भज़न 95

बिधाते स्तोती

1सोभै करा बिधाते ज़ै-ज़ैकार!

सह1 आसा हाम्हां लै बडी टोल्हा ज़िहअ, ज़ेते आसरै हाम्हैं बच़ा।

2दिला का शूकर करी टेक्‍का तेऊ सेटा माथअ,

गिहा बोल्दी-बोल्दी करा तेऊए ज़ै-ज़ैकार।

3बिधाता आसा सोभी का महान,

सह आसा सोभी देअआ प्रैंदै माहा राज़अ।

4सारी पृथूई प्रैंदै आसा डुघै समुंदरे थाल्‍लै उझै

उछ़टी ज़ोते च़ुंडी तैणीं बिधातो ई राज़।

5समुंदर अर तेते सारी सोभै च़िज़ा आसा तेऊ ई बणाईं दी अर

धरती आसा तेऊए ई हाथे कारीगीरी।

6हाम्हां करनी तेऊ बिधाते ज़ै-ज़ैकार,

हाम्हां टेक्‍कणअ तेऊ सेटा माथअ।

7सह आसा म्हारअ परमेशर

हाम्हैं तेऊए परज़ा आसा तेऊए एही भेडे हेल़्ही ज़िहै

ज़हा सह आपणीं घैहणीं च़राऊआ।

भलअ हणअ त इहअ ज़ै आझ़ हाम्हैं तेऊओ बोल शुणदै।

8परमेशरा संघै निं हठ करदै लागा, ज़ेही इज़राईली उज़र रेगीस्तानै मरीबा

अर मस्सा नाओंए ज़ैगा किई ती।

9थारै दाद-बाब रहै च़ाल़्ही साला तैणीं

परमेशरे महान काम आपणीं आछी भाल़ी बी, तेऊ ई परखदै ई लागी।

10तेखअ छ़ुटी बिधाता का छ़ाड, संघा बोलअ तिन्‍नां लै इहअ,

“इना निं सुंबल़ी सोर ई आथी अर नां ईंयां इहअ समझ़दै कि हुंह किज़ै च़ाहा कि ईंयां करे!”

तैही डाहै बिधाता तिंयां च़ाल़्ही साला तैणीं उज़र रेगीस्तानै ठुल़्दै लाई।

11बिधाता खाऐ रोश्शै इहै सोह,

“तम्हैं मणछ निं मेरी बशैघे ज़ैगा कधि पुजणैं।”