Kulvi Outer Seraji Bible
प्रकाशन 13
दूई पशू
तेखअ भाल़अ मंऐं एक होर पशू समुंदरा का निखल़दअ, तेऊए तै दस शींग अर सात मूंड तेथ तै राज़ मुगट अर तेथ ती परमेशरा लै निंदा लिखी दी।1
ज़ुंण सह एक होर पशू मंऐं भाल़अ, सह थिअ च़राघा ज़िहअ अर तेऊए खूर तै भाल्लू ज़िहै अर तेऊओ मुंह त सिहा ज़िहअ अर तैहा बडी दानुईं दैनी आपणीं राज़गाद्दी अर आपणअ सारअ हक अर आपणीं सारी शगती तेऊ लै।
मंऐं भाल़अ तेऊए मुंडै एक बेघै बडअ खाढ पल़अ द, अर सह ज़ाण्हिंआं त ज़िहअ कि एतरै बडै ज़खमा करै मरनअ सह। पर सह बिज़रअ संघा हुअ ज़ाथी ताज़अ-नरोगअ! सारी पृथूईए लोगा लागअ तेता भाल़ी प्राच, अर तिंयां लागै ज़िहअ तेऊ पशू बोलअ तिहअ करदै। तिंयां लागै तैहा बडी दानुईंए च़ाकरी अर पूज़ा करदै, किल्हैकि तैहा दैनअ त तेऊ पशू लै आपणअ हक। तिन्नैं किई इहअ बोली तेऊ पशूए पूज़ा, “एऊ पशू बराबर महान बलबान निं कोहै आथी अर एऊ संघै निं कोहै जुध करी सकदअ।”
तेऊ पशू भेटअ आपणैं बारै घमंड करनैओ अर परमेशरे निंदा करनैओ हक। एऊ कामां करनैओ हक भेटअ तेऊ बयाल़ी भिन्नैं तैणीं। तेऊ पशू खोल्ही परमेशरे निंदा करना लै आपणीं खाख अर तेऊ किई तेऊए नाओंए अर पबित्र ज़ैगा ज़िधी सह रहा तेते निंदा अर तिन्नां सोभी लोगे निंदा ज़ुंण स्वर्गै रहा। तेऊ पशू लै दैनअ इहअ हक कि पबित्र लोगा संघै जुध करे अर तिन्नां हारी पाए। तेऊ लै दैनअ हर देश, हर खिंब, हर लोग अर हर भाषा दी अर हर ज़ाती दी हक।2
पृथूई दी तिंयां सोभै रहणैं आल़ै ज़सरै नाअं संसारा बणाणैं का आजी तेऊ मिम्मूं ज़िन्दगीए कताबा दी नांईं लिखै, तिंयां लागै तेऊ पशूए च़ाकरी अर पूज़ा करदै।
“ज़ै कुंण समझ़णअ च़ाहे तै दैऐ ऐहा गल्ला दी धैन कि परमेशरे आत्मां टोली लै किज़ै बोला!
“ज़हा कैद खानै डेऊणअ, सह हणअ कैद,
“ज़ुंण तलबारा करै मारे, सह बी मारनअ तलबारा करै,
“पबित्र लोगो विश्वास अर सबर आसा एता ई दी।”3
तेखअ भाल़अ मंऐं एक होर पशू पृथूई का निखल़दअ, तेऊए तै होछ़ै मिम्मूं ज़िहै दूई शींग पर सह करा त तैहा बडी दानुईं ज़ेही गल्ला। एऊ का थिअ तेऊ पैहलै पशूओ सारअ हक अर एऊ पशू बोलअ ज़ोरा-ज़ोरी पृथूई अर तेथ दी रहणैं आल़ै सोभी मणछा का तेऊ पैहलै पशूए पूज़ा करना लै ज़ुंण सह खाढ पल़ै दै ज़खमा का नरोगअ हुअ त। सह दुजअ पशू बी रहैऊआ त बडै-बडै नछ़ैण अर च़मत्कार, इधी तैणीं कि लोगे आछी सम्हनै बरशाऊआ त सह सरगा का पृथूई दी आग बी।4
कई लोगा पल़अ एऊ दुजै पशू करै असर अर तिंयां पेठै इना रहैन करनै आल़ै कामां भाल़ी सत्ता का कबाता ज़ुंण एऊ पशू पैहलै पशूए शगती करै किऐ तै। संसारे सोभी लोगै बोलअ तेऊ दुजै पशू लै तेऊ पैहलै पशूए पूज़ा करने तैणीं मुहुर्ती बणाणां लै ज़ुंण तलबारे तेतरै बडै ज़खमा करै बी निं मूंअ पर सह हुअ त राम्बल़अ। तेऊ दुजै पशू लै दैनअ तेऊ पैहलै पशूए मुहुर्ती दी शाह पाणैओ हक ताकि सह बोल्दी लागे अर ज़ुंण लोग तैहा मुहुर्तीए पूज़ा नांईं करै तिन्नां सह पशू मारी पाए।5
तेऊ दुजै पशू लाई ज़ोरा-ज़ोरी होछ़ै-बडै, गरीब-सेठ, गलाम-आज़ाद सोभिए दैहणै हाथै या माथै तेऊ पैहलै पशूए नाओंए मोहर। तेऊ किअ अह एते तैणीं कि कोहै मणछ निं किज़ै लई अर बेच़ी सकदअ ज़ै तेऊ दी तेऊ पैहलै पशूए नाअं या नंबर नांईं होए छ़ापअ द। एता समझ़णा लै लोल़ी अक्ल। ज़हा का अक्ल आसा सह सका समझ़ी कि एऊ पशूए नंबरो कै मतलब आसा। किल्हैकि अह आसा एकी मणछो नाअं अर 666 आसा अह नंबर।
Source notes (5)
- Cross-reference दान. 7:3; प्रका. 12:3
- Cross-reference दान. 7:21
- Cross-reference प्रका. 14:12
- Cross-reference 1 राज़. 18:24-29
- Cross-reference दान. 3:5-6
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.