भज़न 96

बिधाता आसा महान माहा राज़अ

(1 इतिहास 16:23-33)

1बिधाता लै गांठा एक नऊंईं गिह,

संसारे सोभै लोग बोला तेऊए गिह!1

2बिधाता लै बोला गिह अर तेऊए करा ज़ै-ज़ैकार,

तेऊ हेरै हाम्हैं बच़ाऊई, एऊ खुशीए समादा खोज़ा धैल़ सोभी का।

3होरी देशा का बी खोज़ा ऐहा गल्‍ला कि बिधातो प्रतप्प किहअ आसा अर

इहअ कि तेऊए काम किहै महान आसा।

4बिधाता आसा इहअ महान कि तेऊए स्तोती लागा करनी ई।

सह आसा परमेशर एक्‍कै अर हाम्हां लागा तेऊए ई डरा हेठै रहणअ।

5होरी देशे देअ-देबी आसा सिधी मुहुर्ती,

पर सह आसा बिधाता ई ज़ुंणी सारअ भ्रमंड आसा बणाअं द।

6तेऊ फेर आसा अदर अर प्रतप्प,

तेऊए पबित्र ज़ैगा आसा बल अर शोभा करै भरी।

7पृथूई दी करा सोभी देशे लोग तेऊए ज़ै-ज़ैकार,

ऐहा गल्‍ला मना सोभै कि बिधाता आसा महान अर सोभी का बलबान।

8सोभ करा बिधाते ज़ै-ज़ैकार, एता जोगी आसा सह ई।

सोभ एछा भैंट लई तेऊए दुआरै।

9ज़ेभै सह पबित्र प्रगट होए तेऊ महान अर पबित्र बिधाता सेटा टेक्‍का माथअ,

तेऊए डरै लोल़ी पृथूई दी सोभै झ़ील़ै-काम्बै।

10देशा-देशे लोगा का खोज़ा इहअ, “बिधाता आसा माहा राज़अ!

पृथूई आसा एकी ज़ैगा टकैल़ी दी, सह निं च़ुक्‍कदी आथी,

तेऊ करनअ देशा देशे लोगो धर्मां करै नसाफ।”

11पृथूई अर सरग हुऐ खुश!

समुंदर अर तेते सोभी च़िज़ा लाई क्रुंगा,

12ज़ैगा-ज़िम्मीं अर तेते सोभ गल्‍ला लागी नंद अर

बण-बूट लागै ज़ै-ज़ैकार करदै

13ज़ांऊं बिधाता आप्पै धरती दी राज़ करदअ एछणअ।

तेऊ करनअ संसारे सोभी लोगा प्रैंदै राज़ अर

तेऊए सत्ता करै हणअ सोभी देशे लोगो नसाफ।2