भज़न 98

नसाफ करना लै बिधातो शूकर

1बिधाते गांठा एक नऊंईं गिह,

तेऊ किऐ आपणैं ज़ोरै अर पबित्र बला करै

महान अर नुआहरै काम अर

तेऊए हुई बेघै बडी ज़ीत।

2बिधाता किअ होरी देशा लै बी प्रगट कि

तेऊ का आसा बच़ाऊंणेओ महान बल अर तेऊ किअ नसाफ।

3बिधाता किई इज़राईली लै आपणीं ज़बान पूरी,

सह आसा भरोस्सैमंद अर सह झ़ूरा तिन्‍नां लै सदा।

देशा-देशे सोभी लोगा का शुझुअ आछी कि म्हारअ परमेशर ज़ितअ।1

4ओ पृथूईए लोगो, ज़ोरै-ज़ोरै करा बिधाते ज़ै-ज़ैकार,

ज़ोरै-ज़ोरै गिहा बोली करा तेऊए ज़ै-ज़ैकार।

5तारा आल़ै बाज़ै संघै बोला तेऊए भज़न अर

बींन बाज़ी बोला तेऊए गिहा।

6बिधाता आसा राज़अ, तेऊए करा नर्शिंगै अर

करनाल़ी बाज़ी करै ज़ै-ज़ैकार।

7समुंदर अर तेते ज़ीब लोल़ी क्रुंगदै लागै अर

धरती अर तेते सोभी ज़ीबै लोल़ी ज़ोरै-ज़ोरै हाक्‍का पाई।

8गाडा नाल़ी लोल़ी ताल़ी बाज़ी अर

धारा लोल़ी नाटी पाई तेऊए ज़ै-ज़ैकार किई।

9किल्हैकि सह एछणअ पृथूई दी राज़ करदअ

तेऊ करनअ संसारे मणछा प्रैंदै

सत्त अर नसाफ डाही राज़।