Kulvi Outer Seraji Bible
तितस 2
शुची शिक्षा दैणीं
पर तितस, तूह दैऐ विश्वासी लै हर बगत एही शिक्षा ज़ुंण सत्ते साबै आसा। प्रोढै मणछा लै बोल कि हर बगत रहणअ आपणैं काबू दी, तिन्नां लागा आपणअ बभार इहअ डाहणअ कि होर लोग तिन्नों अदर करे अर राम्बल़अ बभार करे। तिन्नां लागा परमेशरा दी पाक्कअ विश्वास डाहणअ। होरी संघै डाहणीं शुची झ़ूरी अर इना सोभी गल्ला करा च़ाऐ कठण किल्है निं होए।
प्रोढी बेटल़ी लै बोल इहअ कि तिन्नों बभार लोल़ी सोभी साबै परमेशरो अदर करनै आल़अ हुअ। तिंयां निं होरीए बारै बूरअ बोल़णैं आल़ी लोल़ी हुई। पर तिन्नें लोल़ी होरी का भली गल्ला सखाऊई। इनै प्रोढी बेटल़ी लोल़ी ज़ुआन बेटल़ी ईंयां गल्ला सखाऊई कि आपणैं लाल़ै अर शोहरू-माठै संघै डाहणीं झ़ूरी। इनै प्रोढी बेटल़ी लोल़ी खारकै का इहअ बी सखाऊअ कि हर बगत डाहणीं आपणीं देही पबित्र अर काबू करी, आपणैं मर्धा छ़ाडी निं होरी मर्धा संघै छ़ोतली हणअ, आपणैं घअरै करनअ राम्बल़अ काम, होरी लै करनी झींण अर आपणैं मर्धे मनणी हर गल्ला। तिन्नैं लोल़ी ईंयां सोभै गल्ला किई ताकि कुंण परमेशरे बैणे निंदा नां करे।
इहै ई खारकै मर्धा बी कर समझ़ाऊई, कि सोभी गल्ला दी रहणअ हर बगत आपणैं काबू दी। हर बगत करनै तंऐं भलै काम। ताकि ताह भाल़ी होर बी तिहै ई भलै काम करे। तेरी शिक्षा दी लोल़ी नित-पत्त अर धैन मन्न हुअ। तेरी शिक्षा लोल़ी हर बगत एही शुची हुई ज़ेता लै कुंण बूरी निं बोली सके। ताकि ज़ुंण तेरै ईशू मसीहा लै कामों बरोध करे तिंयां हणैं शर्मिंदै किल्हैकि तिंयां निं म्हारै बारै किछ़ै गलत बोली सकै।
ज़ुंण विश्वासी गलाम आसा तिन्नां सखाऊ इहअ कि आपणैं मालके शुणनी हर गल्ला। तिन्नां लै बोल तिहअ करना लै ज़ेता करै तिन्नें मालक खुश होए अर तिन्नें कामें बारै निं तिन्नां संघै हठल़दै लागणअ। तिन्नां लै बोल कि धख बी च़ोरी च़लाकी निं करनी पर तिन्नैं रहणअ आपणैं मालका लै शुचै-पाक्कै। ताकि लोग तिन्नों भलअ सभाब अर ज़ुंण बी तिंयां काम करा भाल़े अर लोग तेतो अदर करे ज़ेता हाम्हैं म्हारै उद्धार करनै आल़ै परमेशरे बारै सखाऊआ।
विश्वासी सखाऊ इहअ ई किल्हैकि परमेशरै किअ आपणअ जश प्रगट कि सह च़ाहा सोभी मणछा तिन्नें पापा का बच़ाऊंणअ अर अह आसा तिन्नां लै दान। एऊ जशा करै सखाऊआ परमेशर हाम्हां का कि हाम्हैं तिहअ बभार नां करे ज़ेता करै परमेशर खुश निं हंदअ तिहअ बभार करे ज़ेता करै परमेशर खुश हआ अर संसारे च़िज़ा लै च़ाहा डाहणीं छ़ाडे। पर एऊ जुगै हाम्हैं धर्म अर च़ाकरी डाही बभार करे ज़ेता करै शुझिए कि हाम्हैं करा परमेशरो अदर। हाम्हैं तैहा महान धैल़ी न्हैल़ै लागै दै ज़ेते हाम्हां आशा आसा। अह आसा सह धैल़ी ज़ेभै ईशू मसीहा ज़ुंण म्हारअ महान परमेशर अर उद्धार करनै आल़अ आसा, सह आपणैं सारै प्रतप्पा दी पृथूई लै फिरी एछणअ। हाम्हां लागा तेते ई साबै आपणअ बभार डाहणअ।
तेऊ मसीहा दैनी म्हारी तैणीं आपणीं ज़िन्दगी, ताकि सह हाम्हां म्हारै सोभी पापा का छ़ुटकारअ करी अर हाम्हां शुचै करे ताकि हाम्हैं तेऊए आपणैं खास लोग होए। ज़ुंण भलै ई भलै काम च़ाहा करनै।1
तिमोथी, हुंह च़ाहा इहअ कि तूह तिधी क्रेतै रहणैं आल़ै विश्वासी लै इना गल्ला सखाओए ज़ुंण मंऐं ताखा खोज़ी। आपणैं लोगा लै दै इना गल्ला करना लै हैअ, ज़िधी ज़रूरी आसा तिधी समझ़ाऊ तिन्नां। ताह आसा इहअ करनैओ हक। ऐहा गल्लो डाहै धैन कि सोभी लोल़ी तेरअ अदर किअ।
Source notes (1)
- Cross-reference लुआ. 19:5; बधा. 4:20; 7:6; 14:2; भज. 72:14; 130:8; एज. 37:23
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.