प्रकाशन

प्रकाशन

परमेशरे ज़ुंण गल्‍ला जोहन्‍ना का रहैऊई

भेत

लिखणैं आल़अ: जोहन्‍ना

पहल़णैं आल़ै: एशिया मुल्खे साता विश्वासी टोली लै

सन: 67-80

परमेशरै जोहन्‍ना का प्रगट किई दी गल्‍ला लिखी तेऊ तधू; ज़धू लोग मसीही विश्वासी तिन्‍नें विश्वासे बज़्हा ईशू मसीहा दी प्रभू अर मालके रुपै विश्वास करने बज़्हा च़िक्‍कदै-मारदै तै लागै दै। एते लिखणैं आल़ेए फिकर करनैओ खास मतलब थिअ आपणैं पहल़णैं आल़ै दी आशा अर जोश भरनअ अर इहअ खोज़णअ कि तिंयां इना दाह-दुखे धैल़ै शुचै-पाक्‍कै रहे।

ऐहा कताबा दी आसा खासकर ज्ञैने अर दर्शणें कई रुपै, शारै करै आसा समझ़ाऊअ द। हई सका कि तेऊ ज़मानें विश्वासीए टोली गई ती तिंयां गल्‍ला समझ़ एछी, पर होरी सोभी लोगा लै रहअ अह एक भेद बणी। ज़िहअ संगीता दी एक सुर हआ तेही खोज़ा ऐहा कताबे खास गल्‍ले बारै बी कई बारी हर तरिकै करै ज़ुदै-ज़ुदै दर्शण कई साबै। ज़ै कि ऐहा कताबे बारै खोज़णें बारै निं सोभै एक मन्‍न आथी, तज़ी बी आसा एते खास गल्‍ल साफ-साफ परमेशर प्रभू ईशू करै करनै राख्सा संघी आपणैं सारै दुशमणा पूरी सदा लै पठी खतम। ज़ांऊं अह ज़ीत हई जाणी, तेखअ करनै तेऊ आपणीं शुची-पाक्‍की परज़ा नऊंईं पृथूई अर नऊंऐं सरगे बर्गत करै भरपूर।

जोहन्‍ना खोज़ा इहअ कि ज़ेभै दाह-दुख अर आफ़ता खतम हणीं, परमेशरे शुचै-पाक्‍कै मणछा भेटणीं महान बर्गता:

“तेखअ शूणअ मंऐं राज़गाद्दी सेटा का एक ज़ोरै इहअ बोल्दअ, ‘भाल़, एभा पोर्ही बस्सणअ परमेशर मणछा जैंदरी, अर तेऊ करनअ तिन्‍नां मांझ़ै बसेरअ, अर तिंयां हणैं तेऊए परज़ा अर परमेशरा रहणअ आप्पू ई तिन्‍नां संघै अर सह ई हणअ तिन्‍नों परमेशर। तेऊ टुशणैं तिन्‍नें आछिए आशू, अर तेखअ निं कधि मौत एछणी अर नां शोग अर नां लेरा-पकारा अर नां दाह दुख। पैहलै संसारै ज़ुंण गल्‍ला ती, तिंयां सोभै गल्‍ला हणीं खतम।’”

(21:3,4)

कताबे बांड

भेत 1:1-8

शुरूआती दर्शण अर साता विश्वासीए टोली लै च़िठी 1:9—3:22

साता मोहरा करै बंद च़ाम्भल़े च़िठी 4:1—8:1

सात नाद 8:2—11:19

बडी दानअ अर दूई पशू 12:1—13:18

होर कई दर्शण 14:1—15:8

परमेशरे प्रकोपे सात लोहदी 16:1-21

बाबेल देशो बनाश अर पशू, झ़ुठै गूर अर राख्से हार 17:1—20:10

खिरी नसाफ हणअ 20:11-15

नऊंअ सरग, नऊंईं पृथूई अर नऊंअ एरुशलेम 21:1—22:5

नचोल़ 22:6-21