Kulvi Outer Seraji Bible
तितस 1
अदर
हुंह पल़सी लिखा ऐहा च़िठी ताह तितसा लै। हुंह आसा परमेशरो दास अर मसीहा ईशूओ शधाणूं। हुंह आसा तिन्नें विश्वासा मज़बूत करदअ छ़ाडअ द ज़ुंण परमेशरै आप्पू लै आसा छ़ांटै दै अर तिन्नां मसीहे बारै शुची शिक्षा सखाऊंदअ। ताकि तिंयां तेही ज़िन्दगी ज़िऊए ज़ेता करै परमेशर खुश हआ।
एतो नतिज़अ हआ इहअ कि तिन्नां आसा परमेशरा संघै सदा ज़िऊंणें आशा किल्हैकि परमेशर ज़ुंण कधि निं झ़ुठअ बोल्दअ, तेऊ आसा एऊ संसारा बणाणैं का आजी करार किई दी कि तेऊए छ़ांटै दै लोग रहणैं सदा ज़िऊंदै। एभै किअ परमेशरै ऐबै ठीक मोक्कै खुशीओ समाद हाम्हां लै प्रगट अर हाम्हैं खोज़ा एता हर ज़ैगा। म्हारै उद्धार करनै आल़ै परमेशरै सभाल़ी मुल्है अह ज़िम्मैंबारी। तेऊ दैनअ मुल्है अह हुकम कि हुंह तेऊ लै एऊ कामां करे।
हुंह लिखा ऐहा च़िठी तितसा लै। तूह आसा मुल्है मेरै शोहरू ज़िहअ किल्हैकि तूह करा मसीहा दी विश्वास ज़िहअ हुंह करा।
म्हारै बाब परमेशर अर म्हारै उद्धार करनै आल़ै प्रभू ईशू मसीहा का आसा मेरी एही अरज़ कि ताल्है लोल़ी तेऊओ जश अर शांती सदा हुई।
क्रेतै टापू दी तितसो काम
हुंह आअ त ताह क्रेतै टापू दी एते तैणीं छ़ाडी कि तूह बाकी रही दी गल्ला सधेरे, अर ज़िहअ मंऐं बोलअ तेते साबै हर नगरी दी विश्वासी टोली लै सैणैं छ़ांटे।
टोलीए सैणें लोल़ी नर्दोश ज़िन्दगी हुई। सह लोल़ी आपणीं लाल़ी लै शुचअ-पाक्कअ हुअ अर तेऊए शोहरू-माठै लोल़ी विश्वासी होए अर आपणैं ईज-बाबे हर गल्ला मना अर तिन्नों लोल़ी सोभी मांझ़ै भलअ नाअं हुअ। किल्हैकि ज़ुंण मसीही टोलीओ सैणअ आसा सह आसा परमेशरे घअरो भढारी। तेऊ लै आसा ईंयां गल्ला ज़रूरी कि सह लोल़ी नर्दोश हुअ, सह नां हठी अर नां धखी का रोश्श करनै आल़अ लोल़ी हुअ। सह नां शराबी अर नां हर बगत च़िखणैं आल़अ लोल़ी हुअ अर नां सह ढब्बै-धेल्लैओ मांण करनै आल़अ लोल़ी हुअ।
तेऊ लोल़ी आपणैं घअरै एछणैं आल़ै प्राहुंणैंओ अदर किअ, सह लोल़ी इहअ ज़ुंण होरी लोगा लै भलअ करनअ च़ाहा। सह लोल़ी सोभी गल्ला दी सबर करनै आल़अ अर धर्मीं हुअ। सह लोल़ी इहअ पबित्र हुअ ज़हा सोभै मना, तेऊ लागा आपणैं दिले भाअ हर बगत आपणैं बशै डाहणैं। तेऊ लागा तिन्नां सत्ता दी पाक्कअ विश्वास करनअ ज़ुंण हाम्हैं आसा खोज़ी दी अर तेते ई साबै आपणीं ज़िन्दगी बी ज़िऊए, ताकि तेऊ भाल़ी होर लोग बी तेही ई ज़िन्दगी ज़िऊए अर ज़ै कुंण एऊ साबै ज़िन्दगी नांईं च़ाहंदै तिंयां बी लोल़ी समझ़ाऊई ज़ाणैं।
हुंह बोला इहअ एते तैणीं कि कई लोगा करनअ शुची शिक्षो बरोध, ज़ुंण बगैर मतलबे गल्ला सखाऊआ अर होरी लै धोखअ दैआ। ईंयां इहै आसा खासकर तिन्नां मणछा मांझ़ा का ज़ुंण अज़ी बी यहूदी बधान मना अर होरी विश्वासी लै खतैर करना लै बोला। इना इहै लोगा रोक्का विश्वासी मांझ़ै एही शिक्षा दैणैं का। किल्हैकि एही गलत शिक्षा करै करा तिंयां कई घअरो विश्वास बरैबाद। तिंयां करा इहअ एते तैणीं कि लोग तिन्नां लै ढब्बै दैए।
तिन्नां ई मांझ़ै आसा क्रेतै टापू का एक मणछ ज़ुंण तिन्नों गूर आसा, तेऊ बोलअ इहअ, “क्रेतै टापूए लोग बोला हर बगत झ़ुठअ। तिन्नों बभार आसा बणें पशू ज़िहअ। तिंयां आसा नज़ाहणै अर तिन्नां लोल़ी खाणां लै हर बगत खास्सअ।” क्रेतै लोगे बारै ईंयां गल्ला आसा शुची बोली दी। इना लोगा सखाऊ काठअ बणी करै ताकि तिंयां मसीहा ईशूए बारै शुची शिक्षा दी विश्वास करे अर तिंयां यहूदी मणछे कथ्या काहाणीं दी अर तिन्नां मणछे गल्ला दी धैन नां दैए ज़ुंण सत्ता का कबाता हआ पेठै दै।
ज़ै कुंण पाप करनअ नांईं च़ाहे अर पाप करने सोठ नांईं आथी, तै आसा तेऊ मणछा लै सोभै गल्ला भली। पर ज़ै कुंण बूरअ आसा अर ईशू दी विश्वास निं करदअ, तेऊए साबै निं किछ़ै च़ीज़ शुची आथी। किल्हैकि तिन्नें मन्न अर सोर आसा दुहै भ्रष्ट हुऐ दै।
तिंयां झ़ुठी गूरू बोला इहअ कि हाम्हां का आसा परमेशरो थोघ, पर तिन्नें काम अर बभारा करै जाआ थोघ लागी कि तिन्नां का निं परमेशरो थोघ आथी। किल्हैकि तिंयां आसा च़िल़्हखरै अर इहै ज़ुंण परमेशरो हुकम नांईं मंदै। तिंयां निं कोई भलअ करी सकदै।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.