Kulvi Outer Seraji Bible
प्रकाशन 15
खिरी पल़ी दी खरी संघै स्वर्ग दूत
ज़ांऊं ईंयां गल्ला मुक्की, मंऐं भाल़ै सरगै नुआहरै नछ़ैण तेता करै हाथुअ मुंह प्राच। मंऐं भाल़ै सात स्वर्ग दूत अर तिन्नां का थिई साता रंगे खरी। तिंयां खरी ती खिरी हणैं आल़ी अर तेता बाद हणअ त परमेशरो प्रकोप खतम।
मंऐं भाल़अ एक समुंदर इहअ सह शुझिआ त आग राल़ी शिश्शै करै बणाअं द। मंऐं इहअ बी भाल़अ ज़ुंण तेऊ पशू अर तेऊए मुहुर्ती प्रैंदै अर तेऊए नाओंए नंबरा का ज़ितै तै, तिंयां भाल़ै तेऊ शिश्शे समुंदरा नेल़ परमेशरे बींन लई खल़ै। तिंयां बोला तै परमेशरे दास मोसा अर मिम्मूंए गिह बोली इहअ,
“हे सर्वशक्तिमान परमेशर बिधाता, तेरै काम आसा बडै नुआहरै। ओ जुगै-जुगे राज़ैआ, तेरी बात आसा शोभली अर शुची।1
“हे प्रभू, तेरी डरा हेठै लागा सोभी रहणअ, तेरै नाओंए ज़ै-ज़ैकार करनी सोभी, किल्हैकि सिधअ तूह ई आसा पबित्र अर सोभी ज़ाती टेक्कणअ ताह सेटा एछी ताह सेटा माथअ। किल्हैकि तेरै नसाफ करने काम हुऐ प्रगट।”2
सात खरी एछणें प्रिहअ
ज़ांऊं ईंयां गिह बोली मुक्कै, मंऐं भाल़अ स्वर्गो भबन आसा घुआल़ी। सह ज़ाण्हिंआं त तेऊ खिम्भा ज़िहअ ज़ेता इज़राईली च़ाल़्ही साला तैणीं रेगीस्तानै रहै आप्पू संघा रगाऊंदै लागी। तेखअ तिंयां सात स्वर्ग दूत ज़हा का तिंयां खिरी हणैं आल़ी सात खरी ती, तिंयां निखल़ै भबना का बागै। तिन्नैं तै चटाक च़मकदै शेतै झिकल़ै बान्हैं दै अर तिन्नें हिक्का बाती ती सुन्नें गाची। तेखअ तिन्नां च़ऊ ज़िऊंदै प्राणीं मांझ़ै दैनी कुंणी एकी ज़ण्हैं तिन्नां स्वर्ग दूता का एक-एक लोहदी ज़ुंण जुगै-जुगै ज़िऊंदै परमेशरे घोर प्रकोपा करै ती भरी दी। भबन भर्हुअ तैहा धूँईं करै ज़ुंण परमेशरे प्रतप्पा अर शगती का आई। भबनै निं तेभै तैणीं कोहै डेऊई सकदअ त ज़ेभै तैणीं तिंयां सात घोर खरी निं हई मुक्के ज़ुंण तिन्नें सात स्वर्ग दूतै आणी ती।3
Source notes (3)
- Cross-reference भज. 111:2; 139:14; 145:17
- Cross-reference भज. 86:9; जेर. 10:7; मला. 1:11
- Cross-reference ईशा. 6:4
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.