Kulvi Outer Seraji Bible
जकर्या 12
एरुशलेम हणअ आज़ाद
अह आसा बिधाते इज़राईला लै चतैनगी। ज़ुंणीं बिधाता सरग आसा छ़ैई डाहअ द, ज़ुंणीं सारी पृथूई आसा बणाईं दी अर ज़ुंण मणछा लै ज़िन्दगी दैआ, तेऊ बिधाता आसा इज़राईला लै समाद दैनअ द।
बिधाता बोला इहअ, “शूणां, बणाणीं एरुशलेम नगरी घोर नशै आल़ै प्रिहै ज़ेही, एता झुटी लागणै फेर बस्सै दै देशा धाक्कै-फर्नैक्कै। तिन्नां पल़णअ एरुशलेम नगरी अर यहूदा मुल्खा लै चुटी। तेभै एछणैं संसारे सोभ देश एरुशलेम नगरी लै एक्कअ करी। मुंह बणाणीं एरुशलेम नगरी एही बडी टोल्ह ज़हा कोह निं च़काऊई सकदअ। ज़ुंण एता च़कदै बी फिरे, तिन्नां पल़णै घणैं ज़खम। तेभै करनअ मुंह इहअ कि सोभी घोल़ै छ़ुटणअ डरै दर्छ़णअ अर तिन्नां प्रैंदै शुंआर हणैं बेगरै। मेरी नदर हणीं यहूदा मुल्खा लै, पर तिन्नें दुशमणे घोल़ै करनै मुंह कांणै। तेखअ बोल़णअ यहूदा मुल्खे सोभी टोली इहअ, ‘एरुशलेम बस्सणै आल़ै भेटअ अह बल आपणैं बिधाता का ज़ुंण स्वर्गे सारी सैनो मालक आसा।’
“तेभै बणाणैं मुंह यहूदे आद-लुआद बणैं भकी दी आगी अर नाज़े काशी दी भकी दी आगी ज़िहै। तिन्नां करनअ आप्पू फेर सोभी देशो बनाश। एरुशलेम नगरी बस्सै दै रहणैं नगरी भितरी राज्ज़ी-राम्बल़ै।
“सोभी का आजी बच़ाऊंणै मुंह बिधाता यहूदे आद-लुआद, ताकि राज़ै दाबेदे आद-लुआद अर एरुशलेम बस्सै दै मणछ घमंड नां करे कि तिंयां आसा यहूदा मुल्खे होरी परज़ा का खास। तैहा धैल़ी बच़ाऊंणै मुंह बिधाता तिंयां मणछ ज़ुंण एरुशलेम नगरी हणैं बस्सै दै। तेभै हणअ रोगी मणछा तोही राज़ै दाबेदा ज़िहअ ज़ोर। राज़ै दाबेदे खिंबा सभाल़णीं एरुशलेम नगरी का परज़ा बिधाते स्वर्ग दूता ज़ेही। तेभै करनअ मुंह तिन्नां देशो बनाश ज़ुंण एरुशलेम नगरी संघै जुध छ़ेल़े।
लोग फिरनैं बिधाता बाखा
“मुंह करनअ इहअ कि दाबेदे आद-लुआद अर एरुशलेम नगरी बस्सी दी परज़ा, तत्त दिला का मेरै बारै बच़ार करे। तेखअ लागणअ तिन्नां का थोघ कि हुंह आसा तिन्नां लै झणैल़ू। तेखअ एछणी तिन्नें दिलै एही कि तिंयां मुंह सेटा अरज़ करे। तेखअ लागणै तिंयां मुंह बाखा भाल़ै ज़ुंण तिन्नैं दुख दैई छ़िन्ह-बिन्ह किअ। तेखअ लागणै तिंयां मुल्है इहै लेरा-पकारा लांदै ज़िहअ कुंण आपणैं कल्ही शोहरू मरनै पिछ़ू लेरा लाआ। तिन्नां लाणीं ज़ोरै-ज़ोरै ढाहा ज़िहअ कि तिन्नों गअ शोहरू ज़ांऐं ज़ुंण एक्कै आसा त। तैहा धैल़ी हणअ एरुशलेम नगरी मखाण पल़अ द, ज़िहअ मगिदो खागै हदाद-रमोन देअआ लै मखाण पाआ। इज़राईल देशै हणैं सोभै लेरा लांदै लागै दै। राज़ै दाबेदो खिंबे सोभ टबर अर तिन्नें बेटल़ी, नाताने खिंबे सोभ टबर अर तिन्नें बेटल़ी, लेबीए खिंबे सोभ टबर अर तिन्नें बेटल़ी, शिमीए खिंबे सोभ टबर अर तिन्नें बेटल़ी, अर बाकी सोभी खिंबे टबर अर तिन्नें बेटल़ी हणीं लेरा लांदी लागी दी।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.