Baghlayani Bible
उत्पत्ति 40
यूसुफो रे जरीये सुफनेया रा मतलब बताणा
इना गल्ला ते बाद एड़ा ऊआ कि मिस्रो रे राजे रा पल्याणे वाल़ा ओर रसोईए आपणे स्वामिए रे खलाफ कुछ पाप कित्तेया। तेबे फिरौने आपणे तिना दुँईं हाकिमा, मतलब पल्याणे वाल़ेया रे परदान ओर रसोईए रे परदानो पाँदे गुस्से ऊई की तिना खे कैद कराई की, सिपाईया रे परदानो रे कअरे तेसा ई जेला दे, जेती यूसुफ बंदी था पवाई ते। तेबे सिपाईया रे परदाने सेयो यूसुफो गे सम्बाल़ीते ओर से तिना री सेवा-टईल करने लगेया; तेबे सेयो कई दिना तक जेला रे रये। मिस्रो रे राजे रा पल्याणे वाल़ा ओर रसोईया जो जेला रे बंद थे, तिने दुँईं एक ई राती आपणी-आपणी योग्यता रे मुताबिक, सुफना देखेया। प्यागा जेबे यूसुफ तिना गे पीतरे गया, जेबे तिने सेयो देखे, तो देखेया कि सेयो दोनो दु:खी ए। इजी खे तिने फिरौनो रे तिना हाकिमा ते, जो तेस साथे तेसरे स्वामिए रे कअरे जेला रे बंद थे, पूछेया, “आज तुसा रे मूँ उदास कऊँ ए?”
तिने तेसखे बोलेया, “आसे दुँईं जणे सुफना देखी राखेया ओर तिजी रा फल़ बताणे वाल़ा कोई निए।” यूसुफे तिना खे बोलेया, “सुफनेया रा फल़ बताणा परमेशरो रा काम निए, माखे आपणा-आपणा सुफना बताओ।”
तेबे पल्याणे वाल़े रा परदान आपणा सुफना यूसुफो गे ईंयाँ बोलणे लगेया, “मैं सुफने रे देखेया कि मां सामणे दाखा री एक बेल ए; ओर तेसा दाखा री बेला रे तीन डाल़िया ए ओर तिदे मानो कलिया लगी रिया ओर सेयो फूलिया ओर तिना रे गुच्छेया रे दाख लगी की पाक्की गी ओर फिरौनो रा कटोरा मेरे आथो रे था; ओर मैं से दाख की फिरौनो रे कटोरे रे पिल्ली ओर कटोरा फिरौनो रे आथो रे देईता।”
यूसुफे तेसखे बोलेया, “इजी रा फल़ ये ए कि तिंऊँ डाल़िया रा मतलब तीन दिन ए इजी खे आजो ते तिंऊँ दिना रे पीतरे फिरौनो तेरा सिर ऊच्चा करना ओर दुबारा ते तेरा पद ताखे देई देणा ओर तां पईले जेड़ा ई पल्याणे वाल़ा ऊई की तेसरा कटोरा तेसरे आथो रे दुबारा ते देया करना। जेबे तेरा पला ऊई जाओगा, तेबे माखे याद करेया ओर मां पाँदे कृपा करी की फिरौनो गे मेरे बारे दे गल्ल करेया ओर एते कअरो ते माखे छुड़ाई लया। कऊँकि सच्ची इब्रानिया रे प्रदेशो ते आऊँ जबरदस्ती ल्याई राखेया ओर एती बी मैं एड़ा कोई काम नि करी राखेया जेते री बजअ ते माखे एते जेला रे पाओ।”
ये देखी की कि तेसरे सुफने रा फल़ अच्छा निकल़ेया, रसोईए रे परदाने यूसुफो खे बोलेया, “मैं बी एक सुफना देखी राखेया, से ये ए: मैं देखेया कि मेरे सिरो पाँदे सफेद रोटिया रिया तीन टोकरिया ए ओर पाँदली टोकरिया रे फिरौनो खे सब किस्मा रिया पक्किया-पक्काईया चीजा ए ओर पंछी मेरे सिरो पाँदलिया टोकरिया बीचा ते तिना चीजा खे खाणे लगी रे।”
यूसुफे बोलेया, “इजी रा फल़ ये ए: तिंऊँ टोकरिया रा मतलब तीन दिन ए आजो ते तिंऊँ दिना रे पीतरे फिरौनो तेरा सिर बडवाई की, एकी डाल़ो पाँदे टंगवाई देणा ओर पंछिया तेरा मास नोची-नोची की खाणा।”
ओर तीजे दिने फिरौनो रा जन्मदिन था, तिने आपणे सारे काम करने वाल़ेया खे भोज दित्तेया, ओर तिना बीचा ते पल्याणे वाल़े रा परदान ओर रसोईए रा परदान दोनो जणे जेला ते निकयाल़ी ते। पल्याणे वाल़ेया रा परदान तो पल्याणे वाल़े रे पदो पाँदे दुबारा ते ठराईता ओर से फिरौनो रे आथो रे कटोरा देणे लगेया। पर रसोईए रा परदान तिने टंगवाई ता, जेड़ा कि यूसुफे तिना रे सुफने रा मतलब तिना गे बोलेया था। फेर बी पल्याणे वाल़े रे परदाने यूसुफ याद नि राखेया; पर तेसखे पूली गा।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.