Baghlayani Bible
अय्यूब 20
सोपरो रा तर्क
फेर नामाह शईरो रे रणे वाल़े सोपरे अय्यूबो खे बोलेया,
“अय्यूब मेरा जिऊ बोलोआ कि आऊँ ज्वाब देऊँ
ओर इजी री खातर फटाफट बोलूँआ।”
मैं आपणी निन्दा सुणी, तेरिया गल्ला ते मेरी बेज्जती ऊई
ओर मेरी आत्मा आपणियां समजा रे मुताबिक ताखे ये ज्वाब देओई।
ये नियम पुराणे ओर तेस बखतो ते चलदा आई रा,
जेबे माणूं तरतिया पाँदे बसाया था,
कि दुष्ट माणूंआ री जीत थोड़े जे बखतो खे ओई
ओर जो परमेशरो री पग्ती नि करदा, तिना री खुशी थोड़ी जी देरा री ओई।
जे केसी माणूंए री महानता सर्गो तक पऊँची जाओ
ओर तेसरा सिर बादल़ो तक पऊँचो,
पर सेयो तूड़ी जेड़े दूर करी देणे।
तिना रे जाणने वाल़े तिना खे टोल़ने लगणे कि सेयो केई गये!
सेयो एकी सुफने ओर राती रे एकी दर्शणो जेड़े लोप ऊई जाणे,
फेर कदी नि दिशणे।
बुरे माणूं जेती रओए सेयो तेथी ई खत्म ऊई जाओए,
फेर तेती सेयो केसी खे नि दिशदे।
तिना रे बच्चेया खे से वापस देणा पड़ना
जो माये-बाओए गरीबा ते लूटी राखेया था।
पक्का बुरे लोक मरने ओर जवानिया देई आपणियां कब्रा दे चली जाणे।
बुरे काम करना तिना रे मुंए दे मीठा खाणा राखणे जेड़ा था,
ओर सेयो इजी रा स्वाद लंदे रणा चाओ थे।
ओर सेयो बुरे कामा खे करने ते नि रूकणा चाओ थे
तेबे बी तेसरी ये रोटी तेसरे पेटो रे जाई की जईरो रे बदली जाणी;
से तेसरे पीतरे नागो रे विषो जेड़ी बणी जाणी।
तिने जो तअन-दौलत निगल़ी लई री; तेस से फेर वापस करी देणी;
परमेशरो से तेसरे पेटो ते निक्याल़ी देणी।
बुरे लोक जो पीतरे कुटी लओए से जईरो जेड़ा ए;
ये तिना खे एक खतरनाक सापो रे डसणे जेड़ा काओआ।
सेयो दूद ओर सईतो रिया नदिया खे देखणे खे जिऊँदे नि रणे।
जेतेरिया तँईं तिने मईणत कित्ती,
से तेसखे वापस करनी पड़नी ओर से तिजी खे खाई नि सकदा;
तेसरी खरीदी री चीजा ते जितणी खुशी ऊणी चाईयो,
तितणी तेसखे नि मिलणी।
कऊँकि तिने गरीबा खे बऊत दु:ख दित्ते ओर मरने रिया तँईं ईंयाँ ई छाडी ते।
तिने से कअर छीनी ले, जो तिने नि बणाए थे।
लाल़चो रे मारे तेसखे कदी शान्ति नि मिलो थी,
इजी री खातर तेस आपणी कोई प्यारी चीज नि बचाई सकणी।
कोई बी चीज अड़पणे ते बाद से कुछ बी बाकी नि छाडो था,
इजी खे एबे तेसरा कुशल बणेया रा नि रणा।
सबी किस्मा री सुख-सुबिदा रंदे ऊए बी से मुसीबता रे पड़ना;
सबी किस्मा रिया बिपदा तेस पाँदे टूटी की पड़नियां।
जेबे तिने आपणा पेट खाणे ते परी ला दा ऊणा,
तो परमेशर तेस पाँदे बऊत गुस्से ऊणा।
परमेशरो तेसखे दखाणा कि से कितणा गुस्से आ ओर तेसखे सजा देणी।
से बुरा माणूं लोए रे अथियारो ते डरी की नठणा
ओर पीतल़ी रे धनुषो साथे मारेया जाणा।
तेस से बाण खींजी की आपणे पेटो ते निकयाल़ना,
तेते बाणो रा चमकीला मूरा तेसरे पित्तो रे ऊई की बारे निकल़ना ओर मौता रा
डर तेसरे पीतरे समाई जाणा।
तिने जो कुछ बचाया ए से नाश ऊई जाणा;
माणूंए रे आथो ते ना जल़ने वाल़िया आगी सेयो
ओर तिना रे सारे कअर फूकी देणे।
स्वर्गो तेसरा पाप बताणा
ओर तरतिया तेसरे खलाफ गवाई देणी।
तेसरे कअरो री तअन-दौलत नाश ऊई जाणी,
से तेस दिने ऊणा जेबे परमेशरो रा गुस्सा बाढ़ी जेड़ा आऊणा।
अय्यूब, परमेशरो रिया तरफा ते दुष्ट माणूंए रा अंश
ओर तेसखे परमेशरो रा ठराया रा इस्सा येईए।1
Source notes (1)
- Footnote अय्यू. 27:13
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.