Kulvi Outer Seraji Bible
भज़न 79
इज़राईलीए छ़ुटकारै लै बिधाता का अरज़
असापो भज़न
हे परमेशर, पराई ज़ाती गिम्मी तेरी ज़ैगा,
तिन्नैं लोगै लाई तेरै पबित्र भबनै छ़ोत अर
एरुशलेम नगरी किई तिन्नैं पठी बरैबाद।
तिन्नैं डाही तेरै आपणैं लोगे ल्हासा शोटी, तेथ लागै काअ-गरली!
तेरै भगते ल्हासा धेल़ी-च़िरी बणें ज़ीबै।
तिन्नैं बहाऊआ तेरै लोगो लोहू
पाणीं ज़िहअ सारी एरुशलेम नगरी,
तेथ निं मूंऐं दै मणछे क्रिया-कर्म करदअ बी पिछ़ू छ़ुटअ।
एता भाल़ी लागै हाम्हां फेरे होर देश बी हाम्हां लै हास्सदै अर
म्हारै सुहांगा करदै, तिन्नैं शोटै हाम्हैं शर्मिंदै करी।
हे बिधाता, ताह कै सदा रहणअ हाम्हां का रुश्शी अर तेरअ रोश्श कै कधि निं हणअ ठांढअ?
तेरी रोश्शे आग कै कबल्ली रहणीं ज़ल़दी लागी?
तूह काढ आपणअ रोश्श तिन्नां मणछा प्रैंदै,
ज़ुंण बगैनी ज़ाती ताह नांईं मंदी अर ज़ुंण ताह सेटा अरज़ नांईं करदै।
किल्हैकि तिन्नैं पाऐ तेरै आपणीं ई परज़ा याकबे आद-लुआद मारी, अर
तिन्नैं किअ तेरअ देश बरैबाद।
म्हारै दादा-बाबे पापा पिछ़ू निं हाम्हां लै सज़ा दैऐ आथी।
ऐबै कर तूह हाम्हां लै झींण,
ऐबै हुई म्हारी बेघै बूरी दशा!
हे परमेशर, म्हारी मज़त कर अर हाम्हां बच़ाऊ,
म्हारै पाप माफ करी दै हाम्हां लै छ़ुटकारअ,
ताकि तेरै नाओं अदर होए।
पराई ज़ातीए लोगा लै किल्है दैणअ इहअ बोल़णैंओ मोक्कअ,
“थारअ परमेशर किधी आसा?”
हाम्हां लोल़ी आपणीं आछी शुझुअ कि तंऐं दैनी आपणैं लोगे लोहू बहाऊंणैं पिछ़ू
पराई ज़ातीए लोगा लै सज़ा।1
ज़ुंण कैद आसा किऐ दै तिंयां आसा धकदै लागै दै, तेता शुण तूह,
ज़ुंण ऐबै मारी आसा लाऐ दै, तिन्नां छ़ड़ैऊ तूह आपणैं बला करै।
हे मेरै मालक, ज़ुंणी-ज़ुंणी देशै तेरअ सुहांग किअ,
तेतो बदल़अ लऐ तूह तिन्नां का सात गुणा।
तै करनअ हाम्हां तेरी आपणीं परज़ा कबल्लअ तेरअ शूकर,
हाम्हैं आसा तेरै ई हेल़्हीए भेडा,
हाम्हां रहणअ पोस्ती दर पोस्ती तेरी ज़ै-ज़ैकार करदै लागी।
Source notes (1)
- Cross-reference प्रका. 6:10; 19:2
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.