Kulvi Outer Seraji Bible
भज़न 97
बिधाता ई करा नसाफ
राज़अ आसा बिधाता ई! पृथूई हुई खुश अर
समुंदरे होछ़ै-होछ़ै टापू बी हुई नंद।1
तेऊ फेर आसा घणैं बादल़,
तेऊए राज़गाद्दीए आथरी आसा धर्म अर नसाफ।
तेऊ आजू निखल़ा आग अर
सह दहा तेता करै आपणैं दुशमणा।
तेऊओ धुप्पै करै हआ सारै संसारै प्रैश्शअ,
तेऊ भाल़ी छ़ुटा पृथूई काम्मणीं।
बडी-बडी धारा गल़ा बिधाता नेल़ घिऊ ज़ेही,
ज़ुंण संसारे सोभी लोगा प्रैंदै राज़ करा।
भ्रमंड बोला तेऊए बारै इहअ, “नसाफ करा बिधाता ई!”
बिधातो प्रतप्प भाल़णअ सोभी।
ज़हा बृथा मुहुर्तीए पूज़ा करनैओ घमंड आसा, तिंयां हणैं शर्मिंदै,
सोभी देअआ टेक्कणअ बिधाता सेटा माथअ।
इज़राईली हणैं इहअ शूणीं खुश,
यहूदा नगरी करनी नंद किल्हैकि
हे बिधाता, तंऐं किअ शुचअ नसाफ।
ए परम प्रधान परमेशर बिधाता, तेरअ राज़ आसा सारी धरती प्रैंदै,
तूह आसा होरी देअआ का खास्सअ महान।
बिधाता झ़ूरा तिन्नां लै ज़ुंण बूराई का नफरत करा।
सह करा आपणीं परज़े ज़िन्दगीए फाज़त,
सह डाहा तिन्नां कदुष्टा का बच़ाऊई।
धर्मीं मणछे ज़िन्दगी हआ प्रैश्शअ,
भलै मणछा भेटा खुशी।
तिंयां आसा बिधाते परज़ा!
खुशी मनाऊंआं अर
तेऊ परमेशरे करा ज़ै-ज़ैकार ज़ुंण पबित्र आसा।
Source notes (1)
- Cross-reference प्रका. 19:7
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.