Kulvi Outer Seraji Bible
भज़न 77
खरीए पलका करा बिधाता मज़त
जदूतून, गाज़ै-बाज़ै आल़ेए सैणैं लै असापो भज़न
हे बिधाता, हुंह करा लेर-पकार पाई ताह सेटा अरज़,
तै झ़ाणीं तूह शुणें!
ज़ेभै मुंह आफ़त पल़ी, तेभै करा हुंह मेरै मालक बिधाता सेटा अरज़,
सारी राची डाहा हुंह अरज़ करदी बारी आपणीं बाह फुआरी,
पर मुंह निं शांती भेटी।
हे बिधाता, तेरै बारै सोठी-सोठी निं मुंह
उझ़ुई नां बेशी राम हंदअ।
राची निं नींज अर धैल़ी निं भुख हंदी,
मुंह निं हैल़ी हांस बी रही।
हुंह सोठा पराणैं ज़मानें तिन्नां धैल़ीए बारै अर
पिछ़लै जुगे तिन्नां साले बारै।
मुंह हआ सारी राची सोठ पल़ी दी,
हुंह रहा आपणैं मन्नैं राम्बल़ै करै इहअ बच़ार करदअ लागी,
“मेरै मालक बिधाता कै हुंह सदा लै हेरअ छ़ाडी?
ऐबै झ़ाणीं सह हाम्हां लै कधि निं हणअ होए राज्ज़ी?
सह झ़ाणीं हाम्हां लै एचल़ी झ़ूरा हंदअ?
तेऊ हाम्हां लै दैनी दी ज़बान बी ऐबै बृथा डेऊई होए?
परमेशरा झ़ाणीं हाम्हां लै जश दैणें आद बी निं रही होए?
सह झ़ाणीं रोश्शै हाम्हां लै झींण करनै का बी हटअ होए पिछ़ू?”
तेखअ किअ मंऐं इहअ बच़ार, “सोभी का खास्सअ दुख हुअ मुंह इहअ कि
परम प्रधान परमेशर बिधाता का झ़ाणीं ऐबै बल ई निं रहअ होए तैही निस्सअ सह म्हारी मज़त करी!”
पर हे बिधाता, ज़ुंण महान काम तंऐं किऐ, तेता निं हुंह बिस्सरदअ,
पराणैं ज़मानैं तंऐं ज़ुंण नुआहरै काम किऐ, तिंयां डाहणैं मुंह आद।
आझ़ तैणीं तंऐं ज़िहअ बी किअ मुंह रहणअ तेते बारै सोठदै लागी,
मुंह करनअ तेरै तिन्नां महान कामों धैन।
तूह बिधाता ज़िहअ बी करा, तेरअ सह काम हआ भलअ ई,
तूह आसा सोभी का बडअ अर महान, तेरअ मकाबलअ निं देअ नां देबतै करी सकदै!
च़मत्कार सका सिधअ तूह परमेशर ई करी,
तंऐं रहैऊअ देशा-देशा का आपणअ बल।
आपणअ बल रहैऊई बच़ाऊई तंऐं आपणीं परज़ा बी,
याकब अर युसुफे आद-लुआद किऐ तंऐं आज़ाद।
ताह भाल़ी छ़ुटा समुंदरा बी काम्मणीं अर
तेते थाल्लै हआ ज़ाज़री।
बादल़ा का छ़ुटा उंधै पाणीं संघा लागा
गुल़ूबिज़ल़ूए ढिम्हां अर
सारै सरगै लागा बिज़ल़ीए झ़प्पा-झ़प्पी।
ज़ांऊं तेरअ गुल़ूबिज़ल़ू थरेटा ज़िहअ घुर्हअ,
संसारै लागै बिज़ल़ीए च़लकारै,
धरती हुई ज़ाज़री अर लोगा छ़ुटी काम्मणीं।
तूह हांढा समुंदरे छ़ाल्ली प्रैंदै,
डुघअ समुंदर लंघा तूह एकी लाह लै,
पर तेरै खूरे नछ़ैण निं कोही का शुझदै।
तंऐं छाहकी आपणीं परज़ा भेडे हेल़्ही ज़ेही,
मोसा अर हारण डाहै तिन्नें फुआल बणाईं।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.