Kulvi Outer Seraji Bible
भज़न 80
इज़राईली लै अरज़
गाज़ै-बाज़ै आल़ेए सैणैं लै: शोशत्रीमेदूत रागा दी असापो भज़न
हे इज़राईले फुआला, ज़ीबाण, म्हारी शुण,
तूह छाहका युसुफे आद-लुआदा भेडा-बाकरीए हेल़्ही ज़िहै।
हे परमेशर, तूह ज़ुंण फैंखा आल़ै स्वर्ग दूता प्रैंदै आसा बेठअ द,
तूह रहैऊ आपणीं शोभा हाम्हां का।
तूह हअ एप्रैम, बिन्यामीन अर मनिश्शे गोत्रा दी प्रगट।
तूह रहैऊ हाम्हां का आपणअ बल,
तूह एछ संघा बच़ाऊ हाम्हां।
हे परमेशर, हाम्हां कर तिहै ई ज़िहै हाम्हैं पैहलै आसा तै,
हाम्हां बाखा भाल़ प्रैश्शै मुंहैं, तै जाणै हाम्हैं बच़ी।
ए स्वर्गे सारी सैने मालक बिधाता, हाम्हैं आसा तेरी परज़ा,
केभै तैणीं रहणीं ताह म्हारी प्राथणां लै रोश्शै एछी?
तंऐं खैऊअ हाम्हां का बतेर्है दुख अर
भरी-भरी गाडल़ू पणैऊंऐं तंऐं हाम्हां का आशूए।
हाम्हैं हुऐ ओरी-पोरी बस्सै दै दुशमण देशा मांझ़ै सुहांगा लै,
तिन्नैं किऐ हाम्हैं बेइज़त।
ए स्वर्गे सारी सैने मालक बिधाता, हाम्हां कर तिहै ई ज़िहै हाम्हैं पैहलै आसा तै,
हाम्हां बाखा भाल़ प्रैश्शै मुंहैं, तै जाणै हाम्हैं बच़ी। 1
तंऐं आणी मिसर देशा का एक दाखे बेल,
तंऐं काढै पराई ज़ातीए लोग बागै, संघा डाही सह तिन्नें देशै रोही।
तेता लै बणाईं तंऐं बिधाता ज़िम्मीं बधिया ताकि सह राम्बल़ी राझ़े,
तेते ज़लैल़ै बी डुघै डेओए अर सह सारै देशै छिंघिए।
सह बेल बझ़ी उझै बडी-बडी केल़ुई च़ुंडी तैणीं अर
तैहा बेले ताला करै लागी बडी-बडी धारा बी छ़ैल्ली।
तेते टिरा पुजी बझ़ी करै मांझ़ समुंदर अर
फरात दरैऊआ तैणीं।
ऐबै तेऊ बागा फेर-फिरदै बाल़-शोहल़ किल्है पाऐ तंऐं ढोल़ी?
ऐबै लागै कज़ोहै बागा दी पेशी दाखा च़ोरदै एछदै!
बणें सुंगरै लाअ तेथ करोल़अ डाही पाई,
बणें ज़ीबै लाई तेते फसल खाई।
ए स्वर्गे सारी सैने मालक बिधाता, सारअ बल आसा ताखा ई,
ज़ीबाण, स्वर्गा का भाल़ हाम्हां बाखा उंधै,
हाम्हैं आसा तेरी परज़ा, हाम्हां बच़ाऊ।
तंऐं आसा अह दाखे बेल आपणैं हाथै रोही दी,
तंऐं ई आसा आप्पै एथ बझ़ा छ़ाडी दी!
दुशमणै पाअ तेतो ताल झोटी, संघा चैल़ी तेथ आग!
तिन्नां बाखा फिर तूह रोश्शै संघा कर तिन्नां दुशमणा पठी बरैबाद।
पर तिन्नां मणछे कर फाज़त ज़ुंण तंऐं आप्पू लै आसा छ़ांटै दै अर
सह देश ज़हा लै तंऐं आसा बल दैनअ द।
ऐबै निं हाम्हां भिई ताखा दूर हंदै,
हाम्हां लै दै ऐबै नऊंईं ज़िन्दगी, ताकि हाम्हैं तेरी ज़ै-ज़ैकार करी सके।
ए स्वर्गे सारी सैने मालक बिधाता, हाम्हां कर तिहै ई ज़िहै हाम्हैं पैहलै आसा तै,
हाम्हां बाखा भाल़ प्रैश्शै मुंहैं, तै जाणै हाम्हैं बच़ी।
Source notes (1)
- Cross-reference ईशा. 5:11
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.