जकर्या

जकर्या

बिधातो गूर जकर्या

भेत

लिखणैं आल़अ: जकर्या

सन: 520 का 480 ईसा आजी

एरुशलेम नगरीए परज़ा ती खरी पल़ी दी। तिन्‍नैं हेरअ त बिधातो नऊंअ भबन बणाईं पर सह भबन निं तिहअ महान हुअ ज़िहअ पराणअ भबन हआ त। नां राज़ै दाबेदे खिंबै कुंण राज़अ आथी त अर यहूदा त फारसी राज़ा दी एक होछ़अ ज़िहअ मुल्ख रहअ द।

ऐहा कताबे पैहलै भाग एकी धैऊआ पोर्ही आठा धैऊआ तैणीं खोज़ा जकर्या कि बिधाता किहै रहैऊऐ तेऊ का आठा बारी धैन ताकि परज़ा खरी का बागै निखल़ी सके। बिधाता इहअ बी खोज़अ कि इहै धैल़ै एछणैं इहै कि बिधाता छ़ांटै दै राज़ै करनअ भिई एरुशलेम नगरी का राज़ अर देशा-देशे लोग फिरनैं बिधाता बाखा ताकि तिंयां बी बिधाते खास परज़ा ज़िहै होए। पर एभा लै आसा बिधाता जरूबाबेल राज़पाल छ़ांटअ द अर ज़ैहसू आसा माहा प्रोहत छ़ांटअ द। बिधातो भबन हणअ इना दुही का सभाल़अ द।

ऐहा कताबो दुजअ भाग धैअ नौ पोर्ही गैरा तैणीं डाहा बिधाता खोज़ी कि तेऊ दैणीं ओरी-पोरी खास्सै देशा लै सज़ा अर यहूदा मुल्खे विश्वास घाती सैणैं लै बी दैणीं तेऊ सज़ा।

ऐहा कताबो चिऊथअ भाग धैअ बारा पोर्ही च़ौदा दी आसा इहअ कि बिधाता दैआ आपणैं गूर जकर्या लै तेऊ आजू तेऊ बगता एछणें बारै माद ज़ेभै यहूदा मुल्ख अर राज़धानी एरुशलेम नगरी संघै खास्सै देशा जुधा करदै चुटी पल़णअ। तेभै पाणै यहूदा मुल्खे खास्सै मणछ मारी, पर बिधाता एछणअ आप्पै संघा करनी आपणीं परज़े फाज़त। तेखअ फिरनअ तिन्‍नां भिई आपणैं परमेशर बिधाता बाखा। तेखअ करनी ओर्ही-पोर्ही सोभ धारा सऊंई पर एरुशलेम रहणअ ओर्ही पोर्ही सोभी ज़ैगा का उछ़टी धारा ज़िहअ। ज़िन्दगी दैणें गाड बगणीं एरुशलेम नगरी का अर सारी पृथूईए लोगा टेक्‍कणअ बिधाता सेटा माथअ।

बिधाता डाहा इहअ खोज़ी कि इहै धैल़ै एछणैं भिई ज़ेभै बिधाता भिई आपणीं परज़ा प्रैंदै राज़ करना लै राज़अ छ़ांटणअ। नऊंऐं बधाने कताबा दी मोत्ती अर जोहन्‍ना लिखा जकर्ये कताबा का इना ई गल्‍ला ऐहा गल्‍ला खोज़णा लै कि बिधाता छ़ांटअ ईशू आपणीं परज़ा प्रैंदै राज़अ:

“एरुशलेम नगरीए लोगो, खुशी मनाऊंआं संघा करा ज़ै-ज़ैकार! थारअ राज़अ गअ ज़िती, सह एछणअ तम्हां सेटा लै। सह आसा धर्मीं तेऊ करनअ थारअ उद्धार। सह आसा शरीफ अर तेऊ करनी गाधे शुंआरी, सह एछणअ गाधीए बच्च़ै प्रैंदै बेशी।”

(9:9)

कताबे बांड

प्राश्त करने बारै 1:1-6

जकर्या हुऐ धैन 1:7—6:15

ब्रते बारै सुआल 7:1—8:23

आजू लै बोझ़ 9:1—14:21