Kulvi Outer Seraji Bible
जकर्या 10
बिधाता करनअ उद्धार
बसंते ऋता करा बिधाता का अरज़ कि सरग लोल़ी हुअ,
सह आसा बिधाता ई ज़ुंण पाणींए बादल़ बणाआं,
सह ई बरशाऊआ सरगा का पाणीं।
सह आसा बिधाता ई ज़ुंण खेचै डाल़-बूट अर नाज़ पज़ेरा।
लोग डेओआ मुहुर्ती सेटा अर जोतषी सेटा पुछ़दै!
पर तिन्नां भेटा बृथा ज़बाब अर शल़ैघा शुणना लै।
सुपनैओ फल खोज़णैं आल़ै डाहा तम्हां ठगी।
ज़ुंण तिंयां हैअ दैआ, तिंयां गल्ला आसा बृथा।
तैही आसा मणछ हेल़्ही का टल़ी दी भेडा ज़िहै कबाता पेठै दै,
तिन्नों निं फुआल आथी अर तैही आसा तिन्नां लै आफ़त पल़ी दी।
बिधाता बोला इहअ,
“मुंह आसा तिन्नां परदेसी लै रोश्शै आई दी,
ज़ुंण मेरी परज़ा प्रैंदै राज़ करा।
मंऐं लाई ऐबै तिन्नां लै सज़ा दैई।
यहूदा मुल्खे परज़ा आसा मेरी,
मुंह स्वर्गे सारी सैने मालक बिधाता करनी तिन्नें फाज़त आप्पै।
तिंयां हणैं मेरै जुधे बलबान घोल़ै ज़िहै।
यहूदे आद-लुआदा जैंदरा ई का निखल़णअ इहअ
ज़ुंण भबना बणाणां लै सोभी का खास कूणींए ज़ानीं ज़िहअ हणअ।
सह हणअ डेरे पाक्की खुंढी ज़िहअ,
सह हणअ इहै धणशा ज़िहअ ज़ुंण
कतीरा शोटणा लै आसा ढोही डाहअ द,
एऊ देशै ज़ेतरै बी बलबान राज़ै हणैं,
तिंयां निखल़णैं यहूदे आद-लुआदा ई जैंदरा का।
यहूदा मुल्खे परज़ा हणीं जुधा दी शूरबीर जोधै ज़िहै
ज़ुंण आपणैं दुशमणा बाता च़िक्करै जैंदरी बदल़ा।
तिन्नां करनै जुध किल्हैकि हुंह बिधाता हणअ तिन्नां संघै आप्पै।
तिन्नां डरै ठुर्हनै घोल़ै प्रैंदै शुंआर दुशमण बी बापस।”
बिधाता बोला इहअ,
“मुंह बणाणैं यहूदे आद-लुआद बलबान,
मुंह बच़ाऊंणै युसुफे आद-लुआद,
मुंह करनी तिन्नां लै झींण अर तिंयां आणनैं मुंह घअरा लै बापस।
तेखअ रहणैं तिंयां इहै ज़िहै कि मंऐं निं तिंयां कधि डाहै शोटी।
हुंह आसा तिन्नों परमेशर बिधाता अर
तिन्नें अरज़ हेरनी मुंह शूणीं।
एप्रैमे आद-लुआद हणैं बलबान जोधै,
तिंयां हणैं इहै खुश ज़िहै दाखो रस झुटी दिलै खुशी हआ।
एता भाल़ी हणीं तिन्नें लुआद बी आजू खुश,
तिंयां हणैं मुंह बिधाता लै खास्सै खुशी।
मुंह करनै तिंयां एक्कै शल़ेल़्ह पाई सोभ कठा,
किल्हैकि तिंयां आसा मंऐं छ़ड़ैऊऐ दै।
तिंयां बढणैं तिहै ई खास्सै ज़िहै तिंयां पैहलकै ज़मानै आसा तै।
एही ता आसा मंऐं तिंयां देशै-देशै डाहै दै छिंगी,
तज़ी बी फिरनी तिन्नां दूर देशै बी मेरी आद।
तिंयां अर तिन्नें शोहरू-शोहरी रहणैं ज़िऊंदै
संघा एछणैं तिंयां फिरी।
मुंह पजैल़णैं तिंयां मिसर अर अश्शूर देशा का बापस,
संघा बस्साऊंणैं मुंह तिंयां तिन्नें आपणैं देशै,
तिंयां बस्साऊंणैं मुंह गलाद अर लाबानोन मुल्खै,
अह सारी ज़ैगा बी हणीं तिन्नां बस्सणा लै थोल़ी।
ज़ेभै तिंयां घोर आफ़ते समुंदरा बाती एछे,
मुंह बिधाता शोटणी तिंयां छ़ाल्ली आरी-आरी,
नील दरैअ शकेऊणअ मुंह थाल्लै तैणीं।
अश्शूरीओ घमंड करनअ मुंह खतम अर
बलबान मिसर देशा निं किछ़ै बल रहणअ।
इज़राईली लै दैणअ मुंह बिधाता आप्पै बल,
तिन्नां करनी मुंह बिधाते ज़ै-ज़ैकार।”
बिधाता बोला इहअ,
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.