प्रकाशन 1

1परमेशरै खोज़ी ईशू मसीहा का तिंयां गुप्त गल्‍ला ज़ुंण आजू पाक्‍कै दी आसा हणैं आल़ी, ताकि सह तिन्‍नां च़ाकरी करनै आल़ै लै प्रगट करी सके। तेखअ दैनअ ईशू आपणअ स्वर्ग दूत आपणैं दास जोहन्‍ना सेटा छ़ाडी इना गल्‍लो समाद।1

2मंऐं जोहन्‍ना लिखी तिंयां सोभै गल्‍ला ज़ुंण मंऐं भाल़ी। हुंह खोज़ा एऊ लिखै दी परमेशरो बैण अर तिन्‍नां शुची शिक्षा ज़ुंण ईशू मसीहा मुल्है प्रगट किई।

3परमेशर दैआ तिन्‍नां सोभी लै बर्गत ज़ुंण इना प्रगट किई दी गल्‍ला होरी लै पहल़ा अर तेऊ दैणीं तिन्‍नां लै बर्गत ज़ुंण शूणां अर मना। किल्हैकि ईंयां गल्‍ला आसा छ़ेक्‍कै हणैं आल़ी।

सोभी सात पबित्र मसीही टोलीओ अदर

4हुंह जोहन्‍ना लिखा एता तम्हां विश्वासी लै ज़ुंण एशिया मुल्खै साता टोली दी आसा।

हुंह करा एही प्राथणां कि तम्हां लोल़ी परमेशरा का जश अर शांती भेटी। सह आसा इहअ परमेशर ज़ुंण सदा तिहअ ई रहा, सह ज़ुंण आझ़ आसा, आझ़ा का आजी त अर आजू बी रहणअ। तिन्‍नां साता आत्मां बाखा बी लोल़ी झींण अर शांती भेटी ज़ुंण तेऊए राज़गाद्दी सम्हनै आसा 5अर ईशू मसीहा बाखा बी लोल़ी तम्हां सोभी झींण अर शांती भेटी ज़ुंणी शुचै-पाक्‍कै रही परमेशरो सत्त प्रगट किअ। अह आसा सह पैहलअ ज़ुंण मरी करै भिई ज़िऊंदअ हुअ अर सह आसा एऊ संसारे सोभी प्रैंदै राज़ करनै आल़अ।2

सह आसा हाम्हां लै झणैल़ू अर तेऊ बच़ाऊऐ हाम्हैं, तेऊ छ़ड़ैऊऐ हाम्हैं म्हारै पापा का आपणैं लोहू करै। 6तेऊ बणाऐं हाम्हैं इहै लोग ज़सरअ राज़अ परमेशर आप्पै आसा अर तेऊ बणाऐं हाम्हैं आपणैं बाब परमेशरा लै प्रोहत। तेऊओ ई अदर अर राज़ लोल़ी जुगै-जुगै सदा लै रहअ। एवमस्तू।3

7भाल़ा, सह आसा बादल़ा संघै स्वर्गा का एछणैं आल़अ।

सह शुझणअ सोभी मणछा का,

ज़ुंणी तेऊ लै कील बर्छ़ै बी बाहै तै तिन्‍नां का बी शुझणअ सह।

पृथूईए सोभी लोगा पाणीं तेभै ज़ोरै-ज़ोरै लेरा ज़ेभै सह तिन्‍नां भाल़णअ।4

एवमस्तू।

8परमेशर बिधाता बोला इहअ, “आदी अर अंत, हुंह आसा सह ई ज़ुंण आझ़ आसा, ज़ुंण आझ़ा का आजी त अर आजू बी आसा एछणैं आल़अ, सर्वशक्तिमान।”5

जोहन्‍ना मसीहे दर्शण हणैं

9हुंह आसा थारअ संघी विश्वासी भाई जोहन्‍ना। हुंह आसा तम्हां संघै परमेशरे राज़ा दी मसीहा लै सबर डाही दुख ज़िरना लै साझ़ू ज़ुंण तिन्‍नां लै एछा ज़सरअ नातअ तेऊ संघै आसा। हुंह छ़ाडअ पतमुस टापू लै रोम राज़े सैणैं एक कैदी। किल्हैकि हुंह खोज़ा त परमेशरो बैण अर ईशू मसीहो शुचअ समाद। 10इहअ हुअ कि एकी धैल़ै तै हाम्हैं होरी विश्वासी संघै परमेशरे स्तोती करदै लागै दै, अर परमेशरे आत्मां किअ हुंह आपणैं बशै तेखअ शूणअ मंऐं आप्पू पिछ़ू कुंण मुल्है बोल्दअ लागअ द। तेऊओ बोल थिअ इहअ कि ज़िहअ कुंण नाद बाज़दअ होए लागअ द। 11तेऊ बोलअ मुल्है इहअ, “ज़ुंण किछ़ तूह भाल़ा, तेता लिख कताबा दी अर तेता छ़ाड साता विश्वासीए टोली लै, मतलब-इफिसुस, स्मूरना, पिरगमन, थुआथिरा, सरदीस अर फिलेदीलफिया अर लौदिकिया नगरीए टोली लै।”

12मंऐं दैनी पिछ़ू भाल़णीं ज़ुंण मुल्है बोल्दअ त लागअ द, ज़ांऊं मंऐं पिछ़ू भाल़अ, मुखा शुझुऐ सात सदीऐ ज़ल़ै दै। 13तिन्‍नां सदीऐ मांझ़ा-मांझ़ी भाल़अ मंऐं एक मणछे शोहरू ज़िहअ खल़अ। मुखा शुझुअ सह इहअ कि तेऊ आसा खूरा तैणीं च़ोल़अ बान्हअ द अर हिक्‍का दी आसा ज़ेही सुन्‍नें गाची बान्हीं दी।6

14तेऊओ मूंड अर शराल़ तै ज़ेही शेती ऊन, तिंयां ज़ाण्हिंआं तै ज़िहै हिंऊंआं ज़िहै शेतै च़मकदै लागै दै, अर तेऊए आछी ती आगीए लुपल़ै ज़ेही।7

15तेऊए खूर तै ज़िहै च़ोखै कांस्सै ज़िहै कि तेथ आसा आरनैं पाण दैनी दी, ज़ांऊं सह गल्‍ला करा त, तेऊए बोल करा तै एही छ़ेल़ ज़िहअ उछ़टअ पाणींओ छ़ो छ़ेल़ छ़ाडा।8

16सह आसा इहअ सर्वशक्तिमान कि तेऊ तै आपणैं दैहणै हाथै सात तारै ढाकै दै अर तेऊए खाखा का निखल़ा ती ज़ेही दुही बाखा तिछी तलबार, अर तेऊओ मुंह त इहअ च़मकदअ लागअ द कि ज़िहअ सुरज़ दपहरै च़मका।9

17ज़ांऊं मंऐं सह भाल़अ, तेऊए च़रणैं पल़अ हुंह मुल्दै ज़िहअ। तेखअ बोलअ तेऊ मुंह प्रैंदै आपणअ दैहणअ हाथ डाही करै, “डरै निं आथी, हुंह आसा आदी अर अंत अर हुंह आसा सह ज़ुंण सदा ज़िऊंदअ रहा।10

18“हुंह गअ त मरी अर ऐबै भाल़, हुंह आसा जुगै-जुगै ज़िऊंदअ अर मौते अर सुरगे कुंज़ी आसा मुखा।11

19“तैही लिख तिन्‍नां सोभी गल्‍ला, ज़ुंण गल्‍ला तंऐं भाल़ी, अर ज़ुंण गल्‍ला हंदी आसा लागी दी, अर ज़ुंण गल्‍ला आजू हणैं आल़ी आसा। 20तिन्‍नां साता तारैओ भेद, ज़ुंण तंऐं मेरै दैहणै हाथै भाल़ै, अर तिन्‍नां साता सुन्‍नें सदीएओ भेद। तिंयां सात तारै आसा साता टोलीए स्वर्ग दूत अर तिंयां सात सदीऐ आसा सात विश्वासीए टोली।”