जकर्या 8

एरुशलेम नगरी च़िणनी भिई

1स्वर्गे सारी सैने मालक बिधाता खोज़अ मुखा इहअ समाद।

2बिधाता ज़ुंण स्वर्गे सारी सैनो मालक आसा, सह बोला इहअ, “हुंह झ़ूरा एरुशलेम नगरीए परज़ा लै खास्सअ। तिन्‍नें दुशमणा लै आसा मुंह खास्सी रोश्शै फिरी दी।”

3बिधाता बोला इहअ, “मुंह एछणअ एरुशलेम मेरी पबित्र नगरी लै फिरी संघा बस्सणअ मुंह तिधी। तेखअ बोल़णअ एरुशलेम नगरी लै, ‘सत्ते नगरी अर स्वर्गे सारी सैने मालको पर्बत।’”

4बिधाता ज़ुंण स्वर्गे सारी सैनो मालक आसा, सह बोला इहअ, “एरुशलेम नगरीए हर बेटल़ी अर मर्धे अमर हणीं लाम्मी। प्रोढै मर्ध अर प्रोढी बेटल़ी हणीं आपणैं हाथै शोठी ढाकी नगरी दी बाते बाढै अर च़फै बेठै दै। 5नगरीए बाता हणीं लान्हैं-लान्हीं करै भरी हुई दी, तिंयां हणैं तेथ खेल्हदै लागै दै।”

6बिधाता ज़ुंण स्वर्गे सारी सैनो मालक आसा, सह बोला इहअ, “बच़ै दै मणछ ज़ुंण बाबेल देशे गलामी का फिरी आऐ, तिन्‍नां का ज़ाण्हणीं ईंयां गल्‍ला एही निभणी नुआहरी। पर मुल्है निं ईंयां गल्‍ला करनी नुआहरी आथी।”

7बिधाता ज़ुंण स्वर्गे सारी सैनो मालक आसा, सह बोला इहअ, “मुंह आणनीं आपणीं परज़ा पुर्बा अर पछ़मा बाखा देशा का बच़ाऊई। 8मुंह आणनैं तिंयां बापस कि तिंयां एरुशलेम बस्से। तिंयां हणीं मेरी परज़ा अर हुंह हणअ तिन्‍नों सत्त अर भलअ करनै आल़अ परमेशर। मुंह करनी तिन्‍नां लै तिहअ ई ज़ुंण मंऐं ज़बान आसा दैनी दी।”

9बिधाता ज़ुंण स्वर्गे सारी सैनो मालक आसा, सह बोला इहअ, “गूरा बाती एऊ ज़मानै मेरअ समाद शुणनै आल़ै मणछो! तम्हैं करा हिम्मत, ताकि मेरअ भबन भिई बणें, तम्हैं आसा एऊ समादा तधा ओर्ही शुणदी आऐ दै ज़धू मुंह स्वर्गे सारी सैने मालक बिधाते भबने आथरी पाई ती। 10तेऊ ज़मानै ती खास्सी खरी, मणछे निं किछ़ै आमदानी आथी ती। कामां दी लाऐ दै मज़दूरा अर पशू निं मज़दूरी भेटदी ती। घअरा का बागै डेऊंदै अर घअरा लै बापस फिरनैं आल़ै रहा ती दुशमणे डअर पल़ी, किल्हैकि मंऐं तै लोग एकी-दुजे खलाफ किऐ दै। 11पर ऐबै बोला हुंह स्वर्गे सारी सैनो मालक बिधाता इहअ कि ज़िहअ मंऐं पराणैं ज़मानै किअ, ऐबै निं मुंह बाबेल देशे गलामी का बापस फिरै दै इज़राईले आद-लुआदा लै तिहअ बभार करनअ।

12“इना बऊंणीं आपणीं साल-फसल निहंचै। इने दाखे बागा दी लागणै खास्सै फल़। ज़िम्मीं दी हणीं खास्सी फसल अर सरगा का हणअ राम्बल़अ पाणीं। मुंह दैणीं बच़ै दै इज़राईलै लै खास्सी बर्गत ज़ुंण गलामी का फिरी आऐ। 13यहूदा अर इज़राईलीओ! पराऐ देशे लोग दैआ तै होरी लै इहअ बोली फिटक, ‘थारअ लोल़ी त यहूदा अर इज़राईली ज़िहअ बनाश हुअ!’ पर मुंह बच़ाऊंणै तम्हैं अर तिन्‍नां ई पराऐ देशे लोगा बोल़णअ ऐबै इहअ, ‘तम्हां लोल़ी यहूदा अर इज़राईली ज़ेही बर्गत भेटी!’ तैही डाहा हिम्मत अर डरी निं आथी।”

14बिधाता ज़ुंण स्वर्गे सारी सैनो मालक आसा, सह बोला इहअ, “ज़ेही थारै दादै-बाबै कदुष्ट काम करी मुल्है रोश्श ठैऊई ती, मंऐं सोठी ती तिन्‍नां लै घोर सज़ा दैणीं, ज़िहअ मंऐं तम्हां लै किअ। अर हुंह निं तेता का पिछ़ू हटअ। 15पर ऐबै निं तम्हैं डरी आथी, ऐबै आसा मंऐं सोठअ द कि मुंह दैणीं एरुशलेम अर यहूदा लै खास्सी बर्गत। 16पर तम्हैं लऐ तेता लै इना गल्‍ला करी: आप्पू मांझ़ै करै एकी-दुजै संघै शुची गल्‍ला, दालता दी करै शुचअ नसाफ ज़ेता करै मेल़-ज़ोल़ हआ। 17एकी-दुजे बारै निं तम्हैं बूरअ करने बारै सोठी। झ़ुठै सोह निं खाई।” स्वर्गे सारी सैनो मालक बिधाता बोला, “हुंह करा इना एही गल्‍ला का नफरत।”

18तेखअ दैनअ स्वर्गे सारी सैने मालक बिधाता मुल्है समाद।

19बिधाता ज़ुंण स्वर्गे सारी सैनो मालक आसा, तेऊ बोलअ इहअ, “शाल़्ह, शाऊंण, शऊज अर मकशीरे भिन्‍नैं ज़ेभै शोग मनाऊंआं अर ब्रतू रहा, ईंयां धैल़ै हणैं ऐबै यहूदे आद-लुआदा लै नंद अर खुशीए थैरा मनाऊंणे धैल़ै। तैही झ़ूरा एकी-दुजै लै सत्त अर मेल़-ज़ोल़ डाही।”

20बिधाता ज़ुंण स्वर्गे सारी सैनो मालक आसा, सह बोला इहअ, “देशा-देशा अर नगरी-नगरी का एछणैं खास्सै लोग, 21एकी नगरी बस्सै दै बोल़णअ दुजी नगरी आल़ै लै, ‘च़ाल्‍ला, हाम्हां डेऊणअ एभी एरुशलेम नगरी लै संघा मांगणी हाम्हां बिधाता का बर्गत। हाम्हां डेऊणअ स्वर्गे सारी सैने मालक बिधाता सेटा तेऊए भबनै माथै टेक्‍कदै।’ 22बडै-बडै बलबान देशे खास्सै लोग डेऊणैं एरुशलेम नगरी लै, तिंयां एछणैं स्वर्गे सारी सैने मालक मुंह बिधाता सेटा माथै टेक्‍कदै अर अरज़ करदै कि हुंह तिन्‍नां लै बर्गत दैए।”

23बिधाता ज़ुंण स्वर्गे सारी सैनो मालक आसा, सह बोला इहअ, तेऊ ज़मानै हणअ इहअ कि बडै-बडै बलबान देशा का एछणैं दस-दस लोग अर तिन्‍नां दसा-दसा ढाकणअ एकी-एकी यहूदीए झिकल़ैओ पाल्‍लअ पिड्डअ संघा बोल़णअ, “हाम्हैं बी च़ाल्‍लै ताह संघै, हाम्हैं आसा एही गल्‍ला शूणीं दी कि परमेशर आसा तम्हां संघै।”