Baghlayani Bible
उत्पत्ति 36
एसाव रे खानदानो री सूची
एसाव जेसखे एदोम बी बोलोए, तेसरा खानदान ये ए। एसावे तो कनानी बेटिया साथे ब्या करी ला, मतलब हित्ती एलोनो री बेटी आदा ओर ओहोलीबामा जो अना री बेटी ए ओर हिब्बी सिबोनो री दोईती थी। फेर तिने इश्माएलो री बेटी बासमता साथे बी ब्या करी ला, जो नबायोतो री बईण थी। आदा रे एसावो ते एलीपज ओर बासमता रे रूएल पैदा ऊए ओर ओहोलीबामा रे यूश, यालाम ओर कोरह पैदा ऊए; एसावो रे येई पाऊ कनान प्रदेशो रे पैदा ऊए। एसाव आपणी लाड़िया ओर माठे-बेट्टिया ओर कअरो रे सारे माणूं ओर आपणी पेडा-बाकरिया, गाय-बल़द बगैरा सारे जानवरा बल्कि सारी सम्पत्ति, जो तिने कनान प्रदेशो रे कट्ठी कित्ती थी की आपणे पाई याकूबो गे ते दूजे प्रदेशो खे चलीगा। कऊँकि तिना री सम्पत्ति इतणी ऊईगी थी कि सेयो कट्ठे नि रई सके; ओर जादा डांगर ऊणे रिया बजअ ते तेस प्रदेशो रे जेती सेयो परदेशी ऊई की रओ थे, समाई नि सके। एसाव जेसखे एदोम बी बोलोए, सेईर नाओं रे पाह्ड़ी प्रदेशो रे रणे लगेया। सेईर नाओं री पाह्ड़ी प्रदेशो रे रणे वाल़े एदोमिया रे मूल़ मर्द एसावो रा खानदान ये ए, एसावो रे पाऊआ रे नाओं ये ए, एसावो री लाड़ी आदा रा पाऊ एलीपज ओर तेसी एसावो री लाड़ी बासमता रा पाऊ रूएल। ओर एलीपजो रे पाऊ यो ए, मतलब तेमान, ओमार, सपो, गाताम, ओर कनज। एसावो रे पाऊए एलीपजो रे तिम्ना नाओं री एक रखैल थी, जेसा रे एलीपजो ते अमालेक ऊआ; एसावो री लाड़ी आदा रे वंशो रे येई ऊए। रूएलो रे यो पाऊ ऊए, मतलब नहत, जेरह, शम्मा, ओर मिज्जा; एसावो री लाड़ी बासमता रे वंशो रे येई ऊए। ओहोलीबामा जो एसावो री लाड़ी ओर सिबोनो री दोईती ओर अना री बेटी थी तेसा रे यो पाऊ ऊए, मतलब तेसा रे एसावो ते यूश, यालाम ओर कोरह पैदा ऊए।
एदोमो रे अधिपति
एसावो रे खानदानो रे ये अधिपति ऊए: मतलब एसावो रे जेठे एलीपजो रे वंशो बीचा ते तो तेमान अधिपति, ओमार अधिपति, सपो अधिपति, कनज अधिपति, कोरह अधिपति, गाताम अधिपति, अमालेक अधिपति एलीपज वंशिया बीचा ते, एदोम प्रदेशो रे यो अधिपति ऊए ओर येई आदा रे वंशो रे ऊए। एसावो रे पाऊ रूएलो रे वंशो रे ये ऊए मतलब नहत अधिपति, जेरह अधिपति, शम्मा अधिपति, मिज्जा अधिपति रूएलो रे खानदानो बीचा ते एदोम प्रदेशो रे येई अधिपति ऊए; ओर येई एसावो री लाड़ी बासमता रे वंशो रे ऊए। एसावो री लाड़ी ओहोलीबामा रे वंशो रे येई ऊए; मतलब यूश अधिपति, यालाम अधिपति, कोरह अधिपति, अना री बेटी ओहोलीबामा जो एसावो री लाड़ी थी तेसा रे वंशो रे येई ऊए। एसाव जेसखे एदोम बी बोलोए, तेसरे वंश येई ए ओर तिना रे अधिपति बी येई ऊए।
सेईरो रे खानदानो री सूची
सेईर जो होरी नाओं री जातिया रा था, तेसरे यो पाऊ तेस प्रदेशो रे पईले तेई रओ थे, मतलब लोतान, शोबाल, सिबोन, अना, दीशोन, एसेर ओर दीशान; एदोम प्रदेशो रे सेईरो रे यो ई होरी जातिया रे अधिपति ऊए। लोतानो रे पाऊ, होरी ओर हेमाम ऊए ओर लोतानो री बईण तिम्ना थी। शोबालो रे यो पाऊ ऊए, मतलब आल्वान, मानहत, एबाल, सपो, ओर ओनाम। ओर सिदोनो रे यो पाऊ ऊए, अया ओर अना; ये सेई अना ए जेसखे जंगल़ो रे आपणे बाओ सिबोनो रे गह्दे चरांदे-चरांदे गरम पाणिए रे झरने मिले थे। ओर अना रे दीशोन नाओं रा पाऊ ऊआ ओर तेस ई अना रे ओहोलीबामा नाओं री बेटी ऊई। दीशोनो रे यो पाऊ ऊए, हेमदान, एशबान, यित्रान, ओर करान। एसेरो रे यो पाऊ ऊए, बिल्हान, जावान ओर अकान। दीशानो रे यो पाऊ ऊए, ऊस ओर अरान। होरियो रे अधिपति यो ऊए: लोतान अधिपति, शोबाल अधिपति, सिबोन अधिपति, अना अधिपति, दीशोन अधिपति, एसेर अधिपति, दीशान अधिपति; सेईर प्रदेशो रे होरी जाति वाल़ेया रे येई अधिपति ऊए।
एदोमो रे राजा
फेर जेबे इस्राएलिया पाँदे किने राजे राज नि करी राखेया था, तेबे बी एदोम प्रदेशो रे यो राजा ऊए; बोरो रे पाऊए बेले एदोम शईरो दे राज कित्तेया ओर तेसरी राजधानिया रा नाओं दिन्हाबा ए। जेबे बेला मरेया तेबे बोस्रा रे रणे वाल़े जेरह रा पाऊ योबाब तेसरी जगा पाँदे राजा ऊआ। जेबे योबाब मरेया तेबे तेमानिया रे प्रदेशो रा रणे वाल़ा हूशाम तेसरी जगा पाँदे राजा ऊआ। फेर जेबे हूशाम मरेया तेबे बददो रा पाऊ हदद तेसरी जगा पाँदे राजा बणेया; ये सेईए जिने मिद्यानी लोक मोआब प्रदेशो दे काये ओर तेसरी राजधानिया रा नाओं अबीत था। हददो रे मरने ते बाद मस्रेका रा रणे वाल़ा सम्ला तेसरी जगा पाँदे राजा बणेया। फेर जेबे सम्ला मरेया, तेबे शाऊल जो फरात नदिया रे कनारले रहोबोत शईरो रा था, तेसरी जगा पाँदे राजा बणेया। जेबे शाऊल मरेया, तेबे अकबोरो रा पाऊ बाल्हानान तेसरी जगा पाँदे राजा बणेया। जेबे अकबोरो रा पाऊ बाल्हानान मरेया, तेबे हदर तेसरी जगा पाँदे राजा बणेया ओर तेसरी राजधानिया रा नाओ पाऊ ए; ओर तेसरी लाड़िया रा नाओं महेतबेल ए, जो मेज़ाहाबो री दोईती ओर मत्रेदो री बेटी थी। फेर एसावो रे खानदानो रे अधिपतिया रे कुलो ओर जगा रे मुताबिक तिना रे नाओं यो ए, तिम्ना अधिपति, अल्वा अधिपति, यतेत अधिपति, ओहोलीबामा अधिपति, एला अधिपति, पीनोन अधिपति, कनज अधिपति, तेमान अधिपति, मिबसार अधिपति, मग्दीएल अधिपति, ईराम अधिपति एदोमो रे खानदाने जो देश आपणा करी ला था, तिना रे रणे री जगा रे तिना रे येई अधिपति ऊए; ओर एदोमी जातिया रा मूल़ मर्द एसाव ए।
Baghlayani Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.