Kulvi Outer Seraji Bible
2 तिमोथी 4
ज़ेभै मसीहा ईशू राज़ै ज़िहअ राज़ करदअ एछणअ, तेऊ करनअ तेभै दुही लोगो नसाफ ज़ुंण ज़िऊंदै आसा अर तिन्नों बी ज़ुंण मरी आसा गऐ दै। हुंह करा ताखा मानदारी दी परमेशर अर मसीहा शाजत मनी अरज़ कि मसीहे बारै परमेशरो बैण खोज़ सोभी का। हर बगत रह एता लै तैर च़ाऐ ताल्है सान मोक्कअ भेटे या कठण। ज़ेभै लोग गलत करा तेभै खोज़ तिन्नां का कि ठीक किज़ै आसा। तिन्नां लै दै चतैनगी कि पाप निं करा। पर तिन्नां लै दै हैअ बी। इना सोभी गल्ला कर सबर डाही, धैन डाही दै तिन्नां लै शिक्षा।
हुंह खोज़ा ताखा इना गल्ला कि आजू एछणअ इहअ बगत कि हाम्हां मांझ़ै लोगा बी निं परमेशरे असली गल्ला मनणी। पर तिन्नां लोल़णैं आप्पू लै इहै गूरू ज़ुंण तिन्नां का सिधी एही गल्ला सखाओए ज़ुंण तिंयां करनअ च़ाहा। एऊ साबै हआ तिन्नां सदा नऊंईं अर होरी साबै गल्ला शुणनेओ च़ाअ। तिन्नां निं सत्त मनणअ पर तिन्नां शुणनी मणछै आपणैं साबै बणाईं दी बृथा कथ्या।
पर तिमोथी, तूह रहै आप्पू आपणैं काबू दी, च़ाऐ ताल्है किछ़ बी होए अर ज़िहै बी दाह-दुख एछे तिन्नां ज़िरै। खुशीए समादा खोज़णा लै लागा ताह खास्सी मैन्थ करनी परमेशरो दास हणें नातै लागा ताह तिंयां सोभै काम करै ज़ुंण ताखा सभाल़ै दै आसा।
मंऐं डाही ताखा ईंयां गल्ला एते तैणीं खोज़ी कि मेरी मौत आसा नेल़ अर मेरअ गअ एऊ संसारा डेऊणेओ बगत पुजी। हुंह करनअ तिन्नां अर्घै ज़िहअ तरैल़ी परमेशरे बेदी दी बल़ीदान। हुंह मुक्कअ बधिया कुश्ती लल़ी, अर आपणीं ठुहर बी मुक्कअ हुंह पूरी करी, हुंह रहअ खिरी तैणीं शुचअ-पाक्कअ। प्रभू दैणअ मुल्है आजू मुगट ज़ेता लै धर्मों मुगट बोला किल्हैकि मंऐं किअ परमेशर खुश। सह ज़ुंण धर्मां संघै नसाफ करा तेऊ दैणअ मुल्है सह तैहा धैल़ी ज़ेभै सह भिई फिरी एछणअ। इहअ निं कि तेऊ दैणअ सिधअ मुल्है, पर तिन्नां सोभी लै बी ज़ुंण तेऊए फिरी एछणा लै खास्सै झ़ूरा।
खास समाद
मुंह सेटा लै कर छ़ेक्कै एछणें कोशिश। दमास डेऊअ मुंह छ़ाडी थिस्सलूणी नगरी लै किल्हैकि सह झ़ूरा एऊ संसारै ज़िन्दगी लै खास्सअ। करिशकेश डेऊअ गलात मुल्खा लै अर तितस डेऊअ दलमतिआ मुल्खा लै।
मुंह सेटा आसा सिधअ लूका, आप्पू एछै अर मार्कुसा बी आणै संघा, किल्हैकि तेऊ हेरनी इधी मेरै कामां लै मज़त करी। तुखिकुस हेरअ मंऐं इफिसुस नगरी लै छ़ाडी। ज़ुंण कोट मंऐं त्रोआस करपुस भाई सेटा आसा छ़ाडी आअ द, ज़ेभै तूह एछे, तेभै आणै तूह तेऊ कोटा अर कताबा, खासकर च़ाम्भल़े कताबा आप्पू संघा।
सकंदर ठठारै किअ मुल्है खास्सअ बूरअ, प्रभू दैणीं तेता पिछ़ू आप्पै तेऊ लै सज़ा।1
तूह बी रहै तेऊ का बच़दअ, किल्हैकि ज़ुंण हाम्हैं मसीहे बारै गल्ला खोज़ा तेतो किअ तेऊ खास्सअ बरोध। पैहली पेशी लै ज़ांऊं हुंह नसाफ दालता दी खल़अ हुअ, मंऐं खोज़ी आपणैं कामें बारै सारी गल्ला, तेभै निं मुंह बाखा एक विश्वासी भाई बी मुल्है हैअ दैणैं आल़अ त। तिंयां सोभ खल़्हुऐ मुंह छ़ाडी बागै। भलअ हणअ त इहअ कि मेरै परमेशरा का तेतो इना साब-कताब नां दैणअ पल़े। पर प्रभू हुअ मुंह संघै खल़अ अर तेऊ किई मेरी मज़त। तेऊ दैनी मुल्है शगती, तैही हुअ हुंह मसीहा ईशूए बारै राम्बल़ै करै खोज़णा लै सफल अर ज़ेतरै बी होरी ज़ातीए लोग तिधी दालता दी तै खल़ै तिन्नैं शूणअ सोभी। प्रभू बच़ाऊअ हुंह मरनै का ज़िहअ कि भुखै सिहे खाखा का आणअ छ़ड़ैऊई।2
मुंह आसा भरोस्सअ बी कि प्रभू बच़ाऊंणअ हुंह बूरै खातरै का। तेऊ पजैल़णअ हुंह राज्ज़ी-राम्बल़अ स्वर्गै ज़िधी सह राज़ करा। तेऊओ प्रतप्प लोल़ी जुगै-जुगै हंदअ रहअ। एवमस्तू।
खिरी अदर करनअ
बैहण प्रिस्किला अर तेसे लाल़ै अकबिला अर ओनेसफोरसे सारै टबरा संघी दैऐ मुंह बाखा राज्ज़ी-खुशी। इरास्तुस आसा करिन्थ नगरी रह द अर त्रोफिमस आसा मंऐं मिलेतुस टापू ई छ़ाडअ द, सह आसा बमार।
कोशिश करै हिंऊंदा का आजी एछणें, ईबलुस अर पुंदेस, अर लीनुस अर कलौदिआ अर होरी सोभी विश्वासी भाई लै दैऐ राज्ज़ी-खुशी।
हुंह करा अरज़ कि प्रभू अर तेऊओ जश लोल़ी ताह संघै सदा रहअ।
Source notes (2)
- Cross-reference भज. 28:4; रोम. 12:19
- Cross-reference भज. 22:21; दान. 6:21
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.