Kulvi Outer Seraji Bible
भज़न 78
बिधाता आपणीं परज़ा लै किऐ दै काम
असापो खास भज़न
मेरै साथी-संघीओ, मेरी गल्ला दी दैआ धैन,
मंऐं भाल़ तम्हां लै केही शिक्षा लाई दैई!
मुंह करनी कथ्या खोज़ी गल्ला,
संघा खोज़णीं मुंह तम्हां का तिंयां गल्ला ज़ुंण पराणैं ज़मानै ओर्ही गुप्त आसा।
ईंयां गल्ला आसा हाम्हैं आपणैं
दादा-बाबा का शूणीं दी,
हाम्हां निं ईंयां गल्ला आपणैं लान्हैं सुन्हैं का च़ोरी डाहणीं,
हाम्हां खोज़णअ आगली पोस्ती का
बिधातो बल अर तेऊए महान कामें बारै कि
तेऊ किहै-किहै नुआहरै काम आसा किऐ दै।
बिधाता दैनअ याकबे आद-लुआद इज़राईली मणछा लै आपणअ बधान।
तेऊ आसा म्हारै दाद-बाब नैरी-समझ़ाऊई डाहै दै कि
तेऊओ बधान डाहै पठी आपणैं शोहरू-माठै का खोज़ी,
ताकि हर पोस्तीए मणछा बधाने शिक्षा भेटे अर
तिंयां तेऊ बधाना आगली पोस्ती का खोज़े।
इहअ करै हणअ तिन्नां परमेशरा दी पाक्कअ भरोस्सअ,
नां तिंयां परमेशर बिधाता किऐ दै महान कामां बिस्सर्नै।
तेखअ ज़िऊंणीं तिन्नां तेऊ साबै ज़िन्दगी ज़िहअ तेऊ हुकम आसा किअ द।
तै निं तिंयां आपणैं दादा-बाबा ज़िहै हठू अर
द्रोही हणैं, ज़हा परमेशरा दी भरोस्सअ ई निं बोल़दै तै डाही
अर नां तिंयां आप्पू बिधाता लै शुचै-पाक्कै रहै।
एप्रैम गोत्रे जोधै का थिऐ जुधा करना लै अस्त्र-शस्त्र बी,
पर ज़ांऊं जुधा करने बारी आई, तिंयां ठुर्है उंबल़ी बाखा!
तिन्नैं निं परमेशरा संघै किई दी करार पूरी किई,
तिन्नैं निं बधाने साबै काम किअ।
बिधाता तिन्नां नदरी ज़ुंण नुआहरै काम अर च़मत्कार किऐ तै,
तेता तै तिंयां बिस्सरुई गऐ दै।
ज़धू तिन्नें दाद-बाब मिसर देशे सोआन1 सऊंऐं मुल्खै आसा तै,
तधू किऐ तै बिधाता तिन्नां नदरी च़मत्कार।2
बिधाता किअ त समुंदर दूई बाखा ओर्ही-पोर्ही दुआली ज़िहअ,
समुंदरा मांझ़ा-मांझ़ी बात काढी टपाऊऐ तिंयां पार बाखा लै।
धैल़ी नढैऊऐ तिंयां तेऊ बादल़े छ़ैल्ली हेठै अर
राची हांढणा लै प्रैश्शअ हआ त तिन्नां लै आगीओ बडअ कूंड लागअ द।
उज़र रेगीस्तानै काढअ तेऊ शुक्की टोल्हा का पाणीं,
सारी परज़ा झुटअ रज्ज़ी पाणीं ज़िहअ कि तिन्नैं झुटअ बडै डुघै सअरा का।
टोल्हा का निखल़अ एतरअ पाणीं कि आजू
लागअ दरैअ बगदअ।
पर तज़ी बी रही उज़र रेगीस्तानै
परम प्रधान परमेशर खास परज़ा3 पाप करदी लागी!
खाणां-पिणां लै मन्न-मरज़ीओ मांगी रहै तिंयां
परमेशरा परखदै लागी!
तिंयां फिरै इहअ बोली बिधाता पटंकदै,
“परमेशर कै उज़र रेगीस्तानै बी हाम्हां एतरै मणछो पेट रज़ैऊई सका?
च़ल्ल अह गल्ल, हुई कि
बिधाता काढी शुक्की टोल्हा का पाणींए गाड,
पर सह कै हाम्हां एतरै मणछा लै रोटी अर
शिखा बी सका रज्ज़ी खाणां लै दैई?”
तिन्नें इना एही गल्ला शूणीं फिरी बिधाता बी रोश्श,
तेऊ बरशाऊई आपणीं परज़ा याकबे आद-लुआदा4 लै आग अर
तेऊ आई इज़राईली लै होर बी खास्सी रोश्शै,
किल्हैकि तिन्नैं निं तेऊ दी भरोस्सअ डाहअ,
नां तिन्नैं इहअ विश्वास किअ कि बिधाता सका तिन्नां बच़ाऊई।
तेखअ किअ बिधाता बादल़ा लै हुकम संघा
खोल्है खिरी तेऊ सरगे तीरू,
तेखअ दैनअ तेऊ स्वर्गा का नाज़
ज़ेता लै खाण बोला।
सह दैनअ बिधाता तिन्नां लै खास नाज़ अर
तिन्नैं सोभी खाअ सह मन्न-मरज़ीओ रज्ज़ी।
बिधाता बहाऊई पुर्बा बाखा बागरी अर
आपणैं बला करै आणी तेऊ दखणा बाखा ढिश,
तेता संघै आणै तेऊ होछ़ै-होछ़ै च़ेल्लूओ एतरअ छ़ुंढ कि
तिन्नां फेर ज़ैगा लागै तेते समुंदरे रेता ज़िहै रूल़,
बिधाता बशैल़ै तिंयां च़ेल्लू तिन्नें खिम्भे डेरै
फेर सारै दी अर
तिन्नैं खाई तेते रज्ज़ी शिखा संघा
तिन्नें शिखा खाणें शौक बी किई बिधाता पूरी।
पर अज़ी निं तिंयां खाई बी मुक्कै तै
कि बिधाता आई तिन्नां लै रोश्शै अर
तिन्नें ज़ोर-ज़ाहणा आल़ै मर्ध अर
खारकै मणछ पाऐ इज़राईली मांझ़ा का मारी।
पर एतरअ हई बी रहै तिंयां पाप करदै लागी,
तिन्नैं निं परमेशरे च़मत्कारे कामां दी तज़ी बी विश्वास किअ!
तेखअ लागै तिन्नें धैल़ै बृथा कामां दी बितदै अर
तिन्नैं भाल़ी आपणीं अमरा आफ़ता प्रैंदै आफ़त।
ज़ांऊं परमेशरै बिधाता तिन्नां मांझ़ै धख ज़िहै मारी पाआ त,
तिंयां होर एछा तै तेखअ बिधाता पुछ़दै,
संघा रहा तै दिला-मन्नां का तेऊए च़ाकरी लागी।
तेखअ फिरा ती तिन्नां आद कि परम प्रधान परमेशर बिधाता आसा तिन्नां लै बडी टोल्हा ज़िहअ,
ज़ेथ पिछ़ू लुक्की तिंयां बच़ी सका।
पर तिंयां थिऐ पाक्कै ठग!
तज़ी बी निं तिन्नैं बिधाता सेटा झ़ुठअ बोल़णअ छ़ाडअ,
तिन्नें दिलै त बिधाता लै धोखअ ई
नां तिन्नैं बिधाता संघै करार डाही पाक्की।
तज़ी बी रहअ परमेशर तिन्नां लै झणैल़ू,
तेऊ किऐ तिन्नें पाप माफ अर
तेऊ निं तिन्नां बरैबाद हणैं दैनअ,
तेऊ ज़िरअ कई बारी आपणअ रोश्श
अर तेऊ निं तिन्नां लै झ़ाई-फांगअ बी दैनअ लागणै।
बिधाता डाहा ऐहा ई गल्ला आद कि मणछे देही हणीं खतम ई
ज़ुंण बागरी ज़ेही डेओआ, संघा निं भिई फिरी एछदी।
ज़धू तिंयां उज़र रेगीस्तानै थिऐ, तिंयां करा तै कबल्लअ द्रोह अर
बिधाता शोट्टअ त तिन्नैं दुखी करी।
तिंयां रहै हर बगत परमेशरा परखदै लागी,
इहअ करै ठैऊआ तै तिंयां इज़राईले पबित्र बिधाता लै झोशा।
तिंयां गऐ तै बिधाते महान बला बिस्सरुई अर इहअ बी निं तिन्नां आद रहअ कि
बिधाता तिंयां तिन्नें दुशमणा का किहअ करै आणै छ़ड़ैऊई।
बिधाता ज़ुंण महान काम अर च़मत्कार
मिसर देशै सोआन सऊंऐं मुल्खै रहैऊऐ,
मिसर देशै गाडा-नाल़ीओ सारअ पाणीं बणाअं त लोहू अर
मिसरी लोग गऐ तै चिशै मरी,
सारै देशै छ़ाडै तै बिधाता डगैछे गअण, तिन्नैं चुशअ तिन्नों लोहू अर
सारै देश भर्हुअ मिंडकै करै, सह हुई ती तिन्नां लै आफ़त।
तिन्नें खेचै लागै तै घणैं किल़ै अर रैट्टै अर
तिन्नें हुई ती सारी फसल बरैबाद।
तिन्नें दाखे बाग अर फेडूए बूटे फसल
किई बिधाता शरू बरशाऊई करै बरैबाद।
तिन्नें डागै-चैणैं बी मूंऐं बडै-बडै शरू करै अर
तिन्नें हेल़्ही लै पल़ी सरगा का बीज।
बिधाता पाई मिसरी लोगा लै घोर आफ़ता,
खिरी आई बिधाता एही रोश्शै कि
तेऊ छ़ाडअ तिन्नां मारना लै दूत।
तेखअ निं तेऊ आपणअ रोश्श ज़िरअ अर
नां तिंयां तेऊ मरनै का बच़ाऊऐ।
पर तिन्नां मांझ़ै पाई तेऊ मरी।
मिसर देशै हर घअरै ज़ेतरै ज़ेठै शोहरू आसा तै,
तिंयां पाऐ तेऊ सोभ मारी।
हामे5 डेरै दी ज़ेतरै पैहलै फल़ थिऐ।6
पर आपणीं परज़ा छाहकी तेऊ भेडा-बाकरीए हेल़्ही ज़ेही मिसर देशा का बागै,
आप्पू रहअ फुआला ज़िहअ तिन्नां आजू-आजू हांढदअ लागी।
तिंयां रहै राज्ज़ी-मौज़ी आजू हांढदै लागी अर तिन्नां निं किछ़ै डअर-भगैर आथी ती।
पर तिन्नें दुशमण हुऐ समुंदरा दी डुबी मरी खतम।
बिधाता पजैल़ै तिंयां आपणीं पबित्र ज़ैगा नेल़ तैहा धारा7 तेऊ देशे सिऊंआं
ज़ुंण तेऊ आप्पै त तिन्नां लै गिम्मी डाहअ द।
तेता का आजी हेरै तेऊ देशा का बिधाता पराई ज़ातीए लोग पोर्ही काढी;
संघा दैनी तिन्नें सारी ज़ैगा-ज़िम्मीं इज़राईले बारा गोत्रा लै बांडी अर
तिन्नें डेरै बी गिम्मै पठी इज़राईली आप्पू लै।
पर तज़ी बी रहै इज़राईली बिधाता परखदै लागी अर
परम प्रधान परमेशरो बधान निस्सअ तिन्नां रप्पी!
नां तिंयां तेऊओ हुकम निस्सै मनी।
तिंयां थिऐ आपणैं दादा-बाबा ई ज़िहै विश्वास घाती अर कदुष्ट,
तिंयां थिऐ इहै कबाणा ज़िहै ज़ेता का कतीर छ़ाडी नशाणअ ई निं लागदअ!
बिधाता च़ाहा त इहअ कि तिंयां पठी तेऊ लै झ़ूरै,
पर तिन्नैं ठैऊई मैहरै अर ओडै पूज़ी करै बिधाता लै रोश्श।
इहअ भाल़ी आई बिधाता रोश्शै अर
तेऊ छ़ाडै तेखअ इज़राईली ज़ातै का पठी।
इज़राईली मणछा जैंदरी शिलोह नगरी घैऊऐ दै ज़हा खिम्भा दी बिधाता एछा त,
तेऊ शांतीए खिम्भा दी एछणें बी पाई तेऊ छ़ाड़।
करारो मणशू ज़ुंण बिधाते शोभा अर बलो नछ़ैण थिअ,
तेता बी दैनअ तेऊ दुशमणा गिम्मणै।
तेऊ ती आपणीं खास परज़ा लै रोश्शै आई दी अर
तैही दैनअ तेऊ तिन्नां दुशमणे हाथै तलबारा करै मरनै।
इज़राईलीए खारकै मणछ मूंऐं जुधा लै अर
खारकी बेटल़ी संघै निं कुंण बैहा करनै आल़अ बी छ़ुटअ!
प्रोहत पाऐ तलबारा करै काटी अर
तिन्नें बिधबा बेटल़ी निं शोग बी दैनअ मनाऊंणै।
तेखअ उझ़ुअ खिरी मालक ज़िहअ निंजा का,
ज़िहअ नशै आल़ै दाखे रसा झुटी जोधअ क्रुंगा।
तेऊ खद्रेल़ै दुशमण इहै कि
तिंयां हुऐ सदा लै शर्मिंदै।
तेखअ छ़ाडै बिधाता युसुफे आद-लुआद अर
नां तेऊ एप्रैम गोत्रे मणछ छ़ांटै,
इना छ़ाडी छ़ांटअ तेऊ यहूदा गोत्र अर
सियोन धार ज़ेता लै सह आप्पू खास्सअ झ़ूरा।
तिधी बणाअं तेऊ आपणअ भबन
ज़िहअ घअर तेऊओ स्वर्गै आसा,
तेऊ बणाअं सह इहअ पाक्कअ ज़ेही पृथूई आसा पाक्की टकैल़ी दी,
सह बणाअं सदा लै मूल़।
तेखअ छ़ांटअ तेऊ आपणअ दास दाबेद,
सह आणअ तेऊ भेडा-बाकरीए शाल़ा का लोल़ी।
ज़िधी भेडा-बाकरीए हेल़्ही च़राऊंदअ हआ त,
तेखअ बणाअं बिधाता सह आपणीं खास परज़ा याकबे आद-लुआदो राज़अ कि
सह फुआला ज़ेही इज़राईलीए फाज़त करे।
राज़अ दाबेद रहअ दिल-मन्न लाई तिन्नें फाज़त करदअ लागी
अर आपणीं अक्ल अर समझ़ा करै रहअ सह तिन्नां लै सलाह दैंदअ लागी।
Source notes (7)
- Footnote सोआन अह आसा रामसेस नगरी, अह ती नील नदीए पुर्बा बाखा सेठ नगरी
- Cross-reference लुआ. 1:11
- Footnote खास परज़ा इब्रानी लोग
- Footnote परज़ा याकबे आद-लुआदा याकब
- Footnote हामे हामो डेरअ बोला तै मिसर देशा लै, हाम थिअ नूहो शोहरू, इहअ बोला तै कि हाम थिअ मिसरी लोगो मूल़ बाब।
- Cross-reference मूल. 10:6; भज. 105:23,27; 106:22
- Footnote धारा सियोन
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.