁକ୍ବଗ୍ତାଂ ମୁନା କିୱାତାଂ, ଇନାକିଦେଂକି ନାଦାଂ ୱିଜ଼ୁ କସ୍ଟ କାଜିଂ ନା ମାନ୍ ୱାରି କିତାତ୍; ଆରେ, ନାଦାଂ ସବୁ କସ୍ଟତାଂ ଇଦାଂ ନା ବାଗ୍ ମାଚାତ୍ । ତାପାଚେ ନା କେଇ ଇମ୍ଣି ସବୁ କାମାୟ୍ କିଜ଼ିମାଚାତ୍ ଆରି ଇମ୍ଣି ଇମ୍ଣି କସ୍ଟତ ଆନ୍ କସ୍ଟ ଆଜ଼ି ମାଚାଙ୍ଗ୍, ହେଦାଂ କାଜିଂ ଆନ୍ ହୁଡ଼୍ତାଂ; ଆରେ, ହୁଡ଼ାଟ୍, ସବୁ ବେକାର୍ ଆରି ଡ଼ୁଇ ପାଚେ ହାନାକାନ୍ ମତର୍, ଆରେ ୱେଡ଼ା ତାରେନ୍ ଇମ୍ଣାକାପା ଲାବ୍ ହିଲ୍ୱାତାତ୍ ।
ଗିଆନି ଆରି ମୁର୍କତି ହାରିହାରା ଦସା
ଇଦାଂପାଚେ ଆନ୍ ଗିୟାନ୍, ପାଗ୍ଲା ଆରି ଅଗିଆନ୍ତିଂ ହୁଡ଼୍ଦେଂ ଜାଲ୍ଦି ଆତାଂ; ଇନାକିଦେଂକି ଇମ୍ଣି ମାନାୟ୍ ରାଜାତି ପାଚେ ୱାନାନ୍, ହେୱାନ୍ ଇନାକା କିନାନ୍ ? ଇନାକା କିୟାତାତ୍ନା, ହେଦାଂ ନେ କିନାନ୍ । ହେବେ ଆନ୍ ହୁଡ଼୍ତାଂ, ଇନେସ୍ ମାଜ୍ଗାତାଂ ଅଜଡ଼୍ ନେକ୍ରାକା, ହେଲାକେ ଅଗିଆନ୍ ବାଦୁଲ୍ ଗିୟାନ୍ ନେକ୍ରାକା । ଗିଆନିର୍ତି କାଣ୍ଗା ହେୱାନ୍ତି ହାର୍ଦି ହାସିତ ହାନାତ୍, ଆରେ ମୁର୍କିୟା ମାଜ୍ଗାତ ବୁଲାନାନ୍, ଆତିସ୍ପା ୱିଜ଼ାର୍ କାଜିଂ ର ଦସା ଗିଟାନାତ୍, ଇଦାଂ ଆନ୍ ହୁଡ଼୍ତାଂ । ହେବେ ଆନ୍ ଜାର୍ ମାନେ ମାନେ ଇଚାଙ୍ଗ୍, ମୁର୍କିୟା କାଜିଂ ଇନେସ୍ ଗିଟାନାତ୍, ନା କାଜିଂ ପା ହେଲାକେ ଗିଟାନାତ୍, ତେବେ ଆନ୍ ଇନେକିଦେଂ ଆଦିକ୍ ଗିଆନି ଆତାଙ୍ଗ୍ ? ଇବେ ଆନ୍ ମାନେ ମାନେ ଇଚାଙ୍ଗ୍, ଇଦାଂ ନେ ବେକାର୍ । ଇନାକିଦେଂକି ଇନେସ୍କି ମୁର୍କିୟାତି, ହେଲାକେ ଗିଆନିର୍ତି ଏତୁ ସବୁୱେଡ଼ାଂ ମାନ୍ଗୁତ୍; ଇନେକିଦେଂକି ୱାନି କାଡ଼୍ତିଂ ୱିଜ଼ାର୍ ବାଣାଆଜ଼ି ହାଲ୍ଜିମାନାର୍ । ହଁ! ମୁର୍କିୟା ଇନେସ୍ ହାନାନ୍, ଗିଆନି ପା ହେଲାକେ ହାନାନ୍ । ତାପାଚେ ଆନ୍ ଜିବୁନ୍ତିଙ୍ଗ୍ ଗିଣ୍ କିତାଙ୍ଗ୍; ଇନେସ୍କି ୱେଡ଼ା ତାରେନ୍ କିତି କାମାୟ୍ ନା କାଜିଂ କସ୍ଟ ମାନେ ଆତାତ୍; ଇନାକିଦେଂକି ସବୁ ବେକାର୍ ଆରି ଡ଼ୁଇ ପାଚେ ହାନାକାନ୍ ମତର୍ ।
କସ୍ଟକିନାକା ବେକାର୍ନିକା
ଆରେ, ୱେଡ଼ା ତାରେନ୍ ନିତ୍ରେମାପ୍ରୁ ଇମ୍ଣି ଇମ୍ଣି ୱାଡ଼଼ାକ୍ ଆତାଂ, ନା ହେସବୁ କସ୍ଟତିଂ ଆନ୍ ଗିଣ୍ କିତାଂ; ଇନାକିଦେଂକି ନା ମାନାୟ୍ କାଜିଂ ହେଦାଂ ସବୁ ପିସ୍ତି ହାଞ୍ଜେଙ୍ଗ୍ ଆନାତ୍ । ଆରେ, ହେୱାନ୍ ଗିଆନି କି ମୁର୍କିୟା ଆନାନ୍, ଇନେର୍ ପୁନାର୍ ? ଆତିସ୍ପା ଆନ୍ ୱେଡ଼ା ତାରେନ୍ ଇମ୍ଣି ଇମ୍ଣି କସ୍ଟତ ୱାଡ଼଼ାକ୍ ଆଜ଼଼ି ଗିଆନି ଚଞ୍ଜ୍ୟାତାଂ, ହେୱାନ୍ ନା ହେ ସବୁ କସ୍ଟନି ପାଡ଼୍ ଆଦିକାରି ଆନାନ୍; ଇଦାଂ ନେ ବେକାର୍ । ଇଦାଂକାଜିଂ ୱେଡ଼ା ତାରେନ୍ ଆନ୍ ଇମ୍ଣି ଇମ୍ଣି କସ୍ଟତ କସ୍ଟ ଆତାଂ ହେ ସବୁ ବିସ୍ରେ ଜାର୍ ମାନ୍ତିଙ୍ଗ୍ ନିରାସ୍ କିଦେଂ ଜାଲ୍ଦି ଆତାଂ । ଇନାକିଦେଂକି ର ମୁଣିକା ଗିଆନ୍ ଆରି ବିଦ୍ୟା ଆରି ସାକ୍ତି ଲାହାଂ କସ୍ଟ କିନାନ୍; ଆତିସ୍ପା ଇମ୍ଣି ମାନାୟ୍ ହେବେ କସ୍ଟ କିୱାତାନ୍ନା, ହେୱାନ୍ତି ଆଦିକାର୍ କାଜିଂ ଇସ୍ୱର୍ ହେଦାଂ ପିସ୍ତି ହାନାନ୍ । ଇଦାଂ ନେ ବେକାର୍ ଆରି ବେସି ବାନ୍ୟା । ତେବେ ୱେଡ଼ା ତାରେନ୍ ମାନାୟ୍ ଇମ୍ଣି ଇମ୍ଣି କସ୍ଟତ ଆରି ମାନ୍ତିନି ଚିନ୍ତାତ ୱାଡ଼଼ାକ୍ ଆନାନ୍, ହେ ସବୁତାଂ ହେୱାନ୍ ଇନାକା ପାୟାନାନ୍ ? ଇନାକିଦେଂକି ହେୱାନ୍ତି ଦିନ୍ ସବୁ କେବଲ୍ ଦୁକ୍ନିକା ଆରି ହେୱାନ୍ତି କାମାୟ୍ ମାନ୍ତିଏତ୍ କିଜ଼ି ହାନାନ୍; ନାଣା ପା ହେୱାନ୍ତି ମାନ୍ ଜମୁତ୍ । ଇଦାଂ ପା ବେକାର୍ । ତିନାଉଣାକା ଆରି ନିଜ୍ କସ୍ଟତ ଜାର୍ ପାରାଣ୍ତିଂ ସୁକ୍ବଗ୍ କିନି ବାଟା ମାନାୟ୍ତି ଆରେ ଆଦିକ୍ ମଙ୍ଗଲ୍ ବିସ୍ରେ ଆକାୟ୍ । ଆନ୍ ପା ହୁଡ଼୍ତାଂ, ଇଦାଂ ପର୍ମେସ୍ୱର୍ କେଇଦାଂ ଆନାତ୍ । ଇନାକିଦେଂକି ନା ତାଂ ଇନେନ୍ ଆଦିକ୍ ଚିଞ୍ଜେଙ୍ଗ୍, କି ସୁକ୍ବଗ୍ କିଦେଂ ଆଡ୍ନାର୍ ? ଇନେକିଦେଂକି ଇମ୍ଣି ମୁଣିକା ପର୍ମେସ୍ୱର୍ତିଂ ସାରି କିନାନ୍, ହେୱାନ୍ ହେୱାନିଂ ଗିୟାନ୍ ବିଦ୍ୟା ଆରି ୱାରି ହିନାନ୍; ମତର୍ ପର୍ମେସ୍ୱର୍ତି ସାରିନିକାନ୍ ମାନାୟ୍ତିଂ ହିନି କାଜିଂ ଇଡ଼୍ତାକା ଆରି ରୁଣ୍ଡାୟ୍କିତି ପାପ୍ୟାଙ୍ଗ୍ ହେୱାନ୍ କାମାୟ୍ ହିନାନ୍ । ଇଦାଂ ନେ ବେକାର୍ ଆରି ଡ଼ୁଇ ପାଚେ ହାନାକାନ୍ ମତର୍ ।
Pengo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.